മങ്കൊമ്പ്: നിര്മാണം ആരംഭിച്ച് ആറുവര്ഷങ്ങള്ക്കുശേഷവും ചമ്പക്കുളം പാലത്തിന്റെ നിര്മാണം ഇഴയുന്നു. ഡിസംബറില് പാലം സഞ്ചാരയോഗ്യമാക്കുമെന്ന എംഎല്എയുടെ പ്രഖ്യാപനവും പാഴായി.
ഏറെനാള് മുടങ്ങിക്കിടന്ന പാലത്തിന്റെ നിര്മാണപ്രവര്ത്തനങ്ങള് എംഎല്എയുടെ പ്രഖ്യാപനത്തെത്തുടര്ന്ന് ആറുമാസം മുമ്പാണ് പുനരാരംഭിച്ചത്. 2010 മാര്ച്ച് 12നു തറക്കല്ലിട്ട പാലത്തിന്റെ അപ്രോച്ച് റോഡുകള് മാത്രമാണ് ഇനിയും പൂര്ത്തിയാകാനുള്ളത്. രണ്ടുവര്ഷത്തിനുള്ളില് പണികള് പൂര്ത്തിയാക്കാന് ലക്ഷ്യമിട്ട പാലംപണികള് രണ്ടരവര്ഷമായപ്പോള് മുടങ്ങുകയായിരുന്നു.
കിഴക്കേക്കരയിലെ ഒരു സ്പാനും അപ്രോച്ച് റോഡുകളും അവശേഷിക്കെ പണികള് മുടങ്ങിയതിനെത്തുടര്ന്നു കരാറുകാരനെ നീക്കിയിരുന്നു. കുറഞ്ഞ തുകയ്ക്കു കരാര് ഏറ്റെടുത്ത കരാറുകാരന് കടുത്ത സാമ്പത്തികപ്രതിസന്ധി നേരിട്ടതായിരുന്നു പണികള് മുടങ്ങാന് കാരണമായത്. തുടര്ന്നു എംഎല്എ ഇടപെട്ട് പുതിയ കരാറുകാരനെ പണികള് ഏല്പ്പിക്കുകയായിരുന്നു.
എന്നാല് ശേഷിക്കുന്ന ഒരു സ്പാന് പൂര്ത്തിയാക്കാന് മാത്രമാണ് കഴിഞ്ഞിട്ടുള്ളത്. അപ്രോച്ച് റോഡിനാവശ്യമായ ഡിസൈന് പൂര്ത്തിയായതായി പൊതുമരാമത്ത് വകുപ്പിലെ ഉന്നത ഉദ്യോഗസ്ഥര് പറഞ്ഞു. തയാറാക്കിയ ഡിസൈനിനനുസരിച്ച് എസ്റ്റിമേറ്റ് തയാറാക്കുന്ന ജോലികളാണ് ഇനി അവശേഷിക്കുന്നത്. എസ്റ്റിമേറ്റ് തയാറാക്കിയാല് പണികള് പൂര്ത്തിയാക്കാന് കരാറുകാരന് തയാറാണെന്നും ഉദ്യോഗസ്ഥര് പറയുന്നു.
ആരംഭത്തില് നബാര്ഡ് പദ്ധതിയില് ഉള്പ്പെടുത്തി പാലം നിര്മിക്കാനുള്ള പദ്ധതികള് പരാജയപ്പെട്ടതിനെത്തുടര്ന്നു മോന്സ് ജോസഫ് പൊതുമരാമത്ത് മന്ത്രിയായിരിക്കെയാണ് പാലത്തിനു അനുമതിയായത്. 12.5 കോടി തുകയനുവദിച്ചെങ്കിലും 11.5 കോടി രൂപയ്ക്കു ആദ്യത്തെ കരാറുകാരന് പണി ഏറ്റെടുക്കുകയായിരുന്നു. പാലം പണി പൂര്ത്തിയായാല് ആലപ്പുഴ–ചങ്ങനാശേരി റോഡില്നിന്നും ദേശീയപാതയിലേക്ക് എളുപ്പത്തിലെത്താനാകും. ആറിനു ഇരുകരകളിലുമുള്ള പ്രദേശങ്ങളുടെ വികസനവും ഇതിലൂടെ സാദ്ധ്യമാകും.
