ജൂനിയര് പെണ്കുട്ടികളുടെ ഡിസ്ക്കസ് ത്രോയില് മത്സരിക്കുന്ന തൃശൂര് നാട്ടിക ഗവ. ഫിഷറീസ് എച്ച്എസ്എസിലെ പി.എ. അതുല്യ
കായികോത്സവത്തിന്റെ രണ്ടാം ദിവസം പുതുതായി പിറന്നത് നാല് റെക്കോഡുകള്. ആദ്യ ദിനത്തില് ഉണ്ടായ മൂന്നെണ്ണം ഉള്പ്പെടെ റെക്കോഡുകളുടെ എണ്ണം എഴായി.
രാവിലെ ആദ്യ ഇനമായ ജൂനിയര് ആണ്കുട്ടികളുടെ അഞ്ച് കി.മീ. നടത്തത്തില് ആദ്യം റെക്കോഡ്. പാലക്കാട് കല്ലടി സ്കൂളിന്റെ എ.പി. അശ്വിന് ശങ്കര് അവകാശി, 22:48.02 സെക്കന്ഡ്. കഴിഞ്ഞ വര്ഷം പറളിയുടെ നിതീഷ്. സി.ടി സ്ഥാപിച്ച 23:04.96 സെക്കന്ഡ് മറികടന്നു. വെള്ളിനേടിയ കണ്ണൂര് എളയാവൂര് സിഎച്ച്എംഎച്ച്എസ്എസിലെ മുഹമ്മദ് അഫ്ഷാനും നിലവിലെ റെക്കോഡ് മറികടന്നു, 22:53.46 സെക്കന്ഡ്. കോട്ടയം പാറത്തോട് ഗ്രേസി മെമ്മോറിയല് എച്ച്എസിലെ നിഖില് സുധിലാലിന് വെങ്കലം.
ആദ്യമായി 5000 മീറ്ററില് മത്സരിക്കാനിറങ്ങിയ കോതമംഗലം മാര്ബേസില് എച്ച്എസ്എസിലെ അനുമോള് തമ്പിക്കാണ് രണ്ടാം റെക്കോഡ്. 17 മിനിറ്റ് 14.27 സെക്കന്ഡില് എതിരാളികളെ ബഹുദൂരം പിന്തള്ളി അനുമോള്. 2013-ല് മുണ്ടൂര് സ്കൂളിന്റെ പി.യു. ചിത്ര കുറിച്ച 17:24.94 സെക്കന്ഡ് പഴങ്കഥ. ആദ്യ ദിനം 3000 മീറ്ററില് അനുമോള് വെള്ളി നേടിയിരുന്നു. ഇടുക്കി വെള്ളയാംകുടി എസ്ജെഎച്ച്എസ്എസിലെ സാന്ദ്ര എസ്. നായര് 18:11.22 സെക്കന്ഡില് വെള്ളിയും കോതമംഗലം സെന്റ് ജോര്ജ് എച്ച്എസ്എസിലെ അഞ്ജു മുരുകന് വെങ്കലവും നേടി.
ജൂനിയര് പെണ്കുട്ടികളുടെ ഡിസ്ക്കസ് ത്രോയില് തൃശൂര് നാട്ടിക ഗവ. ഫിഷറീസ് എച്ച്എസ്എസിലെ പി.എ. അതുല്യ മൂന്നാം റെക്കോഡിന് അവകാശി. 13 വര്ഷം പഴക്കമുള്ള റെക്കോഡാണ് അതുല്യയുടെ കൈക്കരുത്തില് വഴിമാറിയത്. 35.41 മീറ്റര് പുതിയ റെക്കോഡ്.
2003-ല് കോതമംഗലം മാര്ബേസിലിന്റെ അനിത എബ്രഹാം സ്ഥാപിച്ച 35.17 മീറ്റര് മറികടന്നു. കഴിഞ്ഞ ദിവസം ഷോട്ട്പുട്ടില് വെങ്കലവും നേടി അതുല്യ. ഷോട്ടില് അതുല്യയെ പിന്തള്ളി പൊന്നണിഞ്ഞ തിരുവനന്തപുരം സായിയിലെ മേഘ മറിയം മാത്യുവിന് ഡിസ്ക്കസില് വെള്ളി കൊണ്ട് തൃപ്തിപ്പെടേണ്ടിയും വന്നു. 32.62 മീറ്ററാണ് മേഘ എറിഞ്ഞത്. പാലക്കാട് പത്തിരിപ്പാല ജിവിഎച്ച്എസ്എസിലെ തൗഫീറ. സി.പി 28.96 മീറ്റര് എറിഞ്ഞ് വെങ്കലം സ്വന്തമാക്കി.
ജൂനിയര് പെണ്കുട്ടികളുടെ പോള്വോള്ട്ടിലാണ് നാലാം റെക്കോഡ്. ഉയരങ്ങള് താണ്ടുന്നത് ഹരമാക്കിയ മാറ്റിയ പാലക്കാട് കല്ലടി സ്കൂളിന്റെ നിവ്യ ആന്റണി ദേശീയ റെക്കോഡും മറികടന്ന പ്രകടനമാണ് നടത്തിയത്. കഴിഞ്ഞ വര്ഷം കോഴിക്കോട് നിവ്യ തന്നെ സ്ഥാപിച്ച 3.30 മീറ്റര് 15 സെന്റമീറ്റര് കൂടുതല് ചാടി തിരുത്തി. 3.45 മീറ്ററാണ് ഇന്നലെ നിവ്യ കീഴടക്കിയത്. കഴിഞ്ഞ വര്ഷം കോഴിക്കോട്നടന്ന ദേശീയ സ്കൂള് മീറ്റില് മാര് ബേസില് സ്കൂളിന്റെ ദിവ്യ മോഹന് 3.20 മീറ്റര് ചാടി സ്ഥാപിച്ചതാണ് ദേശീയ റെക്കോഡ്.
