ഇരിട്ടി: എടൂര് ഡിവൈന് ആര്ട്സ് & സ്പോര്ട്സ് ക്ലബ്ബിന്റെ നേതൃത്വത്തില് മാര് സെബാസ്റ്റ്യന് വള്ളോപ്പിള്ളി സ്മാരക എവറോളിംഗ് സ്വര്ണകപ്പിനും എടൂര് കുടിയേറ്റ സ്മാരക എവറോളിംഗ് വെള്ളി കപ്പിനും വേണ്ടിയുള്ള രണ്ടാമത് ഉത്തരകേരള വോളിബോള് ടൂര്ണമെന്റ് 30 മുതല് ഫെബ്രുവരി അഞ്ച് വരെ എടൂര് സെന്റ് മേരീസ് ഫ്ളഡ്ലിറ്റ് സ്റ്റേഡിയത്തില് നടക്കുമെന്ന് ഭാരവാഹികള് പത്രസമ്മേളനത്തില് അറിയിച്ചു. ഗാലറിയുടെ നിര്മാണം പൂര്ത്തിയായി. 30 ന് വൈകിട്ട് 6.30 ന് സണ്ണി ജോസഫ് എംഎല്എ ടൂര്ണമെന്റ് ഉദ്ഘാടനം ചെയ്യും. എടൂര് സെന്റ് മേരീസ് ഫൊറോന വികാരി ഫാ.ആന്റണി മുതുകുന്നേല് അധ്യക്ഷത വഹിക്കും. എല്ലാ ദിവസവും വൈകിട്ട് 6.30 ന് ജില്ലാമത്സരവും 7.30 ന് ഉത്തരകേരള മത്സരവും നടക്കും. ഉത്തരകേരള വോളിയില് ഡിവൈന് എടൂര്, ജോളി കാനായി, വൈറ്റ്ലിങ്ക്സ് വയനാട്, യംഗ്സ്റ്റാര് മാതമംഗലം, മെക്ക്ആര്മി കണ്ണൂര്, വിന്നേഴ്സ് നാദാപുരം, യുവധാര പട്ടാനൂര്, ശ്രീനാരായണ വീര്പ്പാട് എന്നീ ടീമുകളും ജില്ലാ വോളിയില് യുവധാര പടപ്പേന്കോട്, എ.കെ.ജി. ഊര്പ്പള്ളി, എം.എം.സി. കൊളപ്പ, ക്രസന്റ് പാലോട്ടുപള്ളി, തപസ്യ വോളി അക്കാദമി വീര്പ്പാട്, വൈ.ബി.സി. ചുഴലി, സിക്സസ് എടൂര്, സെന്റ് ജോര്ജ് വോളി ടീം ചെമ്പന്തൊട്ടി എന്നീ ടീമുകളും മത്സരിക്കും. മാര് വള്ളോപ്പിള്ളിയുടെയും എടൂര് കുടിയേറ്റത്തിന്റെയും സ്മരണ നിലനിര്ത്തികൊണ്ടാണ് സ്വര്ണ, വെള്ളി കപ്പുകള് എവറോളിംഗ് ആയി ഏര്പ്പെടുത്തിയിട്ടുള്ളത്. വിവിധ ടീമുകള്ക്കു വേണ്ടി ദേശീയ, അന്തര്ദേശീയ താരങ്ങളും അണിനിരക്കും. അഞ്ചിന് സമാപനദിവസം തലശേരി ആര്ച്ച് ബിഷപ് മാര് ജോര്ജ് ഞരളക്കാട്ട് സമ്മാനദാനം നടത്തും. ഉത്തരമേഖലയിലെ മത്സരങ്ങളില് മാറ്റുരക്കുന്നവരില് നിന്ന് മികച്ച സെറ്റര്, അറ്റാക്കര്, ലിബറോ എന്നിവര്ക്ക് കാഷ്െ്രെപസും മൊമന്റോയും നല്കും. ജില്ലാതല വോളി ടൂര്ണമെന്റില് വിജയിക്കുന്ന ഒന്നും രണ്ടും സ്ഥാനക്കാര്ക്ക് യഥാക്രമം വര്ഗീസ് റൈട്ടര് മെമ്മോറിയല് എവറോളിങ് ട്രോഫിയും മാവന്നികുന്നേല് കൊച്ചേട്ടന് മെമ്മോറിയല് എവറോളിങ് ട്രോഫിയും നല്കും. സംഘാടകസമിതി ചെയര്മാന് ഡോ. എം.ജെ.മാത്യു, പ്രസിഡന്റ് പി.വി.ജോസഫ്, സെക്രട്ടറി വിപിന് തോമസ്, കണ്വീനര് റോബര്ട്ട് പാംബ്ലാനി, തോമസ് അപ്പക്കോട്ട് എന്നിവര് പത്രസമ്മേളനത്തില് പങ്കെടുത്തു.
എടൂരില് മാര് വള്ളോപ്പള്ളി സ്മാരക ഉത്തരകേരള വോളിബോള് ടൂര്ണമെന്റ് 30 മുതല്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.