തേഞ്ഞിപ്പലം: സംസ്ഥാന സ്കൂള് കായികോത്സവത്തിലെ നടത്ത മത്സരത്തില് പാലക്കാടിന്റെ സമ്പൂര്ണ്ണ ആധിപത്യം. ഇന്ന് രാവിലെ നടന്ന മൂന്ന് വിഭാഗങ്ങളിലും സ്വര്ണ്ണവും വെള്ളിയും പാലക്കാടന് കരുത്തിന്റെ പ്രതീകങ്ങളായ കല്ലടി, മുണ്ടൂര്, പറളി സ്കൂളുകള് പങ്കിട്ടു.
സീനിയര് ആണ്കുട്ടികളുടെ 5 കി.മീറ്റര് നടത്തത്തില് പറളിയുടെ എ. അനീഷും സി.ടി. നിതീഷും സ്വര്ണ്ണവും വെള്ളിയും നേടി. 21:50.30 സെക്കന്റില് നടന്നെത്തിയ അനീഷും 21:53.59 സെക്കന്റില് ഫിനിഷ് ചെയ്ത നിതീഷും നിലവിലെ റെക്കോര്ഡ് തിരുത്തിക്കുറിക്കുകയും ചെയ്തു. 2007-ല് പറളിയുടെ തന്നെ ഷിഹാബുദ്ദീന്. എം സ്ഥാപിച്ച 21:57.00 സെക്കന്റാണ് പഴയ റെക്കോര്ഡ്. തിരുവനന്തപുരം സായിയുടെ പി. പ്രകാശ് വെങ്കലം നേടി.
സീനിയര് പെണ്കുട്ടികളില് മുണ്ടൂര് എച്ച്എസിലെ സി.കെ. ശ്രീജയും വൈദേഹി. എസുമാണ് സ്വര്ണ്ണവും വെള്ളിയും നേടിയത്. 24:56.92 സെക്കന്റിലാണ് ശ്രീജ നടത്തം പൂര്ത്തിയാക്കിയത്. 25:00.41 സെക്കന്റിലായിരുന്നു വൈദേഹിയുടെ ഫിനിഷ്. കോഴിക്കോട് പുല്ലൂരാംപാറ സെന്റ് ജോസഫ് എച്ച്എസിലെ കെ.ആര്. സുജിത വെങ്കലം കരസ്ഥമാക്കി.
ജൂനിയര് പെണ്കുട്ടികളുടെ 3 കി. മീ. നടത്തത്തില് ദേശീയ റെക്കോര്ഡിനേക്കാളും മികച്ച പ്രകടനം നടത്തിയാണ് കല്ലടി എച്ച്എസിലെ സാന്ദ്ര സുരേന്ദ്രന് പൊന്നണിഞ്ഞത്. കൂട്ടുകാരി കെ. അക്ഷയ വെള്ളിയും നേടി. 14:18.51 സെക്കന്റില് നടന്നെത്തിയ സാന്ദ്രയുടെ പ്രകടനം ദേശീയ റെക്കോര്ഡിനേക്കാളും മികച്ചത്. കഴിഞ്ഞ വര്ഷം താന് തന്നെ സ്ഥാപിച്ച 14:08.38 സെക്കന്റാണ് പഴയ റെക്കോര്ഡ് തിരുത്താനായില്ലെങ്കിലും ദേശീയ റെക്കോര്ഡ് മറികടന്ന പ്രകടനത്തിലൂടെയാണ് സാന്ദ്ര മീറ്റിന്റെ പൊന്നോമനയായത്.
പാലക്കാടിന്റെ തന്നെ കെ.എം. മീഷ്മയുടെ പേരിലുള്ള 14:24.40 സെക്കന്റും. 14:45.53 സെക്കന്റിലാണ് അക്ഷയ നടത്തം പൂര്ത്തിയാക്കിയത്. കോതമംഗലം മാര്ബേസില് എച്ച്എസ്എസിലെ ആര്. ആരതി 15:00.16 സെക്കന്റില് വെങ്കലവും നേടി.
