ആലപ്പുഴ: സംസ്ഥാന സര്ക്കാരിന്റെ ജനദ്രോഹ നടപടികളില് പ്രതിഷേധിച്ച് ബിജെപി സംസ്ഥാന ജനറല് സെക്രട്ടറിമാരായ എം.ടി. രമേശ്, ശോഭാ സുരേന്ദ്രന് എന്നിവര് നയിക്കുന്ന പ്രചാരണ യാത്രകള്ക്ക് ജില്ലയില് ഉജ്ജ്വല വരവേല്പ് നല്കുമെന്ന് ജില്ലാ പ്രസിഡന്റ് കെ. സോമന് പത്രസമ്മേളനത്തില് അറിയിച്ചു. റേഷനരി നിഷേധം, സഹകരണ പ്രതിസന്ധി, കൊലപാതക രാഷ്ട്രീയം എന്നീ വിഷയങ്ങള് ഉയര്ത്തിക്കാട്ടിയാണ് ബിജെപി യാത്രകള് നടത്തുന്നത്.
എം.ടി. രമേശ് നയിക്കുന്ന യാത്ര എട്ടിന് വൈകിട്ട് നാലിന് ചെങ്ങന്നൂരിലെത്തിച്ചേരും. തുടര്ന്ന നടക്കുന്ന സമ്മേളനം ബിജെപി മുതിര്ന്ന നേതാവ് ഒ. രാജഗോപാല് എംഎല്എ ഉദ്ഘാടനം ചെയ്യും. ഒന്പതിന് രാവിലെ ഒന്പതിന് കുട്ടനാട്ടിലെ മങ്കൊമ്പ്, 10.30ന് ഹരിപ്പാട് താലൂക്കാശുപത്രിക്കു സമീപം, 11.30ന് കായകുളം പാര്ക്ക് മൈതാനം, വൈകിട്ട് മൂന്നിന് മാവേലിക്കരയിലെ ചാരുംമൂട് എന്നിവിടങ്ങളിലാണ് സ്വീകരണം നല്കുക. ബിജെപി സംസ്ഥാന വക്താവ് ജെ.ആര്. പത്മകുമാര്, സംസ്ഥാന സെക്രട്ടറിമാരായ വി. ശിവന്കുട്ടി, രാജി പ്രസാദ്, പട്ടികജാതി മോര്ച്ച സംസ്ഥാന പ്രസിഡന്റ് അഡ്വ. പി. സുധീര്, ഒബിസി മോര്ച്ച സംസ്ഥാന പ്രസിഡന്റ് പുഞ്ചക്കരി സുരേന്ദ്രന് എന്നിവരാണ് യാത്രയിലെ സ്ഥിരാംഗങ്ങള്.
ശോഭാ സുരേന്ദ്രന് നയിക്കുന്ന പ്രചാരണ യാത്രയ്ക്ക് 12ന് വൈകിട്ട് അഞ്ചിന് അരൂര് മണ്ഡലത്തില് സ്വീകരണം നല്കും. തുറവൂര് ക്ഷേത്രത്തിനു സമീപമാണ് പരിപാടി. ആറിന് ചേര്ത്തല മുനിസിപ്പല് മൈതാനം, ഏഴിന് ആലപ്പുഴ വീരയ്യ കോമ്പൗണ്ട് എന്നിവിടങ്ങളില് സ്വീകരണം നല്കും. ആലപ്പുഴയിലെ സ്വീകരണ പരിപാടിയില് ബിജെപി മുന് സംസ്ഥാന അദ്ധ്യക്ഷന് വി. മുരളീധരന് പങ്കെടുക്കും. സംസ്ഥാന വൈസ് പ്രസിഡന്റ് പി.എം. വേലായുധന്, സംസ്ഥാന വക്താവ് അഡ്വ. ജയസൂര്യന് പാലാ, കര്ഷക മോര്ച്ച സംസ്ഥാന പ്രസിഡന്റ് പി.ആര്. മുരളീധരന്, ബിജപി സംസ്ഥാന വൈസ് പ്രസിഡന്റ് ജോര്ജ് കുര്യന്, മഹിളാ മോര്ച്ച സംസ്ഥാന പ്രസിഡന്റ് രേണു സുരേഷ് എന്നിവരാണ് യാത്രയിലെ സ്ഥിരാംഗങ്ങള്. യാത്രയെ വരവേല്ക്കാനുള്ള എല്ലാവിധ ഒരുക്കങ്ങളും പൂര്ത്തിയായിക്കഴിഞ്ഞു. ഗൃഹസമ്പര്ക്കം ആരംഭിച്ചതായും അദ്ദേഹം പറഞ്ഞു. യാത്രയുടെ കോ- ഓഡിനേറ്റര്മാരും ജില്ലാ വൈസ് പ്രസിഡന്റുമാരുമായ പാലമുറ്റത്ത് വിജയകുമാര്, കൊട്ടാരം ഉണ്ണികൃഷ്ണന് എന്നിവരും പത്രസമ്മേളനത്തില് പങ്കെടുത്തു.
