അങ്കമാലി ബൈപ്പാസ് കിറ്റ്‌കോ റിപ്പോര്‍ട്ട് സമര്‍പ്പിച്ചു: കിഫ്ബിയില്‍ ഉള്‍പ്പെടുത്തണമെന്ന് എംഎല്‍എ

അങ്കമാലി:ബൈപാസിന്റെ വിശദമായ പദ്ധതി രൂപരേഖ തയ്യാറാക്കുന്നതിനായി ചുമതലപ്പെടുത്തിയിരുന്ന കിറ്റുകോ അന്തിമ റിപ്പോര്‍ട്ട് സമര്‍പ്പിച്ചതായി എംഎല്‍എ റോജി എം.ജോണ്‍ അറിയിച്ചു. മുന്‍ സര്‍ക്കാരിന്റെ കാലത്താണ് പദ്ധതിയെക്കുറിച്ചു പഠിക്കുന്നതിനും വിശദമായ റിപ്പോര്‍ട്ട് തയ്യാറാക്കുന്നതിനും, സാങ്കേതിക വൈദഗ്ധ്യം ഉള്ള ഏജന്‍സിയായ കിറ്റ്‌കോയെ ചുമതലപെടുത്തിയുരുന്നത്. എന്നാല്‍ വളരെ നാളുകളായി ഇത് നീണ്ടുപോയതിനെ തുടര്‍ന്ന് റിപ്പോര്‍ട്ട് വേഗത്തില്‍ ലഭ്യമാക്കണം എന്ന് എംഎല്‍എ പൊതുമരാമത്തു വകുപ്പ് മന്ത്രി ജി. സുധാകരനെ നേരില്‍കണ്ട് ആവശ്യപ്പെടുകയും മന്ത്രി യുടെ നിര്‍ദ്ദേശപ്രകാരം ആണ് കിറ്റുകോ ഇപ്പോള്‍ റിപ്പോര്‍ട്ട് സമര്‍പ്പിച്ചിരിക്കുന്നതും. കിറ്റ്‌കോ യുടെ പഠനത്തിന്റെ അടിസ്ഥാനത്തില്‍ ദേശീയ പാതയില്‍ കരയാംപറമ്പ് മുതല്‍ നെടുമ്പാശ്ശേരി എയര്‍പോര്‍ട്ട് വരെ 5.92 കിലോമീറ്റര്‍ ബെപാസ്സ് രണ്ടു ഘട്ടങ്ങളിലായിട്ട് നടപ്പിലാക്കാനാണ് നിര്‍ദ്ദേശിച്ചിരിക്കുന്നത്. കരയാംപറമ്പ് മുതല്‍ അങ്കമാലി റെയില്‍വേ സ്‌റ്റേഷന്‍ വരെയുള്ള 3.11 കിലോമീറ്റര്‍ ആദ്യഘട്ടവും ബാക്കി വരുന്ന 2.81 കിലോമീറ്റര്‍ രണ്ടാം ഘട്ടവുമാണ്. ആദ്യഘട്ടത്തിന്റെ സ്ഥലം ഏറ്റെടുപ്പിനായി 153 കോടി രൂപയും നിര്‍മ്മാണ ചെലവായി 210 കോടിരൂപയും മറ്റു അനുബന്ധ ചിലവുകളുമുള്‍പ്പെടെ മൊത്തം 385.62 കോടി രൂപ ചിലവാണ് കണക്കാക്കുന്നത്. ഈ അലൈന്‍മെന്റ് പ്രകാരം 11 കെട്ടിടങ്ങള്‍ മാത്രമാണ് നീക്കം ചെയ്യേണ്ടതായി വരുന്നത്. റെയില്‍വേ സ്‌റ്റേഷന്‍ മുതല്‍ എയര്‍പോര്‍ട്ട് വരെയുള്ള രണ്ടാം ഘട്ടത്തിന്റെ ചെലവ് കണക്കാക്കിയിരിക്കുന്നത് 334 കോടി രൂപയാണ് കഴിഞ്ഞ ബജറ്റില്‍ പ്രഖ്യാപനമുണ്ടായെങ്കിലും അങ്കമാലി ബൈപാസ്സിന് ഇതുവരെയും ഭരണാനുമതി ലഭിക്കാത്ത സാഹചര്യമാണുള്ളത്. ഇക്കാര്യം സംബന്ധിച്ച് റോജി എം.ജോണ്‍ എംഎല്‍എ നിയമസഭയില്‍ സബ്മിഷന്‍ ഉന്നയിച്ചിരുന്നു. അടിസ്ഥാന സൗകര്യ വികസനത്തിനായി സംസ്ഥാന സര്‍ക്കാര്‍ പുതുതായി രൂപീകരിച്ച കേരള ഇന്‍ഫ്രാസ്റ്റ്ക്ട്ര്‍ ഇന്‍വെസ്റ്റ്‌മെന്റ് ഫണ്ട് ബോര്‍ഡ് (കിഫ്ബി) വഴിയാണ് സംസ്ഥാനത്തു പുതിയ റോഡുകളും, പാലങ്ങളും,ബൈപാസ് പദ്ധതികളും നടപ്പിലാക്കുന്നത്. കിഫ്ബിയുടെ മാനദണ്ഡങ്ങള്‍ക്കനുസരിച്ചിട്ടുള്ള ഡിപിആര്‍ ആണ് ഇപ്പോള്‍ കിറ്റുകോ സമര്‍പ്പിച്ചിരിക്കുന്നത്. അതുകൊണ്ട് അങ്കമാലി ബെപാസ്സ് കിറ്റ്‌കോ റിപ്പോര്‍ട്ടിന്റെ അടിസ്ഥാനത്തില്‍ കിഫ്ബിയില് ഉള്‍പ്പെടുത്തി ഭരണാനുമതി നല്‍കാനുള്ള നടപടികള്‍ സംസ്ഥാന സര്‍ക്കാര്‍ സ്വീകരിക്കണമെന്ന് എംഎല്‍എ ആവശ്യപ്പെട്ടു. ദേശീയപാത 47 ഉം, എംസി റോഡും സംഗമിക്കുന്ന അങ്കമാലിയില്‍ ഗതാഗത കുരുക്ക് അതീവ രൂക്ഷമാണ്, പ്രമുഖ തീര്‍ത്ഥാടന കേന്ദ്രങ്ങളായ കാലടിയും, മലയാറ്റൂരും ഉള്‍പ്പെടുന്ന അങ്കമാലി പ്രദേശം അന്തര്‍ദേശീയ വീമാനത്താവളം, മൂന്നാര്‍, തേക്കടി തുടങ്ങിയ വിനോദസഞ്ചാരകേന്ദ്രങ്ങളിലേക്കുള്ള പ്രവേശനകവാടം കൂടിയാണ് അങ്കമാലി ബൈപ്പാസ് കേവലം അങ്കമാലിക്കാരുടെ വിഷയം മാത്രമായി കാണാതെ ഇതിലൂടെ കടന്നു പോകുന്ന ലക്ഷകണക്കിന് യാത്രക്കാരുടെ വിഷയമായിക്കണ്ടു അടിയന്തിര പ്രാധാന്യത്തോടെ പദ്ധതി നടപ്പിലാക്കാന്‍ സര്‍ക്കാര്‍ നടപടി സ്വീകരിക്കണമെന്ന് എംഎല്‍എ ആവശ്യപ്പെട്ടു.