കണ്ണൂര്‍: മലബാറിലെ തന്നെ പ്രധാനപ്പെട്ട ടൂറിസം കേന്ദ്രങ്ങളിലൊന്നായ കണ്ണൂര്‍ പയ്യാമ്പലം പാര്‍ക്ക് തുറന്നുകൊടുക്കാന്‍ തയ്യാറാകാത്ത അധികൃതരുടെ നടപടി പ്രതിഷേധത്തിന് കാരണമാകുന്നു. കോര്‍പ്പറേഷന്‍ അധികൃതരും ഡിടിപിസിയും തമ്മിലുള്ള അവകാശത്തര്‍ക്കത്തെ തുടര്‍ന്ന് ദിവസങ്ങളായി പാര്‍ക്ക് അടച്ചിട്ടിരിക്കുകയാണ്. കണ്ണൂര്‍ നഗരത്തിലെത്തുന്ന ടൂറിസ്റ്റുകള്‍ക്കും പൊതുജനങ്ങള്‍ക്കും ഇതുമൂലം പയ്യാമ്പലം പാര്‍ക്കില്‍ പ്രവേശിക്കുന്നതിന് സാധിക്കുന്നില്ല. മാത്രമല്ല പാര്‍ക്ക് ഇപ്പോള്‍ സാമൂഹ്യവിരുദ്ധരുടെ കേന്ദ്രമായി മാറിയിരിക്കുകയാണ്. ഡിഎസ്‌സിയുടെ കയ്യിലുള്ള പാര്‍ക്കിന്റെ ഒരുഭാഗം ഡിടിപിസിക്ക് വാങ്ങിച്ചുകൊടുക്കുന്നതിനുവേണ്ടിയുള്ള ചര്‍ച്ചകള്‍ മുഖ്യമന്ത്രിയുടെ നേതൃത്വത്തില്‍ തന്നെ നടക്കുന്നതിനിടയിലാണ് ബന്ധപ്പെട്ട അധികാരികളുടെ ഭാഗത്ത് നിന്ന് ഇത്തരം നടപടിയുണ്ടായത്. ഈ സാഹചര്യത്തില്‍ പാര്‍ക്ക് അടിയന്തരമായി തുറന്നുകൊടുക്കാന്‍ ആവശ്യമായ നടപടികള്‍ ജില്ലാ ഭരണകൂടം സ്വീകരിക്കണമെന്ന ആവശ്യം ശക്തമായിരിക്കുകയാണ്.
കമ്പൂട്ടര്‍ ഉപകരണങ്ങളുടെ വിതരണം 25 ന്
തളിപ്പറമ്പ്: സംസ്ഥാനത്തെ പൊതുവിദ്യലയങ്ങളിലെ എട്ടു മുതല്‍ പന്ത്രണ്ടുവരെയുള്ള ക്ലാസ്സുകള്‍ ഹൈടെക്ക് ആക്കുന്നതിന്റെ ഭാഗമായി തളിപ്പറമ്പ നിയോജക മണ്ഡലത്തിലെ സ്‌ക്കൂളുകളിലേക്കുള്ള കമ്പൂട്ടര്‍ ഉപകരണങ്ങളുടെ വിതരണം 25 ഉച്ചക്ക് 2 മണിക്ക് സര്‍സയ്യദ് എച്ച്എസ്എസില്‍ നടക്കും.തളിപ്പറമ്പ നിയോജക മണ്ഡലത്തിലെ 20 ഹൈസ്‌ക്കൂളുകള്‍, 15 ഹയര്‍സെക്കണ്ടറി സ്‌ക്കൂളുകള്‍, 3 വൊക്കേഷണല്‍ ഹയര്‍സെക്കണ്ടറി സ്‌ക്കൂളുകള്‍ എന്നിവയിലെ ആകെ 408 ക്ലാസ്സ്മുറികളാണ് ഹൈടെക്ക് ആക്കുന്നത്. പ്രസ്തുത സ്‌ക്കൂളിലെ കമ്പ്യൂട്ടര്‍ ലാബുകളും ഇതോടൊപ്പം നവീകരിക്കപ്പെടുന്നുണ്ട്. വിതരണോദ്ഘാടനം ഉച്ചക്ക് 2 മണിക്ക് ജെയിംസ് മാത്യു എംഎല്‍എ നിര്‍വഹിക്കും.
