ന്യൂദല്ഹി: ഇന്ത്യന് രാഷ്ട്രീയത്തില് നിന്ന് രാജീവ് ഗാന്ധിയെപ്പോലൊരു വ്യക്തി ഇല്ലാതാവുകയാണെങ്കിലുള്ള സാഹചര്യങ്ങളെ കുറിച്ച്, രാജീവ്ഗാന്ധി വധത്തിന് അഞ്ചു വര്ഷം മുമ്പ് യുഎസ് കേന്ദ്ര ഇന്റലിജന്സ് ഏജന്സി (സിഐഎ)അന്വേഷണം നടത്തിയതായി റിപ്പോര്ട്ട്.
സിഐഎയാണ് ഇതുസംബന്ധിച്ച വിവരങ്ങള് പുറത്തുവിട്ടത്. രാജീവിനുശേഷമുള്ള ഇന്ത്യ എന്ന പേരില് 23 പേജുകളിലാണ് 1986ല് ഈ റിപ്പോര്ട്ട് തയ്യാറാക്കിയത്.
രാജീവ്ഗാന്ധിയുമായി ബന്ധപ്പെട്ട് 1986 ജനുവരി വരെ ലഭിച്ച വിവരങ്ങളുടെ അടിസ്ഥാനത്തില് തയ്യാറാക്കിയ ഈ റിപ്പോര്ട്ട് ഇതുവരെ രഹസ്യമായി സൂക്ഷിച്ചിരിക്കുകയായിരുന്നു. പിന്നീട് അഞ്ചു വര്ഷങ്ങള്ക്കുശേഷം മെയ് 21ന് തമിഴ്നാട്ടില് വെച്ചാണ് രാജീവ് ഗാന്ധി കൊല്ലപ്പെടുന്നത്.
കീ ജഡ്ജ്മെന്റ്സ് എന്ന പേരില് നല്കിയിട്ടുള്ള റിപ്പോര്ട്ടിന്റെ ആദ്യ ഭാഗത്ത് രാജീവ്ഗാന്ധിയുടെ മരണം ദേശീയ, അന്തര്ദേശീയ തലത്തിലും യുഎസുമായുള്ള നയതന്ത്രബന്ധത്തേയും ഏതുവിധത്തില് പ്രതിഫലിക്കുമെന്നും പറയുന്നുണ്ട്.
അതേസമയം വിവിധ മേഖലകളില് നിന്നും വിഘടനവാദികളില് നിന്നും രാജീവ് ഗാന്ധിക്കുള്ള വധ ഭീഷണികളും പ്രതിപാദിക്കുന്നുണ്ട്. രാജീവിന്റെ വധത്തില് കശ്മീരി, സിഖ് വിഭാഗങ്ങള്ക്ക് പങ്കുണ്ടെങ്കില് രാജ്യവ്യാപകമായുള്ള വര്ഗ്ഗീയ കലാപങ്ങള്ക്ക ് ഇത് വഴിവെയ്ക്കുന്നതാണ്. സിഐഎയുടെ റിപ്പോര്ട്ടില് ശ്രീലങ്കയിലെ തമിഴ് വംശജരുമായി ബന്ധപ്പെട്ട പ്രശ്നങ്ങളും രാജീവ്ഗാന്ധി വധിക്കപ്പെടാനുള്ള കാരണമായേക്കാമെന്നും പറയുന്നുണ്ട്. അതേസമയം സ്വാഭാവികം അല്ലെങ്കില് അപകട മരണം സംഭവിച്ചതിനുശേഷമുള്ള അവസ്ഥയും റിപ്പോര്ട്ടിലുണ്ട്.
