കണ്ണൂര്: അഴീക്കല് ശ്രീപാമ്പാടി ആലിന്കീഴില് ക്ഷേത്രഭരണാധികാരികളുടെ ദളിത് വിരുദ്ധ നിലപാടില് പ്രതിഷേധിച്ച് ജനാധിപത്യ രാഷ്ട്രീയ സഭയുടെ നേതൃത്വത്തില് സംസ്ഥാന ജനറല് സെക്രട്ടറി തെക്കന് സുനില്കുമാര് കണ്ണൂര് കലക്ട്രേറ്റിന് മുന്നില് നടത്തി വരുന്ന 72 മണിക്കൂര് സത്യഗ്രഹ സമരം ഇന്നലെ വൈകുന്നേരം 4.30യോടെ സമാപിച്ചു. സമരക്കാരുമായി ചര്ച്ചക്ക് ജില്ലാ ഭരണകൂടം തയ്യാറാകാത്തതില് പ്രതിഷേധിച്ചും, ക്ഷേത്ര ഉത്സവവുമായി ബന്ധപ്പെട്ട് കഴിഞ്ഞ രണ്ടു വര്ഷം നിര്ത്തിവെച്ച അയിത്തം ഇത്തവണ വീണ്ടും പുനസ്ഥാപിച്ച ക്ഷേത്രാധികാരികളുടെ നടപടിയില് പ്രതിഷേധിച്ചും സമരം തുടരാന് തീരുമാനിച്ചതിന്റെ അടിസ്ഥാനത്തില് ജനാധിപത്യ രാഷ്ട്രീയ സഭ ജില്ലാ പ്രസിഡണ്ടും തദ്ദേശവാസിയുമായ പ്രസീത കൊയിലേരിയന് ഇന്നലെ വൈകുന്നേരം മുതല് സത്യഗ്രഹം ആരംഭിച്ചു.
സമരത്തിന് പിന്തുണ പ്രഖ്യാപിച്ച് നിരവധി സാമൂഹ്യ-സാസ്ക്കാരിക സംഘടനകളുടെ നേതാക്കള് ഇന്നലെ സമര പന്തല് സന്ദര്ശിച്ചു.
തെക്കന് സുനില്കുമാര് സമരം അവസാനിപ്പിക്കുന്നതിന്റെ ഭാഗമായി സംഘടിപ്പിച്ച ചടങ്ങ് ഹിന്ദു ഐക്യവേദി ജില്ലാ പ്രസിഡണ്ട് കെ.ജി.ബാബു ഉദ്ഘാടനം ചെയ്തു. സ്വാമി സാധുവിനോദ് സുനില് കുമാറിന് നാരങ്ങനീര് നല്കിയാണ് സത്യഗ്രഹം അവസാനിപ്പിച്ചത്. ഇ.പി.കുമാരദാസ് അധ്യക്ഷത വഹിച്ചു. ഇ.ജി.പുതിയോടത്ത്,സതീശ് ചന്ദ്രന് മാസ്റ്റര്, രാജീവന് സസജീവ് പാനൂര്, കവിയൂര് രാഘവന്, സുനി മട്ടന്നൂര്,സുകുമാരന് ചാവശ്ശേരി, രാജന് കൂടാളി തുടങ്ങിയവര് സംസാരിച്ചു.
സമരക്കാരുടെ ആവശ്യങ്ങള് ജില്ലാ കലക്ടറുടെ ശ്രദ്ധയില്പ്പെടുത്താന് കലക്ടറുമായി കൂടികാഴ്ചയ്ക്ക് സമയം അനുവദിച്ചുതരണമെന്ന സമരനേതാക്കളുടെ ആവശ്യം ജില്ലാ ഭരണകൂടം ഇന്നലെയും നിഷേധിച്ചു. സിപിഎം നേതൃത്വത്തിന്റെ നിര്ദ്ദേശത്തിന് വഴങ്ങി ചര്ച്ചയ്ക്ക് തയ്യാറാവാത്ത ജില്ലാ കലക്ടറുടെ നിലപാടില് ജെആര്എസ് പ്രതിഷേധിച്ചു.
ക്ഷേത്രോത്സവത്തിന്റെ സമാപന ദിവസമായ 12 വരെ സമരം നടത്തുമെന്ന് ജെആര്എസ് ഭാരവാഹികള് അറിയിച്ചു. ഉത്സവത്തിന് മുന്നോടിയായ തിരുവായുധമെഴുന്നളളത്ത് ഇന്നലെ ആരംഭിച്ചു. പുലയ സമുദായത്തില്പ്പെട്ട കുടുംബങ്ങളുടെ വീടുകള് ഒഴിവാക്കിയാണ് എഴുന്നളളത്ത് നടത്തുന്നത്. 400ഓളം പുലയ വിഭാഗത്തില്പ്പെട്ട കുടുംബങ്ങള് താമസിക്കുന്ന പ്രദേശത്തെ ഭൂരിപക്ഷം വരുന്ന ജനങ്ങളെ ജാതിയുടെ പേരില് അകറ്റി നിര്ത്തി ഉത്സവം നടത്തുന്നതിനെതിരെ പ്രദേശത്ത് സിപിഎമ്മിനെതിരെ പ്രതിഷേധം ശക്തമായിട്ടുണ്ട്.
