തുറവൂര്: പഞ്ചായത്തുകളിലേയും, ഇതിനു കീഴില് വരുന്ന മുഴുവന് സ്ഥാപനങ്ങളിലേയും താല്കാലിക ജീവനക്കാരെ അനധികൃതമായി നിയമിക്കുന്നതായി ആക്ഷേപം നിലവിലുണ്ടായിരുന്ന കരാര് ജീവനക്കാരെ മുഴുവന് പിരിച്ചുവിട്ട ശേഷം പഞ്ചായത്തു ഭരിക്കുന്ന പാര്ട്ടിക്കാരേയും ഇവരുടെ ബന്ധുക്കളേയും നിയമിക്കുന്നതായാണ് ആക്ഷേപം ഉയര്ന്നിരിക്കുന്നത്.
പേരിന് പത്രങ്ങളിലും മറ്റും പരസ്യം നല്കിയതിനു ശേഷം പ്രഹസനത്തിന് ഇന്റര്വ്യു നടത്തുകയും തങ്ങള് മുന്കൂട്ടി നിശ്ചയിച്ചവരെ നിയമിക്കുകയുമാണ് ചെയ്യുന്നത്. പ്രതിപക്ഷം നിര്ദ്ദേശിക്കുന്ന ഒരാള്ക്കും നിയമനം നല്കുന്നതോടെ അനധികൃത നിയമനത്തിനെതിരെയുള്ള പ്രതിഷേധവും ഇല്ലാതാകുന്നു. ആയിരക്കണക്കിനു ഉദ്യോഗാര്ഥികള് എംപ്ലോയിമെന്റ് എക്സേഞ്ചില് പേരുരജിസ്റ്റര് ചെയ്തു ജോലിക്കായി കാത്തു നില്ക്കുമ്പോഴാണ് രാഷ്ര്ടിയ നേതൃത്വത്തിന്റെ ഇത്തരത്തിലുള്ള പിന്വാതില് നിയമനം.
യാതൊരു വിധ പ്രായോഗിക പരിചയമോ പ്രവൃത്തി പരിചയമോ ഇല്ലാത്തവരേയാണ് ഇത്തരത്തില് നിയമിക്കുന്നത്. ആരോഗ്യരംഗത്തു ഇതുമായി ബന്ധപ്പെട്ട യോഗ്യത ഉള്ളവരെ മാത്രമേ നിയമിക്കാന് പാടുള്ളു എന്നിരിക്കെ പഞ്ചയത്തിനു കീഴില് വരുന്ന ആയുര്വേദ, ഹോമിയോ, സിദ്ധാ ആശുപത്രികളിലേക്കു യാതൊരു വിധയോഗ്യതയും ഇല്ലാത്തവരാണ് രാഷ്ര്ടിയ സ്വാധീനത്തില് നിയമിക്കപ്പെടുന്നത്.
പലപ്പോഴും ഇത്തരത്തില് അനധികൃതമായി നിയമിക്കപ്പെടുന്നവരാണ് രോഗികള്ക്കു മരുന്നു നല്കുന്നതും തിരുമ്മു ചികിത്സ നടത്തുന്നതും. ഇതു ആരോഗ്യരംഗത്ത് വന് ദോഷമാണ് ഉണ്ടാക്കുന്നത്. പഞ്ചായത്ത് ഓഫീസിലെ വിവിധ തസ്തികകളിലേക്കും ആവശ്യമായ വിദ്യാഭ്യാസ യോഗ്യതയില്ലാത്തവരേയുമാണ് നിയമിക്കുന്നതെന്നും ആക്ഷേപമുണ്ട്.
ഇത്തരത്തില് അനധികൃതമായി നിയമിച്ച മുഴുവന് ആളുകളേയും പിരിച്ചുവിട്ട് എംപ്ലോയിമെന്റ് എക്സ്ചേഞ്ചില് പേര് രജിസ്റ്റര് ചെയ്തിട്ടുള്ളവരെ നിയമിക്കണമെന്ന ആവശ്യം ശക്തമാക്കുന്നു.
