കോട്ടയം: തണ്ണീര്തട സംരക്ഷണ നിയമം 2015-ല് സര്ക്കാര് പിന്വലിച്ചിട്ടുണ്ടെങ്കില് സര്ക്കാര് ഉത്തരവാക്കാന് ചീഫ് സെക്രട്ടറി അതിവേഗത്തില് നടപടി കൈക്കൊള്ളണമെന്ന് സംസ്ഥാന മനുഷ്യാവകാശ കമ്മീഷന്.
കോട്ടയം കാണക്കാരി പഞ്ചായത്തില് താമസിക്കുന്ന ലൂസി ലൂക്കോസിന്റെ വീടിന് ഓണര്ഷിപ്പ് സര്ട്ടിഫിക്കേറ്റും നമ്പരും ലഭിക്കാത്തതിനാല് വൈദ്യുതി കണക്ഷന് ലഭിച്ചില്ലെന്ന പരാതിയിലാണ് കമ്മീഷന് അംഗം കെ. മോഹന്കുമാറിന്റെ ഉത്തരവ്.
കമ്മീഷന് പഞ്ചായത്ത് സെക്രട്ടറിയില് നിന്നും വിശദീകരണം ആവശ്യപ്പെട്ടിരുന്നു. നിയമാനുസൃതം അനുമതി വാങ്ങിയല്ല കെട്ടിടം നിര്മ്മിച്ചതെന്നും വീടിന് കേരള നെല്വയല് തണ്ണീര്തട സംരക്ഷണ നിയമത്തിന്റെ (2008) 14-ാം വകുപ്പു പ്രകാരം അനുമതി നല്കാന് പാടില്ലെന്നും പറയുന്നു. 2016 ഏപ്രില് 19 ലെ ഉത്തരവ് പ്രകാരം നിര്മ്മാണാനുമതി നല്കണമെങ്കില് കേരള ഭൂവിനിയോഗ ഉത്തരവ് പ്രകാരം ജില്ലാ കളക്ടര് അനുമതി നല്കണം. 2015 ലെ നെല്വയല് തണ്ണീര്തട നിയമ പ്രകാരമുള്ള കളക്ടറുടെ ക്രമവത്കരിച്ച ഉത്തരവ് ഹാജരാക്കാന് നിര്ദ്ദേശിച്ചിട്ടുണ്ടെന്നും അനുമതി ലഭ്യമായാല് തുടര് നടപടി സ്വീകരിക്കുമെന്നും റിപ്പോര്ട്ടില് പറയുന്നു.
തുടര്ന്ന് കമ്മീഷന് ജില്ലാകളക്ടറില് നിന്നും വിശദീകരണം ആവശ്യപ്പെട്ടു. തണ്ണീര്തട സംരക്ഷണ നിയമം 2015-ല് പിന്വലിച്ചതായി സര്ക്കാര് പ്രഖ്യാപിച്ചെങ്കിലും സര്ക്കാറില് നിന്നും ഉത്തരവ് ലഭിച്ചാല് മാത്രമേ പരാതി വിഷയത്തിനു ജില്ലാകളക്ടര്ക്ക് തീരുമാനമെടുക്കാന് കഴിയുകയുള്ളൂവെന്നും കളക്ടര് കമ്മീഷനെ അറിയിച്ചു.
സര്ക്കാര് ഉത്തരവ് പുറപ്പെടുവിക്കുന്ന മുറക്ക് ജില്ലാകളക്ടറും ഗ്രാമപഞ്ചായത്തും പരാതിക്കാരിയുടെ വീടിന് നമ്പരും ഓണര്ഷിപ്പ് സര്ട്ടിഫിക്കേറ്റും നല്കണമെന്ന് കമ്മീഷന് നിര്ദ്ദേശിച്ചു. ഉത്തരവ് ചീഫ് സെക്രട്ടറിക്കും കാണക്കാരി ഗ്രാമപഞ്ചായത്ത് സെക്രട്ടറിക്കും അയച്ചു.
