പള്ളിപ്പുറം: പള്ളിപ്പുറം കടവില് മഹാലക്ഷ്മി ക്ഷേത്രത്തില് നടന്നുവരുന്ന കനകധാരായജ്ഞത്തില് പങ്കുകൊള്ളുവാന് കേരളത്തിന് പുറമേ തമിഴ്നാട്ടില് നിന്നും ഭക്തരെത്തുന്നു. കഴിഞ്ഞദിവസം തിരുനെല്വേലിയില് നിന്നെത്തിയ സംഘത്തെ ദേവസ്വം മാനേജര് ഡി. മധുവിന്റെ നേതൃത്വത്തില് ദേവിയുടെ ചിത്രം നല്കി സ്വീകരിച്ചു. യജ്ഞം ആറുനാള് പിന്നിട്ടതോടെ കൂടുതല് ഭക്തര് ക്ഷേത്രത്തിലേക്ക് എത്തുന്നുണ്ട്. യജ്ഞവേദിയില് വെള്ളിയാഴ്ച ദര്ശനപ്രാധാന്യമേറിയ അഷ്ടദ്രവ്യമഹാഗണപതിഹോമം നടക്കും. രാവിലെ 5.30 മുതല് തുടങ്ങുന്ന അഷ്ടദ്രവ്യമഹാഗണപതിഹോമത്തിന് സൂര്യകാലടി സൂര്യന് പരമേശ്വരന് നമ്പൂതിരിപ്പാട് മുഖ്യകാര്മ്മികത്വം വഹിക്കും. ശനിയാഴ്ച ക്ഷേത്രം തന്ത്രി മോനാട്ട് ഇല്ലത്ത് കൃഷ്ണന് നമ്പൂതിരിയുടെ മുഖ്യകാര്മ്മികത്വത്തില് മഹാശനീശ്വരപൂജയും നവഗ്രഹപൂജയും നടക്കും.
കനകധാരായജ്ഞവും ദശലക്ഷാര്ച്ചനയും 25ന് സമാപിക്കും. 25ന് യജ്ഞവേദിയില് അനിരുദ്ധന് അടിക്കത്തായരുടെ മുഖ്യകാര്മ്മികത്വത്തില് നവാവരണ ശ്രീചക്രപൂജയും നടക്കും. ഇതിന്റെ ഭാഗമായി നടക്കുന്ന പന്ത്രണ്ടുകളഭം 26നും സമാപിക്കും. യജ്ഞത്തിന്റെ ഭാഗമായി നല്കുന്ന വെള്ളിനെല്ലിക്ക ബുക്കിങ് ദേവസ്വം കൗണ്ടറില് തുടരുകയാണ്.
