ചാരുംമൂട്: വള്ളികുന്നം ഇലിപ്പക്കുളം നാമ്പുകുളങ്ങരയില് യൂത്തുകോണ്ഗ്രസ് നേതാവിന്റെ വീടിനു നേരെ സിപിഎം ആക്രമണം. അക്രമത്തില് പ്രതിഷേധിച്ച് ഭരണിക്കാവ് പഞ്ചായത്തില് ഇന്ന് ഹര്ത്താല് ആചരിക്കുമെന്ന് നിയുക്ത ഡിസിസി പ്രസിഡന്റ് എം. ലിജു
അറിയിച്ചു. രാവിലെ ആറുമുതല് വൈകിട്ട് ആറുവരെയാണ് ഹര്ത്താല്. വാഹനങ്ങളെയും വിദ്യാലയങ്ങളെയും ബാങ്കുകളെയും ഹര്ത്താലില് നിന്ന് ഒഴിവാക്കിയിട്ടുണ്ട്.
സ്ഫോടകവസ്തു പൊട്ടിത്തെറിച്ച് ജനാലച്ചില്ലകള് തകര്ന്നു. ഭരണിക്കാവ് മണ്ഡലം യൂത്തുകോണ്ഗ്രസ് പ്രസിഡന്റ് പൊന്നേറ്റില് സല്മാന് പി. ഹബിന്റെ വീടിനു നേരെയാണ് ആക്രമണമുണ്ടായത്. കഴിഞ്ഞ ദിവസം രാത്രി 2.30നാണ് സംഭവം. സഹോദരന് ഇര്ഫാന് പി.ഹബീബിന്റ കിടപ്പുമുറിയോടു ചേര്ന്നാണ് സ്ഫോടനം നടന്നത്. ഈ സമയം വീട്ടിലുണ്ടായിരുന്ന അച്ഛന് ഹബീബ്, അമ്മ സബീല, സഹോദര ഭാര്യ ഹര്ഷ എന്നിവരും ഉഗ്രശബ്ദം കേട്ട് ഞെട്ടിയുണര്ന്നു. വീടിന്റെ അറ്റകുറ്റപണി നടന്നു വരികയാണ്. സ്ഫോടനത്തില് മുറിക്കുളളില് കിടന്ന ഇര്ഫാന്റെ ദേഹത്തേക്ക് ജനല്ച്ചീളുകള് തെറിഞ്ഞു വീഴുകയും പുകപടരുകയും ചെയ്തു. ഉഗ്രശബ്ദം കേട്ട് അയല് വാസികളും ഓടിക്കൂടി. തുടര്ന്ന് വീടിനു വെളിയിലേക്കു വീട്ടുകാര് എത്തിയപ്പോള് സ്ഫോടനം നടന്ന സ്ഥലത്ത് പുകഞ്ഞു കൊണ്ടിരുന്ന മറ്റൊരു സ്ഫോടകവസ്തു കണ്ടെത്തി. പരിഭ്രാന്തരായ വീട്ടുകാരും അയല്വാസികളും ചേര്ന്ന് വെള്ളം ഒഴിച്ച് നിര്വീര്യമാക്കി. ഉടനെ വള്ളികുന്നം എസ്ഐ ജി. അജിത്കുമാറിന്റെ നേതൃത്വത്തിലുള്ള പോലീസ് സംഘം സ്ഥലത്തെത്തി. രാത്രിതന്നെ അക്രമികള്ക്കായി തിരച്ചില് നടത്തിയെങ്കിലും പിടികൂടാന് കഴിഞ്ഞില്ല. സംഭവസ്ഥലത്തുനിന്നും കത്തിക്കാന് ഉപയോഗിച്ച ചന്ദന തിരികള് പോലീസ് കണ്ടെടുത്തു. ആലപ്പുഴയില് നിന്നും ഫോറന്സിക് വിദഗ്ധരും ഡോഗ്സ്ക്വാഡും കൂടുതല് പരിശോധന നടത്തി. തെളിവുകള് ശേഖരിച്ചു. പടക്കത്തോടൊപ്പം ഉപയോഗിക്കുന്ന അമിട്ടു പോലെയുള്ള സ്ഫോടകവസ്തു വാണ് പൊട്ടാതെ ലഭിച്ചിട്ടുള്ളതെന്ന് പോലീസ് പറഞ്ഞു. അക്രമികള്ക്കായി പോലീസ് അന്വേഷണം ഊര്ജിതമാക്കി.ഇതു രണ്ടാം തവണയാണ് വീടിനു നേരെ സ്ഫോടനം നടക്കുന്നത്. കഴിഞ്ഞ നിയസഭാ തിരഞ്ഞെടുപ്പിന്റെ വിജയാഘോഷത്തിനിടെയായിരുന്നു സംഭവം.
