കൊച്ചി: കേരള ബ്ലാസ്റ്റേഴ്സിന്റെ ആദ്യപാദ മത്സരത്തിനെത്തിയത് റെക്കോഡ് ജനക്കൂട്ടം. വൈകിട്ട് ആറ് മണിയോടെ സ്റ്റേഡിയത്തിലേക്കുള്ള പ്രവേശനം നിര്ത്തുമെന്ന് അറിയിച്ചിരുന്നു. ഇതോടെ അഞ്ച് മണിയായപ്പോഴേക്കും സ്റ്റേഡിയം മഞ്ഞക്കടലായി. കഴിഞ്ഞ മത്സരത്തിനിടെ കാണികളുടെ ഭാഗത്ത് നിന്നുണ്ടായ അനിഷ്ടസംഭവങ്ങളെ തുടര്ന്ന് മത്സരത്തിന് കനത്ത സുരക്ഷയൊരുക്കിയിരുന്നു.
സ്റ്റേഡിയത്തിലും, അവിടേക്കുള്ള വഴികളിലുമെല്ലാം കൂടുതല് പൊലീസിനെ വിന്യസിച്ച് ഗതാഗതക്രമീകരണങ്ങള് കര്ശനമാക്കി. ഒരു വര്ഷത്തെ ഇടവേളയ്ക്ക് ശേഷം ബ്ലാസ്റ്റേഴ്സ് സെമി കളിക്കാനിറങ്ങുന്നതിന്റെ ആവേശത്തില് വാദ്യമേളങ്ങളും വര്ണ്ണങ്ങളും വാരിവിതറി ആരാധകര് രാവിലെ മുതല് ഒഴുകിയെത്തി. ക്രിക്കറ്റ് ഇതിഹാസം സച്ചിന് ടെണ്ടുല്ക്കറും ടീമിന്റെ യൂത്ത് ഐക്കണ് നടന് നിവിന് പോളിയും എത്തിയതോടെ മത്സരം ആരംഭിക്കുന്നതിന് മുമ്പുതന്നെ ഗ്യാലറി ഇളകിമറിഞ്ഞു.
ബ്ലാസ്റ്റേഴ്സ് പതാകകളും ജഴ്സിയും വില്ക്കുന്നവര്ക്ക് ആഘോഷമായിരുന്നു. പതിവുപോലെ മലബാറില് നിന്നുള്ള ആരാധകര് രാവിലെ തന്നെ സ്റ്റേഡിയത്തിനു പുറത്തെത്തി ആഘോഷങ്ങള്ക്ക് തുടക്കമിട്ടു. പിന്നാലെ കൊച്ചിയിലെയും സമീപ ജില്ലകളിലെയും ഫുട്ബോള് ക്ലബ്ബുകളും ആരാധകരും ബാന് ഡും ചെണ്ടമേളയുമായി രംഗം കൊഴുപ്പിക്കാനെത്തി.
അഞ്ചു മണിക്ക് സ്റ്റീവ് കൊപ്പലിന്റെ നേതൃത്വത്തില് ബ്ലാസ്റ്റേഴ്സ് താരങ്ങള് ഗ്രൗണ്ട് പരിശോധിക്കാനെത്തി. കളികാണാന് വന്നവര് വന്നവര് പാട്ടും ആര്പ്പവിളിയുമായി രംഗം കൊഴുപ്പിച്ചു. 6.10ന് ഇരുടീമകളും വാംഅപ്പിനായി വീണ്ടും ഗ്രൗണ്ടിലെത്തി. സ്റ്റേഡിയത്തില് പിന്നെ കാണികളുടെ മൊബൈല് ഫ്ളാഷുകള് മിഴിചിമ്മി. ചിലര് ഫ്ളാഷുകള് കൊണ്ട് മെക്സിക്കന് തിരമാലകള് തീര്ത്തു.
