നെയ്യാറ്റിന്കര: അമരവിള ചെക്ക്പോസ്റ്റില് കടത്തുസാധനങ്ങളില് ഉദ്യോഗസ്ഥരുടെ കൈയിട്ടുവാരലെന്ന് പരാതി. അന്തര്സംസ്ഥാനങ്ങളില് നിന്ന് അനധികൃതമായി ചെക്ക്പോസ്റ്റ് വെട്ടിച്ചു കടത്താന് ശ്രമിക്കവെ പരിശോധനയ്ക്കിടയില് പിടികൂടപ്പെടുന്ന വാഹനങ്ങളിലെ കടത്തുസാധനങ്ങളില് നിന്നുമാണ് ഉദ്യോഗസ്ഥരുടെ കൈയിട്ടുവാരലെന്നാണ് പരാതി.
ദിവസങ്ങള്ക്ക് മുമ്പ് തമിഴ്നാട്ടില് നിന്ന് പച്ചക്കറിവാഹനത്തില് കടത്താന് ശ്രമിച്ച മുപ്പത് ലക്ഷത്തിലധികം വിലവരുന്ന നിരോധിത പാന്മസാല വാഹനപരിശോധനയ്ക്കിടെ ചെക്ക്പോസ്റ്റിലെ എക്സൈസ് സംഘം കസ്റ്റെഡിയിലെടുത്തിരുന്നു. വാഹനത്തില് നിന്നു സാധനം പുറത്തെടുക്കുന്നതിനു മുമ്പ് തന്നെ ഉദ്യോഗസ്ഥരുടെ കൈയിട്ടുവാരലും തുടങ്ങി. ഉദ്യോഗസ്ഥര് പാന്മസാല കൈയിട്ടു വാരുന്നതു കണ്ട നാട്ടുകാരില് ചിലര്ക്ക് വാഹനത്തില് ഉണ്ടായിരുന്ന സവാളകളും പച്ചകറികളും സൗജന്യമായി നല്കി. ഇത്തരം സംഭവം അമരവിള ചെക്ക്പോസ്റ്റില് സ്ഥിരമാണെന്ന് പ്രദേശവാസികള് പറയുന്നു.
ചെക്ക്പോസ്റ്റില് പിടിക്കപ്പെടുന്ന വസ്തുക്കള് ഉദ്യോഗസ്ഥര് പങ്കുവച്ച ശേഷമാണ് മാധ്യമങ്ങളെ അറിയിക്കുന്നതും കണക്കെടുക്കുന്നതും. നിയമാനുസൃതമായി വാഹനങ്ങളില് കൊണ്ടുപോകുന്നതിന്റെ പങ്കും ചെക്ക്പോസ്റ്റിലെ വാഹനപരിശോധന നടത്തുന്ന ഉദ്യോസ്ഥര്ക്ക് നല്കണമെന്നത് നിര്ബന്ധമാണ്. സംസ്ഥാനത്ത് നിരോധിച്ച പാന്മസാലകള് ചെക്ക്പോസ്റ്റിനു സമീപത്തെ കടകളില് സുലഭമായി ലഭിക്കും. ഉദ്യോഗസ്ഥര് കൈയ്യിട്ടുവാരുന്ന സാധനങ്ങള് പകുതിവിലയ്ക്ക് സമീപത്തെ കടകളില് ഉദ്യോഗസ്ഥര് കച്ചവടം നടത്തുന്നതായും ആരോപണമുണ്ട്.
