ന്യൂദല്ഹി: വീട്ടുജോലിക്കാരിയ്ക്ക് കുറഞ്ഞ വേതനം നല്കി വിവാദത്തിലായ ദേവയാനി ഖൊബ്രഗഡെ എന്ന ഇന്ത്യന് നയതന്ത്രജ്ഞ സാഹിത്യരംഗത്തും സാന്നിധ്യം അറിയിച്ചു. ദ വൈറ്റ്സാരി എന്ന പുസ്തകവുമായാണ് ദേവയാനി സാഹിത്യരംഗത്തേക്ക് കടന്ന് വരുന്നത്.
രത്ന എന്ന ദളിത് പെണ്കുട്ടിയുടെ പ്രണയകഥയാണ് വെള്ളസാരിയിലെ പ്രതിപാദ്യം.
ജാതിയിലെ ഉച്ചനീചത്വങ്ങളില് പെട്ട് അവളുടെ പ്രണയം പൊലിയുകയാണ്. ഇവളുടെ ദേഷ്യവും വേദനയും ഉത്കണ്ഠകളും പുസ്തകത്തില് വരച്ച് കാട്ടുന്നു. ജാതിയുടെ കെട്ടുപാടുകള് വലിച്ച് പൊട്ടിച്ച് സ്വതന്ത്രയാകാന് അവള് ശ്രമിക്കുകയാണ്. പുസ്തകം ഇന്റര്നെറ്റില് ലഭ്യമാണ്.
ന്യൂയോര്ക്കിലെ ഇന്ത്യന് സ്ഥാനപതിയായിരിക്കെ വീസയില് കൃത്രിമത്വം കാട്ടിയതിന് 2013ല് അമേരിക്ക ദേവയാനിയ്ക്കെതിരെ കേസെടുത്തിരുന്നു. വീസ അപേക്ഷയില് ഇവര് തെറ്റായ വിവരങ്ങള് നല്കിയിരുന്നുവെന്നും അമേരിക്ക ആരോപിച്ചു. ഇന്ത്യാക്കാരിയായ വീട്ടുജോലിക്കാരിയ്ക്ക് നിയമപരമായ വേതനത്തിലും കുറവാണ് നല്കിയിരുന്നത് എന്നതിന്റെ പേരിലും ഇവരുടെ പേരില് വിവാദമുണ്ടായിരുന്നു.
മകളെ സ്കൂളിലാക്കി മടങ്ങി വരും വഴിയാണ് ഇവരെ അറസ്റ്റ് ചെയ്തത്. തുടര്ന്ന് ശാരീരിക പരിശോധനയും നടത്തി. ഇന്ത്യ-അമേരിക്ക നയതന്ത്ര ബന്ധത്തില് ഏറെ വിളളല് വീഴ്ത്തിയ സംഭവമായിരുന്നു ഇത്. മാധ്യമങ്ങള്ക്ക് അനുമതിയില്ലാതെ അഭിമുഖം നല്കിയതിന്റെ പേരില് 2014 ഡിസംബറില് ദേവയാനിയെ നിര്ബന്ധിത അവധിയില് പ്രവേശിപ്പിച്ചു. നിലവില് വിദേശകാര്യമന്ത്രാലയത്തിലെ ഡയറക്ടറാണ് ദേവയാനി.
