ചേര്ത്തല: ലൈസന്സില്ലാതെ പ്രവര്ത്തിച്ച ബിവറേജസ് മദ്യവില്പ്പന ശാല നഗരസഭ അധികൃതര് അടച്ചുപൂട്ടി നോട്ടീസ് പതിച്ചു. വടക്കേ അങ്ങാടി കവലക്ക് കിഴക്ക് വടക്ക് ഭാഗത്ത് ഇടറോഡിന് അഭിമുഖമായുള്ള വില്പ്പന ശാലയാണ് ഇന്നലെ വൈകിട്ട് പൂട്ടിച്ചത്.
നഗരസഭയുടെ ലൈസന്സില്ലാതെ പ്രവര്ത്തിച്ച സ്ഥാപനം പൂട്ടാന് കഴിഞ്ഞ ദിവസം നിര്ദ്ദേശം നല്കിയിരുന്നു. കാലങ്ങളായി സ്ഥാപനം ലൈസന്സില്ലാതെയാണ് പ്രവര്ത്തിച്ചിരുന്നത്. ലൈസന്സിനായി ബിവറേജസ് കോര്പ്പറേഷന് അധികൃതര് അപേക്ഷ നല്കിയെങ്കിലും നിയമപ്രകാരം ആവശ്യമായ രേഖകള് ഇല്ലാത്തതിനാല് നഗരസഭ തള്ളുകയായിരുന്നു. ഇതിനെതിരെ കോടതിയെ സമീപിച്ച ബിവറേജസ് അധികൃതര് അപേക്ഷ നഗരസഭയുടെ പരിഗണനയിലാണെന്ന വാദമുന്നയിച്ചാണ് പ്രവര്ത്തിച്ചിരുന്നത്.
നഗരസഭ അധികാരികള് നിയമപരമായല്ല സ്ഥാപനം പ്രവര്ത്തിക്കുന്നതെന്ന് ബോധ്യപ്പെടുത്തിയതോടെയാണ് ബിവറേജസിന്റെ ആവശ്യം കോടതി തള്ളിയത്. തുടര്ന്ന് കൗണ്സില് യോഗം ചേര്ന്ന് സ്ഥാപനത്തിന്റെ പ്രവര്ത്തനം നിര്ത്തിക്കാന് തീരുമാനിക്കുകയായിരുന്നു.
