കണ്ണൂര്: മട്ടന്നൂര് അന്താരാഷ്ട്ര വിമാനത്താവളം യാഥാര്ത്ഥ്യമാക്കുന്നതോടുകൂടി ഭാവിയില് കണ്ണൂരിന്റെ വികസനവും സാധ്യതകളും എന്ന വിഷയത്തെ ആസ്പദമാക്കി നോര്ത്ത് മലബാര് ചേമ്പര് ഓഫ് കൊമേഴ്സിന്റെ ആഭിമുഖ്യത്തില് മുഖാമുഖം സംഘടിപ്പിച്ചു. ചേമ്പര് ഹാളില് നടന്ന പരിപാടി കോര്പ്പറേഷന് മേയര് ഇ.പി.ലത ഉദ്ഘാടനം ചെയ്തു.
കണ്ണൂര് വിമാനത്താവള കമ്പനിയായ കിയാല് എംഡി വി.തുളസീദാസ് സംബന്ധിച്ചു. നിര്ദ്ദിഷ്ട കണ്ണൂര് വിമാനത്താവളം 2017 സെപ്തംബര് മാസം കമ്മീഷന് ചെയ്യുമെന്ന് മുഖാമുഖം പരിപാടിയയില് പങ്കെടുത്തവരുടെ ചോദ്യങ്ങള്ക്ക് മറുപടിയായി അദ്ദേഹം പറഞ്ഞു. വിമാനത്താവളത്തിന്റെ അനുബന്ധമായി നിരവധി വികസന പ്രവര്ത്തനങ്ങള് നടത്തേണ്ടതുണ്ട്. അനുബന്ധ റോഡുകളുടെ നിര്മ്മാണവുമായി ബന്ധപ്പെട്ട് നോര്ത്ത് സോണ് റീജണിലെ പിഡബ്ല്യുഡി എഞ്ചിനീയറെ സര്ക്കാര് നിയമിച്ചതായി അദ്ദേഹം പറഞ്ഞു. വിമാനത്താവളത്തിലേക്ക് ട്രെയിന് സര്വ്വീസ് പരിഗണിക്കേണ്ടതുണ്ട്. കൂടാതെ തലശ്ശേരി-മട്ടന്നൂര്-കണ്ണൂര് മെട്രോ പദ്ധതിയും ആലോചിക്കേണ്ടതുണ്ട്. കണ്ണൂരിന്റെ ടൂറിസം സാധ്യതകളും പൂര്ണ്ണമായി ഉപയോഗപ്പെടുത്തേണ്ടതുണ്ട്. ഇതിനായി ലക്ഷദ്വീപുമായുളള വിമാന സര്വ്വീസും അഴീക്കല് പോര്ട്ടുമായി ബന്ധപ്പെട്ട് ലക്ഷദ്വീപില് നിന്നും കപ്പല് സര്വ്വീസും പരിഗണിക്കേണ്ടതുണ്ടെന്നും അദ്ദേഹം പറഞ്ഞു. കാര്ഗോ സൗകര്യം വിപുലപ്പെടുത്തേണ്ടതുണ്ട്. കയറ്റുമതി സാധ്യതകള് കണ്ടെത്തി ഇതിനുളള നടപടികള് ഉടന് ആരംഭിക്കേണ്ടതുണ്ട്. വിമാനത്താവളം യാഥാര്ത്ഥ്യമാകുന്നതോടെ കോഴിക്കോടിന്റെ വടക്കന് മേഖലക്കും കാഞ്ഞങ്ങാട് മുതലിങ്ങോട്ടുളള കാസര്കോട് ജില്ലയിലെ പ്രദേശങ്ങള്ക്കും വയനാട്, കേരള അതിര്ത്തിയിലെ കര്ണ്ണാടകയിലെ പ്രദേശങ്ങളിലും വികസനരംഗത്ത് വന് കുതിച്ചുചാട്ടം ഉണ്ടാവുമെന്നും അദ്ദേഹം പറഞ്ഞു.
പരിപാടിയില് കണ്ണൂരിന്റെ സമഗ്ര വികസനവുമായി ബന്ധപ്പെട്ട വിഷയത്തില് ഐഎല് & എഫ്എസ് എക്സിക്യൂട്ടീവ് ഡയറക്ടര് എ.കെ.കൃഷ്ണകുമാര് സംസാരിച്ചു. ജില്ലാ പഞ്ചായത്ത് പ്രസിഡണ്ട് കെ.വി.സുമേഷ്, കോര്പ്പറേഷന് ഡെപ്യൂട്ടി മേയര് പി.കെ.രാഗേഷ്, മട്ടന്നൂര് നഗരസഭാ വൈസ് ചെയര്പേഴ്സണ് കെ.കെ.ശോഭന എന്നിവര് സംബന്ധിച്ചു. ചേമ്പര് പ്രസിഡണ്ട് സി.വി.ദീപക് അധ്യക്ഷത വഹിച്ചു. ചേമ്പര് ഐഎന്എം ഡയറക്ടര് കെ.വി.ഹനീഷ് സ്വാഗതവും ഓണററി സെക്രട്ടറി സച്ചിന് സൂര്യകാന്ത് നന്ദിയും പറഞ്ഞു.
