കണ്ണൂര്: സിപിഎം നിയന്ത്രണത്തിലുള്ള അഴീക്കല് പാമ്പാടി ആലിന് കീഴില് ക്ഷേത്രത്തിലെ അയിത്താചാരണവുമായി ബന്ധപ്പെട്ട് ജനാധിപത്യ രാഷ്ട്രീയ സഭയുടെ നേതൃത്വത്തില് ദളിത് കുടുംബങ്ങള് ദിവസങ്ങളായി കണ്ണൂര് കലക്ട്രേറ്റ് പടിക്കല് നടത്തുന്ന സമരം സംബന്ധിച്ച് സിപിഎം സംസ്ഥാന, ജില്ലാ പ്രാദശിക നേതൃത്വങ്ങളുടെ മൗനം ചര്ച്ചയാവുന്നു. നേതൃത്വത്തിന്റെ മൗനം അണികള്ക്കിടയില് സജീവ ചര്ച്ചയായിട്ടുണ്ട്. പുരോഗമനം പ്രസംഗിക്കുന്ന പാര്ട്ടി നേതൃത്വം പഴയകാലത്ത് നിലനിന്ന ഒരു ആചാരത്തിന്റെ പേരില് അയിത്തത്തെ അനുകൂലിക്കുകയാണോയെന്ന ചോദ്യം പാര്ട്ടി അണികള്ക്കിടയില് ഉയര്ന്നിരിക്കുകയാണ്. ദുരാചാരത്തെ, ജാതിയതയെ, അയിത്തത്തെ അനുകൂലിക്കുന്ന പാര്ട്ടി നേതൃത്വത്തിന്റെ നിലപാടിനെതിരെ അഴീക്കോട് മേഖലയിലും കണ്ണൂരിലെ പാര്ട്ടി ഗ്രാമങ്ങളിലും അണികള്ക്കും നേതാക്കള്ക്കുമിടയില് വ്യാപക പ്രതിഷേധവും ഉയര്ന്നിട്ടുണ്ട്. അഴീക്കല് മേഖലയിലെ പട്ടികജാതിക്കാരായ സിപിഎം പ്രവര്ത്തകരുടെ നേതൃത്വത്തില് ക്ഷേത്രഭാരവാഹികളുടെ അയിത്താചരണത്തിനെതിരെ ഇന്നലെ ജില്ലാ കലക്ടര്ക്ക് പരാതി നല്കിയ സംഭവം വിഷയത്തില് സിപിഎമ്മിനകത്ത് പ്രാദേശിക തലത്തില് രൂപം കൊണ്ട അഭിപ്രായ ഭിന്നതയാണ് ചൂണ്ടിക്കാണിക്കുന്നത്.
നിരാഹാര സമരം ദിവസങ്ങള് പിന്നിടുന്തോറും സമരത്തിന് ജനപിന്തുണയേറുകയാണ്. സമരത്തിന് പിന്തുണ പ്രഖ്യാപിച്ച് നിരവധി സാമൂഹ്യ-സാസ്ക്കാരിക-രാഷ്ട്രീയ സംഘടനകളുടെ നേതാക്കളും പ്രവര്ത്തകരുമാണ് സമരപ്പന്തലിലേക്ക് ഒഴുകിയെത്തിക്കൊണ്ടിരിക്കുന്നത്. ഇന്നലെ ബിജെപി ദേശീയ നിര്വ്വാഹകസമിതിയംഗം പി.കെ.കൃഷ്ണദാസ് സമരപ്പന്തല് സന്ദര്ശിച്ച് സമരത്തിന് പിന്തുണയറിയിച്ചു. അയിത്താചരണത്തിനെതിരെ ദളിത് സമൂഹം സമരവുമായി മുന്നോട്ടു പോവുമ്പോഴും ഇവരുടെ സമരത്തെ കണ്ടില്ലെന്ന് നടിച്ച് വെല്ലുവിളിയുമായി സിപിഎം പ്രാദേശിക നേതൃത്വം അയിത്താചരണവുമായി മുന്നോട്ട് പോവുകയാണ്. ഇതിന്റെ ഭാഗമാണ് ഇന്നും നാളെയുമായി നടക്കുന്ന ക്ഷേത്രോത്സവത്തിന്റെ ഭാഗമായി കഴിഞ്ഞ ദിവസങ്ങളില് പ്രദേശത്തെ ദളിത് കുടുംബങ്ങളെ ഒഴിവാക്കി തിരുവായുധമെഴുന്നളളത്ത് ചടങ്ങ് നടത്തിയ സംഭവം. ജില്ലാ ഭരണകൂടവുമായി ബന്ധപ്പെട്ട് നടത്തിയ ചര്ച്ചയെത്തുടര്ന്ന് ഉത്സവവുമായി ബന്ധപ്പെട്ട് കഴിഞ്ഞ രണ്ടു വര്ഷമായി നിര്ത്തിവെച്ച അയിത്തം ഇത്തവണ വീണ്ടും പുനഃസ്ഥാപിക്കുകയാണ് സിപിഎം നേതൃത്വം ഇതിലൂടെ ചെയ്തിരിക്കുന്നത്. ചര്ച്ചക്ക് ജില്ലാ ഭരണകൂടം തയ്യാറാകാത്തതില് പ്രതിഷേധിച്ചും ക്ഷേത്രോത്സവവുമായി ബന്ധപ്പെട്ട് കഴിഞ്ഞ രണ്ടു വര്ഷം നിര്ത്തിവെച്ച അയിത്താചരണം ഇത്തവണ വീണ്ടും പുനഃസ്ഥാപിച്ച ക്ഷേത്രാധികാരികളുടെ നടപടിയില് പ്രതിഷേധിച്ചുമാണ് കലക്ട്രേറ്റ് പടിക്കല് സമരം തുടരുന്നത്.
ക്ഷേത്രോത്സവത്തിന്റെ സമാപന ദിവസമായ നാളെവരെ സമരം നടത്താനും പിന്നീട് ഈ അനാചാരത്തെ നിയമപരമായി നേരിടാനും സിപിഎം നടപടിക്കെതിരെ സംസ്ഥാന വ്യാപകമായി പ്രശ്നം പൊതുസമൂഹത്തിനു മുന്നില് എത്തിക്കാനുമാണ് ജെആര്എസ് നേതൃത്വത്തിന്റെ തീരുമാനം. അടുത്ത വര്ഷം മുതലെങ്കിലും എന്നന്നേക്കുമായി അയിത്താചരണം അവസാനിപ്പിച്ചു കിട്ടാനുളള പരിശ്രമത്തിലാണ് മേഖലയിലെ ദളിത് കുടുംബങ്ങള്. ജനാധിപത്യ രാഷ്ട്രീയ സഭ ജില്ലാ പ്രസിഡണ്ടും തദ്ദേശവാസിയുമായ പ്രസീത കൊയിലേരിയാണ് നിരാഹാരസമരം നടത്തി വരുന്നത്.
