കൊച്ചി: ബോധാനന്ദ ശ്രുതി സേവാ ട്രസ്റ്റ് സംഘടിപ്പിക്കുന്ന ഇഷ്ടസിദ്ധി സമഷ്ടി അര്ച്ചന 19ന് വൈകിട്ട് 4 മണി മുതല് 7 മണി വരെ എറണാകുളത്തപ്പന് ഗ്രൗണ്ടില് നടക്കും. സംബോധ് ഫൗണ്ടേഷന് പരമാചാര്യ സ്വാമി ബോധാനന്ദ സരസ്വതിയുടെ മുഖ്യ കാര്മ്മികത്വത്തിലാണ് അര്ച്ചന.
പത്ത് വര്ഷത്തില് ഒരിക്കല് നടത്തുന്ന ഇഷ്ടസിദ്ധി സമഷ്ടി അര്ച്ചനയ്ക്ക് ആയിരത്തി ഇരുന്നൂറിലേറെ പേര് രജിസ്റ്റര് ചെയ്തുവെന്ന് സംബോധ് ഫൗണ്ടേഷന് മുഖ്യാചാര്യന് സ്വാമി അധ്യാത്മാനന്ദ സരസ്വതി, ബോധാനന്ദ ശ്രുതി സേവാ ട്രസ്റ്റ് പ്രസിഡന്റ് ആര്ക്കിടെക്റ്റ് ബി.ആര്. അജിത്, സെക്രട്ടറി പി.എസ്. രാധാകൃഷ്ണന്, ജനറല് കണ്വീനര് എം.വി. പത്മകുമാര്, സി.ജി. രാജഗോപാല്, എന്നിവര് വാര്ത്താ സമ്മേളനത്തില് അറിയിച്ചു.
അര്ച്ചന വേദിയില് സ്ഥാപിക്കാനുള്ള മഹാഗണപതി, ആഞ്ജനേയ സ്വാമി, നവഗ്രഹങ്ങള് എന്നീ വിഗ്രഹങ്ങള് എറണാകുളം ഹനുമാന് കോവിലില് എത്തിച്ചു. സ്വാമി ബോധാനന്ദ സരസ്വതിയും മുരുകന്കോവില് മേല്ശാന്തി അമൃതഘടെശന്, ഹനുമാന്കോവില് ശാന്തിമാരായ ശ്രീനിധി, മാധവ്രാജ്, ബ്രഹ്മചാരി പ്രണവചൈതന്യ എന്നിവര് ചേര്ന്ന് സ്വീകരിച്ചു. അര്ച്ചനയില് പങ്കെടുക്കുന്ന ഭക്തന്റെ തെരഞ്ഞെടുത്ത ആഗ്രഹത്തിന്റെ പൂര്ത്തീകരണത്തിനായി ശിവശക്തി സംയോഗത്തില് ആവിര്ഭവിക്കുന്ന പ്രപഞ്ച ശക്തിയുടെ അനുഗ്രഹം തേടലാണ് അര്ച്ചനയെന്ന് സ്വാമി ബോധാനന്ദ സരസ്വതി പറഞ്ഞു.
