മഞ്ഞയെ പേടിയില്ലെന്ന് മൊളിന്യോ; ലക്ഷ്യം കിരീടമെന്ന് കൊപ്പല്‍

കൊച്ചി: ആരാധകരുടെ പ്രതീക്ഷക്കൊത്ത പ്രകടനം നടത്തി ഐഎസ്എല്‍ കിരീടം നേടുക എന്നതില്‍ കുറഞ്ഞൊന്നും പ്രതീക്ഷിക്കുന്നില്ലെന്ന് ബ്ലാസ്‌റ്റേഴ്‌സിന്റെ കോച്ച് സ്റ്റീവ് കൊപ്പല്‍. ആരാധകര്‍ ആഗ്രഹിക്കുന്നതും അതാണ്.

സ്‌റ്റേഡിയം നിറഞ്ഞുകവിയുന്ന ആരാധകരുടെ പിന്തുണ ബ്ലാസ്‌റ്റേഴ്‌സിന് ഏറെ ഗുണം ചെയ്യുമെന്ന് കരുതുന്നത്. ഈ യാഥാര്‍ത്ഥ്യം ഉള്‍ക്കൊണ്ടാണ് ഇരു ടീമുകളും കളത്തിലിറങ്ങുക. എന്നാല്‍ കാണികളുടെ നിര്‍ലോഭമായ പിന്തുണ കൊണ്ട് ഗോള്‍ നേടാന്‍ കഴിയില്ല. അതേപോലെ ഗോള്‍ എതിരെ വീഴുന്നതു തടയാനും കഴിയില്ല. മികച്ച കളി പുറത്തെടുക്കുകയെന്നതിനാണ് ശ്രമമെന്നും കൊപ്പല്‍ കൂട്ടിച്ചേര്‍ത്തു.

കാണികളുടെ പിന്തുണ ഉണ്ടായിരുന്നിട്ടുപോലും കഴിഞ്ഞ സീസണിലെ ഫൈനലില്‍ ഗോവ ചെന്നൈയിന്‍ എഫ്‌സിയോട് തോറ്റത് ഉദാഹരണമായി കാണേണ്ടതാണ്. ആദ്യ സീസണില്‍ ഫൈനലില്‍ കൊല്‍ക്കത്തയോട് തോല്‍ക്കേണ്ടിവന്നതിന്റെ ഓര്‍മ്മകളും ബ്ലാസ്റ്റേഴ്സിനുണ്ട്. നിഷ്പക്ഷവേദി എന്നതിനപ്പുറം കിക്കോഫിനു ശേഷം ഗ്യാലറിക്ക് മത്സരത്തില്‍ ഒരു സ്വാധീനവും ഇല്ലെന്നും കോപ്പല്‍ പറഞ്ഞു.

സ്വന്തം ഗ്രൗണ്ടില്‍ കാണികളുടെ പിന്തുണ ബ്ലാസ്‌റ്റേഴ്‌സിനുണ്ടെങ്കിലും അതിനെ ഭയപ്പെടുന്നില്ലെന്ന് അത്‌ലറ്റിക്കോ ഡി കൊല്‍ക്കത്തയുടെ കോച്ച് ഫ്രാന്‍സിസ്‌കോ മൊളീന്യോ പറഞ്ഞു. മഞ്ഞക്കുപ്പായക്കാരായ 60000 കാണികള്‍ക്കിടയില്‍ കളിക്കുന്നത് മികച്ച അനുഭവമായിരിക്കും. അത് സന്തോഷമുണ്ടാക്കുന്നതാണ്. മികച്ച ടീമാണ് ബ്ലാസ്‌റ്റേഴ്‌സ്. ഒപ്പം ആരാധകരുടെ പിന്തുണയുമുണ്ട്. മത്സരം കടുക്കുമെങ്കിലും കപ്പുയര്‍ത്തുകയാണ് ലക്ഷ്യം. ആരോണ്‍ ഹ്യൂസും ഹെങ്ബര്‍ട്ടും ജിംഗാനും ഉള്‍പ്പെട്ട ബ്ലാസ്‌റ്റേഴ്‌സിന്റെ പ്രതിരോധനിര അതിശക്തമാണ്. ഇവരെ മറികടന്ന് ഗോള്‍ നേടുക വെല്ലുവിളിയാണ്. ബ്ലാസ്‌റ്റേഴ്‌സിനെതിരെ ഇയാന്‍ ഹ്യൂം ഇതുവരെ ഗോള്‍ നേടിയിട്ടില്ലെന്ന ആക്ഷേപം ഇന്ന് ഇല്ലാതാകുമെന്നും മൊളീന്യോ പറഞ്ഞു.

അതേസമയം, കാണികളുടെ വന്‍ പിന്തുണ തങ്ങള്‍ക്ക് തലവേദന ഉണ്ടാക്കുമെന്ന കാര്യത്തില്‍ തര്‍ക്കമില്ലെന്നു അത്‌ലറ്റികോ കൊല്‍ക്കത്തയുടെ മാര്‍ക്വീതാരം ഹെല്‍ഡര്‍ പോസ്റ്റിഗ പറഞ്ഞു. ഫൈനല്‍ കാണുന്നതിനു ബ്ലാസ്റ്റേഴ്സിന്റെ ആരാധകരുടെ ഒരു പട തന്നെ പ്രതീക്ഷിക്കുന്നു. ഐഎസ്എല്ലിലെ ഏറ്റവും ഗംഭീര അന്തരീക്ഷമാണ് കൊച്ചിയിലേതെന്നും ഇവിടെ കളിക്കുമ്പോഴാണ് ബ്ലാസറ്റേഴ്സ് എത്ര കടുപ്പമേറിയ ടീമാണെന്നു കാണുവാനാകുന്നതെന്നും അദ്ദേഹം പറഞ്ഞു.