ജെന്നിങ്‌സും ഇംഗ്ലണ്ടും

മുംബൈ: ടോസിന്റെ ആനുകൂല്യം ഇംഗ്ലണ്ട് മുതലെടുത്തു. അരങ്ങേറ്റക്കാരന്‍ കീറ്റന്‍ ജെന്നിങ്‌സിന്റെ (112) ശതകത്തിന്റെ കരുത്തില്‍ ഇന്ത്യക്കെതിരായ നാലാം ക്രിക്കറ്റ് ടെസ്റ്റിലെ ആദ്യ ദിനം ഇംഗ്ലണ്ടിന് ആധിപത്യം. കളി നിര്‍ത്തുമ്പോള്‍ അഞ്ചു വിക്കറ്റ് നഷ്ടത്തില്‍ 288 റണ്‍സില്‍ ഇംഗ്ലണ്ട്. ബെന്‍ സ്റ്റോക്‌സും (25), ജോസ് ബട്‌ലറും (18) ക്രീസില്‍.

ആദ്യ ദിവസങ്ങളില്‍ വാംഖ്‌ഡെ നല്‍കുന്ന മുന്‍തൂക്കം ഇംഗ്ലീഷ് ബാറ്റ്‌സ്മാന്മാര്‍ മുതലാക്കി. അവസാന സെഷനില്‍ അശ്വിന്‍ നടത്തിയ പ്രകടനമാണ് സന്ദര്‍ശകരെ അല്‍പ്പമെങ്കിലും പ്രതിരോധത്തിലാക്കിയത്. നായകന്‍ അലിസ്റ്റര്‍ കുക്കിനൊപ്പം (46) അരങ്ങേറ്റക്കാരന്റെ പരിഭ്രമമില്ലാതെ ബാറ്റേന്തിയ ജെന്നിങ്‌സ് ഇന്ത്യന്‍ ബൗളര്‍മാരെ വെള്ളം കുടിപ്പിച്ചു. ആഭ്യന്തര ക്രിക്കറ്റിലെ മിന്നും ഫോം രാജ്യാന്തര തലത്തിലും തുടര്‍ന്നു ജെന്നിങ്‌സ്. 219 പന്തില്‍ 13 ഫോറുകളോടെ 112 റണ്‍സെടുത്ത താരത്തെ അശ്വിന്‍ ചേതേശ്വര്‍ പൂജാരയുടെ കൈയിലെത്തിച്ചു. അരങ്ങേറ്റത്തില്‍ സെഞ്ചുറി നേടുന്ന പത്തൊമ്പതാമത്തെ ഇംഗ്ലണ്ട് ബാറ്റ്‌സ്മാനാണ് ജെന്നിങ്‌സ്.

ആദ്യ വിക്കറ്റില്‍ 99 റണ്‍സ് ചേര്‍ത്തു ഇംഗ്ലണ്ട്. അര്‍ധശതകത്തിന് നാലു റണ്‍ അകലെ രവീന്ദ്ര ജഡേജയുടെ കൗശലത്തില്‍ കുടുങ്ങി കുക്ക്. ക്രീസില്‍ നിന്ന് കയറിയടിക്കാനുള്ള ശ്രമം പാര്‍ഥിവ് പട്ടേല്‍ സ്റ്റംപ് ചെയ്ത് വിഫലമാക്കി.

പിന്നീട് ജോ റൂട്ട് (21), മോയിന്‍ അലി (50) എന്നിവരും ജെന്നിങ്‌സിന് തുണയായി. ജോണി ബെയര്‍സ്റ്റൗ വേഗം മടങ്ങിയെങ്കിലും, ബെന്‍ സ്റ്റോക്‌സും ജോസ് ബട്‌ലറും ആറാം വിക്കറ്റില്‍ ഒത്തുചേര്‍ന്നത് സന്ദര്‍ശകര്‍ക്ക് വീണ്ടും പ്രതീക്ഷ നല്‍കുന്നു. നാലു വിക്കറ്റെടുത്ത അശ്വിനും ഒരു വിക്കറ്റെടുത്ത രവീന്ദ്ര ജഡേജയും ആദ്യ ദിനത്തിലെ ഇന്ത്യന്‍ ഹീറോകള്‍.

മുഹമ്മദ് ഷാമിക്കു പകരം ഭുവനേശ്വര്‍ കുമാറും, അജിങ്ക്യ രഹാനെക്കു പകരം ഓപ്പണറായി കെ.എല്‍. രാഹുലും ഇന്ത്യന്‍ ടീമിലെത്തി. കരുണ്‍ നായര്‍ സ്ഥാനം നിലനിര്‍ത്തി. സ്റ്റുവര്‍ട്ട് ബ്രോഡിനു പകരം രണ്ടാം ടെസ്റ്റ് മാത്രം കളിക്കുന്ന ജേക്ക് ബാളും ഇംഗ്ലീഷ് ടീമിലിടം കണ്ടു.

സ്‌കോര്‍ ബോര്‍ഡ്

ഇംഗ്ലണ്ട് ഒന്നാമിന്നിങ്‌സ്

അലിസ്റ്റര്‍ കുക്ക് സ്റ്റംപ്ഡ് പാര്‍ഥിവ് ബി ജഡേജ 46, കീറ്റന്‍ ജെന്നിങ്‌സ് സി ചേതേശ്വര്‍ ബി അശ്വിന്‍ 112, ജോ റൂട്ട് സി വിരാട് ബി അശ്വിന്‍ 21, മോയിന്‍ അലി സി കരുണ്‍ ബി അശ്വിന്‍ 50, ജോണി ബെയര്‍സ്റ്റൗ സി ഉമേഷ് ബി അശ്വിന്‍ 14, ബെന്‍ സ്റ്റോക്‌സ് നോട്ടൗട്ട് 25, ജോസ് ബട്‌ലര്‍ നോട്ടൗട്ട് 18, എക്‌സ്ട്രാസ് 2, ആകെ 94 ഓവറില്‍ അഞ്ച് വിക്കറ്റിന് 288.

വിക്കറ്റ് വീഴ്ച: 1-99, 2-136, 3-230, 4-230, 5-249.

ബൗളിങ്: ഭുവനേശ്വര്‍ കുമാര്‍ 11-0-38-0, ഉമേഷ് യാദവ് 10-2-36-0, ആര്‍. അശ്വിന്‍ 30-3-75-4, ജയന്ത് യാദവ് 22-3-78-0, രവീന്ദ്ര ജഡേജ 21-3-60-1.