പയ്യാവൂര്‍ ഊട്ട് മഹോത്സവം: ഭക്തജനത്തിരക്കേറി: പ്രധാന ഉത്സവം 22 ന്

പയ്യാവൂര്‍: പയ്യാവൂര്‍ ഊട്ട് മഹോത്സവത്തിന് ഭക്തജനത്തിരക്കേറി. പ്രധാന ഉത്സവം 22 ന് നടക്കും. ഇതോടനുബന്ധിച്ച് നെയ്യമൃത് വരവ്, ചൂളിയാട് ദേശക്കാരുടെ ഓമനക്കാഴ്ച വരവ് എന്നിവയുണ്ടായിരിക്കും. 11 ന് തുടങ്ങിയ ഊട്ട് മഹോത്സവത്തിന് വന്‍ ഭക്തജനത്തിരക്കാണ് അനുഭവപ്പെടുന്നത്. ഇന്ന് രാവിലെ 5 മണിക്ക് കുടകരുടെ അരി സമര്‍പ്പണം, വൈകുന്നേരം 5 ന് തിടമ്പെഴുന്നള്ളത്തും തിരുനൃത്തവും, രാത്രി 7.30 ന് തിരുവത്താഴത്തിന് അരിയളവ്. 10.30 ന് കുടകരുടെ തുടികൊട്ടിപ്പാട്ട് എന്നിവയും 21 ന് രാവിലെ 6 മണിക്ക് തിരുനടയില്‍ കുടകരുടെ അരി സമര്‍പ്പണം, തുടര്‍ന്ന് അരിയളവ്, 8 മണിക്ക് അരിയുമായെത്തിയ കാളകളെ തൊഴീക്കല്‍ ചടങ്ങ്, രാത്രി 7 മണിക്ക് ചേടിച്ചേരി ദേശവാസികളുടെ ഊട്ടുകാഴ്ച, 9.30 ന് തായമ്പക, 10 ന് തെയ്യംപാടിപ്പാട്ട്, തുടര്‍ന്ന് കുടകരുടെ തുടികൊട്ടിപ്പാട്ട് എന്നിവ നടക്കും. പ്രധാന ഉത്സവ ദിനമായ 22 ന് രാവിലെ 4 മണി മുതല്‍ വിവിധ നെയ്യമൃത് മഠങ്ങളില്‍ വ്രതാനുഷ്ഠാനത്തില്‍ കഴിയുന്ന നെയ്യമൃത് സംഘം ക്ഷേത്രത്തില്‍ നെയ്യൊപ്പിക്കല്‍ നടത്തും. ഉച്ചക്ക്.12.30ന് തിടമ്പെഴുന്നള്ളത്തും തിരുനൃത്തവും തുടര്‍ന്ന് കോമരത്തച്ചന്റെയും നെയ്യമൃതുകാരുടെയും കുഴിയടുപ്പില്‍ നൃത്തം, വൈകുന്നേരം 4 മണിക്ക് ചൂളിയാട് ദേശവാസികളുടെ ഓമനക്കാഴ്ച, വൈകുന്നേരം 5 ന് കുടകരുടെ മടക്കയാത്ര എന്നിവ നടക്കും. ഇതോടനുബന്ധിച്ച് വിവിധ കലാപരിപാടികളും അരങ്ങേറും. ഓമനക്കാഴ്ചക്ക് ആവശ്യമായ പഴക്കുലകള്‍ ചൂളിയാട് ഗ്രാമത്തിലെ വിവിധ സ്ഥലങ്ങളില്‍ പഴുപ്പിക്കാനായി വെച്ചിരിക്കുകയാണ്. 21 ന് ഇവ പുറത്തെടുക്കും. 22 ന് രാവിലെയാണ് ഓമനക്കാഴ്ച ചൂളിയാട് ഗ്രാമത്തില്‍ നിന്നും പുറപ്പെടുക.