കോടി അര്ച്ചനയുടെ ഭാഗമായി നടന്ന
സാംസ്ക്കാരിക സമ്മേളനത്തില് കവിയൂര് പൊന്നമ്മ ഭദ്രദീപം കൊളുത്തുന്നു
കണ്ണൂര്: ചൊവ്വ മഹാശിവക്ഷേത്രത്തില് നടക്കുന്ന കോടി അര്ച്ചനയുടെ ഭാഗമായി നടന്ന സാംസ്ക്കാരിക സമ്മേളനം കാസര്കോട് എളനീര്മഠം മഠാധിപതി സ്വാമി കേശവാനന്ദഭാരതി ഉദ്ഘാടനം ചെയ്തു. സിനിമാതാരം കവിയൂര്പൊന്നമ്മ സംബന്ധിച്ചു. ചടങ്ങില് സ്വാഗതസംഘം ചെയര്മാന് കെ.സജീവന് അധ്യക്ഷത വഹിച്ചു. തന്ത്രി തെക്കിനിയേടത്ത് തരണനെല്ലൂര് പത്മനാഭനുണ്ണി നമ്പൂതിരിപ്പാട്, ട്രസ്റ്റി രവീന്ദ്രവര്മ്മ രാജ എന്നിവര് അനുഗ്രഹഭാഷണം നടത്തി. കോടിയാര്ച്ചനയോടനുബന്ധിച്ച് രണ്ടാം യജ്ഞവേദിയില് മഹാമൃത്യുഞ്ജയ ഹോമം, അഷ്ടദ്രവ്യ ഗണപതിഹോമം, ഭഗവതിസേവ, ഉമാമഹേശ്വര പൂജ, ഏകവില്വാര്പ്പണം തുടങ്ങി പ്രത്യേക പൂജകള് നടക്കും. കൂടാതെ യജ്ഞ വേദിയില് 26 ദിവസവും പൂജിച്ച അതിശ്രേഷ്ഠമായ സ്വര്ണ്ണം, വെളളി ലോക്കറ്റുകള് ആവശ്യമുളള ഭക്തര്ക്ക് വിതരണം ചെയ്യും.
