ചേര്ത്തല: റോഡ് തകര്ന്ന് യാത്ര ദുസ്സഹമായി. കണ്ണടച്ച് അധികൃതര്. നഗരസഭ 11 ാം വാര്ഡില് കാര്ത്യായനി ദേവീക്ഷേത്രത്തിന് പിന്നിലുള്ള റോഡ് പൊട്ടിപ്പൊളിഞ്ഞ് കുണ്ടും കുഴിയുമായിട്ട് നാളുകളേറെയായി. കുഴികളില് വീണ് ഇരുചക്രവാഹനയാത്രികര് ഉള്പ്പെടെയുള്ളവര് അപകടത്തില് പെടുന്നതും പതിവാണ്.
നിരവധി വ്യാപാര സ്ഥാപനങ്ങളാണ് റോഡിനിരുവശവും സ്ഥിതിചെയ്യുന്നത്. പ്രതിദിനം നൂറ് കണക്കിന് വാഹനങ്ങള് കടന്നുപോകുന്ന വഴിയാണിത്. മെറ്റല് ഇളകി ചിതറിക്കിടക്കുന്നതിനാല് ഇരുചക്രവാഹനയാത്രികരും കാല്നടയാത്രക്കാരുമാണ് ഏറെ ദുരിതം അനുഭവിക്കുന്നത്. വാഹനങ്ങള് കടന്നുപോകുമ്പോള് കല്ലുകള് സമീപത്തെ കടകളിലേക്ക് തെറിച്ചു വീണ് സാധനങ്ങള്ക്ക് കേടുപാടുകള് സംഭവിക്കുന്നുണ്ടെന്നും വ്യാപാരികള് പറഞ്ഞു.
സ്വകാര്യ ബസ് സ്റ്റാന്ഡ്, മാര്ക്കറ്റ് തുടങ്ങിയ പടിഞ്ഞാറന് പ്രദേശങ്ങളെ കെഎസ്ആര്ടിസി സ്റ്റാന്ഡുമായി എളുപ്പത്തില് ബന്ധിപ്പിക്കുന്ന റോഡാണിത്. നഗരഹൃദയത്തിലെ റോഡ് സഞ്ചാരയോഗ്യമാക്കാന് അധികൃതര് അനാസ്ഥ കാണിക്കുന്നതായാണ് വിമര്ശനം. നഗരസഭ കാര്യാലയത്തിന് തൊട്ടടുത്തുള്ള പാത അറ്റകുറ്റപ്പണി ചെയ്തിട്ട് വര്ഷങ്ങളായി.
റോഡ്് അറ്റകുറ്റപ്പണി നടത്തി സഞ്ചാരയോഗ്യമാക്കണമെന്ന് ആവശ്യപ്പെട്ട് നിരവധി തവണ നാട്ടുകാരും വ്യാപാരികളും പരാതി നല്കിയിരുന്നു. പ്രദേശവാസികളുടെ നിരന്തര ആവശ്യത്തിന് നേരെ അധികൃതര് മുഖം തിരിക്കുന്നതായാണ് ആക്ഷേപം. നാട്ടുകാരുടെ നേതൃത്വത്തില് നേരത്തെ കുഴികള് നികത്താനുള്ള ശ്രമം നടത്തിയെങ്കിലും മഴ പെയ്തതോടെ റോഡ് വീണ്ടും യാത്രായോഗ്യമല്ലാതായി.
ഫണ്ട് അപര്യാപ്തമായതിനാലാണ് അറ്റകുറ്റപ്പണികള് വൈകുന്നതെന്നാണ് അധികൃതരുടെ വാദം. നിര്മാണത്തിനുള്ള തുക കണ്ടെത്താന് നഗരസഭ അധികാരികള്ക്ക് സാധിക്കാത്തതിനാല് റോഡ് പിഡബ്ല്യുഡിക്ക് കൈമാറാനുള്ള നീക്കങ്ങള് നടന്നിരുന്നു. പുതുക്കിപ്പണിയാന് 15 ലക്ഷം രൂപയോളം ചെലവാകുമെന്നും ഇത് നല്കുന്നതിന് പൊതുമരാമത്ത് വകുപ്പിന് പരിമിതികളുള്ളതിനാല് റോഡ് ഏറ്റെടുക്കാന് തയ്യാറായിട്ടില്ലെന്നുമാണ് വിവരം.
