ഹരിപ്പാട്: രാജ്യത്തിനുവേണ്ടി വീരമൃത്യു വരിച്ച സന്തോഷ്കുമാറിനെപ്പോലുള്ള ധീരന്മാര്ക്ക് ഒരിക്കലും മരണമില്ല. നാട് എപ്പോഴും അവരെ സ്മരിച്ചുകൊണ്ടിരിക്കുമെന്നും ബിജെപി സംസ്ഥാന പ്രസിഡന്റ് കുമ്മനം രാജശേഖരന് പറഞ്ഞു. ധീരജവാന് എന്. സന്തോഷ്കുമാര് സ്മരക സമിതി കരുവാറ്റയില് സംഘടിപ്പിച്ച വീരമൃത്യുദിനാചരണം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ധീരന്മാര് പ്രവര്ത്തിക്കുന്നത് നാടിനുവേണ്ടിയാണ്. ഊണിലും ഉറക്കത്തിലും നാടിന്റെ ഹൃദയസ്പന്ദനം അവരിലുണ്ടാകും. ജീവത്യാഗം ചെയ്തവരുടെ ഓര്മ്മകള് നാട് നിലനിര്ത്തും. ജീവിച്ചിരിക്കുമ്പോള് എല്ലാവരും അറിയും. സ്വാര്ത്ഥമതികളാകാതെ നാടിനുവേണ്ടിയും മറ്റുള്ളവര്ക്കുവേണ്ടിയും ജീവിച്ചാല് എന്നും സ്മരിക്കപ്പെടും. നാടിനുവേണ്ടി ചിന്തിക്കുന്നത് ഈശ്വരീയമാണ്. ഭാരതം കേവലം ഒരുപിടി മണ്ണല്ല. രാഷ്ട്രത്തിനുവേണ്ടിമരിക്കുന്നത് സമാധിയായി കണ്ടവരാണ് നമ്മുടെ പൂര്വ്വികര്. ദേശീയഗാനത്തെ അപമദിച്ചാല് അഭിമാനം കൊള്ളുന്നവര് നമ്മുടെ നാട്ടിലുണ്ട്. ഇതിനെ ചെറുത്ത് തോല്പ്പിക്കാന് നാടിനോട് പ്രതിബദ്ധതയുള്ള സമൂഹം ഉണ്ടാകണമെന്ന് അദ്ദേഹം പറഞ്ഞു. സന്തോഷ്കുമാറിന്റെ മാതാവ് സരസമ്മ ചടങ്ങില് അദ്ധ്യക്ഷത വഹിച്ചു.
എക്സ് സര്വ്വീസ് ലീഗ് ജില്ലാ സെക്രട്ടറി പി. ഗോപിനാഥന് നായര്, യൂണിറ്റ് പ്രസിഡന്റ് ശങ്കരക്കുറുപ്പ്, ആര്എസ്എസ് ശബരിഗിരി വിഭാഗ് കാര്യകാരി സദസ്യന് എം.ആര്. പ്രസാദ്, ജെ. മഹാദേവന്, ഗിരീഷ്കുമാര്, മൈമുനത്ത് ബീവി എന്നിവര് സംസാരിച്ചു. സന്തോഷ്കുമാര് സ്മാരക സമിതി സെക്രട്ടറി എന്. പത്മകുമാര് സ്വാഗതവും എന്. സുരേഷ്കുമാര് കൃതജ്ഞതയും രേഖപ്പെടുത്തി. കരുവാറ്റയിലെ വിവിധ വിദ്യാലയങ്ങളില് നിന്നും വിദ്യാര്ത്ഥികളും അദ്ധ്യാപകരും നാട്ടുകാരും സന്തോഷ്കുമാര് സ്മൃതിമണ്ഡപത്തിലെത്തി പുഷ്പാര്ച്ചന നടത്തി.
