തേഞ്ഞിപ്പലം: ട്രാക്കിലെ ഏറ്റവും ആവേശകരമായ 100 മീറ്ററില് ഇടിമിന്നല്കണക്കെ പറന്നെത്തിയ പാലക്കാടിന്റെ മുഹമ്മദ് അജ്മലും എറണാകുളത്തിന്റെ സോഫിയ സണ്ണിയും സംസ്ഥാന സ്കൂള് കായികോത്സവത്തിലെ വേഗതയേറിയ താരങ്ങള്. ട്രാക്കില് തീ പടര്ത്തിയ പോരാട്ടത്തില് ഫോട്ടോ ഫിനിഷിലാണ് വിജയികളെ തീരുമാനിച്ചത്. മുഹമ്മദ് അജ്മല് സീനിയര് വിഭാഗത്തിലും സോഫിയ ജൂനിയര് വിഭാഗത്തിലുമാണ് മത്സരിച്ചത്. സീനിയര് പെണ്കുട്ടികളില് സ്വര്ണം നേടിയ പാലക്കാടിന്റെ വിനി. പി.വിയേക്കാള് മികച്ച സമയത്തില് ഓടിയെത്തിയാണ് സോഫിയ സണ്ണി വേഗപ്പറവയായത്.
സീനിയര് ആണ്കുട്ടികളുടെ വിഭാഗത്തില് കല്ലടി സ്കൂളിന്റെ മുഹമ്മദ് അജ്മല്. വി 10.97 സെക്കന്ഡില് പറന്നെത്തിയാണ് വേഗത്തിന്റെ രാജകുമാരനായത്. 11.01 സെക്കന്ഡില് ഫിനിഷ് ലൈന് കടന്ന കോതമംഗലം സെന്റ് ജോര്ജിന്റെ ഒാംകാര്നാഥ് വെള്ളി നേടിയപ്പോള് എറണാകുളം തുറവൂര് മാര് അഗസ്റ്റിന്സ് എച്ച്എസിലെ നിബിന് ബൈജു 11.14 സെക്കന്ഡില് വെങ്കലം നേടി.
സീനിയര് പെണ്കുട്ടികളുടെ നൂറ് മീറ്ററില് ഫോട്ടോ ഫിനിഷിലൂടെയാണ് വിജയിയെ നിര്ണയിച്ചത്. മുണ്ടൂര് സ്കൂളിന്റെ വിനി. പി.വി. 12.63 സെക്കന്ഡില് ഫിനിഷ് ലൈന് കടന്ന് വേഗപ്പറവയായപ്പോള് വെള്ളിയും പാലക്കാടിന് സ്വന്തം. 12.64 സെക്കന്ഡില് പറളി സ്കൂളിന്റെ എം. അഞ്ജന. വെങ്കലം 12.67 സെക്കന്ഡില് തിരുവനന്തപുരം സായിയിലെ കെ.എം. നിഭയ്ക്ക്. ആദ്യദിനം ലോങ്ജമ്പില് സ്വര്ണം നേടിയ വിനി ഇതോടെ ഡബിള് തികച്ചു.
ജൂനിയര് പെണ്കുട്ടികളില് സ്വര്ണം എറണാകുളം സ്വന്തമാക്കിയപ്പോള് വെള്ളിയും വെങ്കലവും കോഴിക്കോടിന്. ഈ മത്സരവും ഫോട്ടോഫിനിഷലാണ് അവസാനിച്ചത്. മാര്ബേസില് എച്ച്എസ്എസിലെ സോഫിയ സണ്ണി (12.49 സെ.) പൊന്നണിഞ്ഞപ്പോള് പുല്ലൂരാംപാറ സെന്റ് ജോസഫ് എച്ച്എസിലെ അപര്ണ റോയ് വെള്ളിയും (12.50 സെ.), ഉഷ സ്കൂളിന്റെ സൂര്യമോള്. ടി വെങ്കലവും (12.72 സെ.) നേടി. ആദ്യ രണ്ടു സ്ഥാനങ്ങളിലെത്തിയവര് സീനയിര് പെണ്കുട്ടികളിലെ സ്വര്ണനേട്ടക്കാരിയേക്കാള് മികച്ച സമയം കണ്ടെത്തി.
ജൂനിയര് ആണ്കുട്ടികളുടെ വിഭാഗത്തില് തിരുവന്തപുരം സായിയിലെ സി. അഭിനവ് വേഗതയേറിയ താരമായി. 11.25 സെക്കന്ഡ്. പാലക്കാട് മുണ്ടൂര് സ്കൂളിന്റെ അഖില്. പി.എസ്. വെള്ളിയും (11.32 സെ.) എറണാകുളം ആലങ്ങാട് കെഇഎംഎച്ച്എസിലെ പ്രണവ്. എസ് വെങ്കലവും (11.63 സെ.) നേടി.
സബ് ജൂനിയര് പെണ്കുട്ടികളുടെ വിഭാഗത്തില് മൂന്ന് മെഡലും കോഴിക്കോടിന് സ്വന്തം. 13.69 സെക്കന്ഡില് സ്വര്ണം കൊത്തിപ്പറന്നത് ഉഷ സ്കൂളിന്റെ എല്ഗ തോമസ്. പുല്ലൂരാംപാറ സെന്റ് ജോസഫ് എച്ച്എസിലെ അല്ന ഷാജു വെള്ളി (13.73 സെ.) നേടിയപ്പോള്, ഉഷ സ്കൂളിന്റെ ജസ്ന ഷാജി വെങ്കലം (13.83 സെ.) കരസ്ഥമാക്കി. ആദ്യ ദിനം 400 മീറ്ററില് സ്വര്ണം നേടിയ എല്ഗ ഇത്തവണ ഇരട്ട സ്വര്ണം നേടുന്ന ആദ്യ താരമായി.
ഈ വിഭാഗം ആണ്കുട്ടികളില് പൊന്നണിഞ്ഞത് ആതിഥേയരായ മലപ്പുറം. അതാളൂര് കെഎംഎന്എസ്എസ്യുഇഎംഎച്ച്എസിലെ ടി. ശ്രീരാഗ് (12.21 സെ.) പൊന്നണിഞ്ഞു. കൊല്ലം ഇന്ഫന്റ് ജീസസ് ആംഗ്ലോ ഇന്ത്യന്സ് എച്ച്എസ്എസിലെ ബി.എ. നീരജ് വെള്ളിയും (12.26 സെ.), കോതമംഗലം സെന്റ് ജോര്ജിന്റെ തങ്ജാം അലെര്ട്ട്സണ് സിങ് വെങ്കലവും (12.29 സെ.) കരസ്ഥമാക്കി.
പ്രതികരിക്കാൻ ഇവിടെ എഴുതുക: