കളമശേരി: വിലക്കുറവില് മരുന്നുകള് ലഭിക്കുന്ന ജന് ഔഷധി കേന്ദ്രത്തില് തിരക്കേറുന്നു. എറണാകുളം സര്ക്കാര് മെഡിക്കല് കോളേജ് ആശുപത്രിക്ക് മുന്നിലാണ് ജന് ഔഷധി പ്രവര്ത്തിക്കുന്നത്. ഔഷധങ്ങള് 30 ശതമാനം മുതല് 80 ശതമാനം വരെ വിലക്കുറവില് ലഭിക്കും. കമ്പനികളുടെ ബ്രാന്ഡ് പേരുകള്ക്ക് പകരം മരുന്നിലെ കെമിക്കല് നെയിമിലാണ് മരുന്നു നല്കുന്നത്.
രക്തസമ്മര്ദ്ദം, പ്രമേഹം, കാന്സര് തുടങ്ങിയവ ഉള്പ്പെടെയുള്ള രോഗങ്ങള്ക്കുള്ള ജീവന് രക്ഷാ മരുന്നുകള് വന് വിലക്കുറവില് ലഭിക്കും. നിലവില് പത്തിരട്ടി വരെ വില നല്കേണ്ട മരുന്നുകളാണ് പലതും. പേവിഷബാധയ്ക്കുള്ള മരുന്ന് ആന്റീ റാബീസ് എന്ന പേരിലുണ്ട് . 400 രൂപ വരെ ഏകദേശം വിലവരുന്ന ഈ മരുന്നിന് 240 രൂപ നല്കിയാല് മതി. 180 രൂപ വരാറുള്ള ഇന്സുലിന് 118 മാത്രമേ ഈടാക്കുന്നുള്ളൂ. വേദനാ സംഹാരികള്, ആന്റിബയോട്ടിക്കുകള്, വിറ്റാമിനുകള് എന്നിവയും ഹൃദ്രോഗം, ശ്വാസകോശ രോഗങ്ങള്, പ്രമേഹം, ഗ്യാസ്ട്രോ എന്ററോളജി എന്നിവയ്ക്കുള്ളതടക്കം 504 മരുന്നുകളാണ് ജന് ഔഷധിയില് ലഭിക്കുന്നത്.
രാവിലെ 8 മുതല് രാത്രി 8 വരെയാണ് ജന് ഔഷധിയുടെ പ്രവര്ത്തനം. ബ്രാന്ഡ് പേരുകള്ക്ക് പകരം മരുന്നിലെ രാസനാമങ്ങള് എഴുതാന് ഡോക്ടര്മാര് തയ്യാറാവുന്നില്ലെന്ന് ഫാര്മസിസ്റ്റ് സാബു സ്കറിയ പറഞ്ഞു. അതിനാല് രോഗികളെ പറഞ്ഞ് ബോധ്യപ്പെടുത്താനും പലപ്പോഴും ബുദ്ധിമുട്ടാറുണ്ട്. ബ്രാന്ഡ് നെയിം ഇല്ലെങ്കില് മരുന്നു വാങ്ങാതെ പോകുന്ന രോഗികളുമുണ്ടെന്ന് സാബു പറഞ്ഞു. രണ്ടാം ഘട്ടത്തില് കൂടുതല് മരുന്നുകളും വൈദ്യോപകരണങ്ങളും ജന് ഔഷധി കേന്ദ്രം കളമശേരിയില് എത്തിക്കും. സെന്ററുകള്ക്ക് രണ്ട് ലക്ഷം രൂപ വീതവും കുറഞ്ഞവിലയ്ക്ക് മരുന്നും കേന്ദ്രസര്ക്കാരാണ് നല്കുന്നത്.
പ്രതികരിക്കാൻ ഇവിടെ എഴുതുക: