റയലിനായി ഗോള് നേടിയ എന്സോയെ സഹതാരങ്ങള് അഭിനന്ദിക്കുന്നു
മാഡ്രിഡ്: സ്പാനിഷ് കോപ്പ ഡെല് റേ ചാമ്പ്യന്ഷിപ്പില് തകര്പ്പന് വിജയത്തോടെ റയല് മാഡ്രിഡ് അടുത്ത റൗണ്ടില്. രണ്ടാം പാദത്തില് കള്ച്ചറല് ലിയോനേസയെ ഒന്നിനെതിരെ ആറ് ഗോളുകള്ക്ക് റയല് തകര്ത്തു. ആദ്യപാദത്തില് 7-1ന്റെ വിജയം നേടിയ റയല് ഇതോടെ ഇരുപാദങ്ങളിലുമായി 13-2ന്റെ ആധികാരിക വിജയം നേടിയാണ് അടുത്ത റൗണ്ടിലേക്ക് മുന്നേറിയത്.
റയല് കോച്ചും ഫ്രഞ്ച് ഇതിഹാസതാരവുമായ സിനദിന് സിദാന്റെ മകന് എന്സോ അലന് സിദാനെ സീനിയര് ടീമിനായി അരങ്ങേറ്റം കുറിക്കുകയും ഗോളടിക്കുകയും ചെയ്തു. 45-ാം മിനിറ്റില് ഇസ്കോയ്ക്കു പകരക്കാരനായി കളത്തിലെത്തി 63-ാം മിനിറ്റിലായിരുന്നു ജൂനിയര് സിദാന്റെ ഗോള്. റയലിനായി മരിയാനോ ഡയസ് മേയ ഹാട്രിക്ക് നേടി. 1, 42, 87 മിനിറ്റുകളിലയാിരുന്നു മരിയാനോയുടെ ഹാട്രിക്ക്.
23-ാം മിനിറ്റില് ജെയിംസ് റോഡ്രിഗസും റയലിനായി ലക്ഷ്യം കണ്ടപ്പോള് 90-ാം മിനിറ്റില് മൊര്ഗാഡോ ഒര്ട്ടേഗയുടെ സെല്ഫ് ഗോളും റയലിന് ലഭിച്ചു. ക്രിസ്റ്റിയാനോ, കരിം ബെന്സേമ, ഗരെത്ത് ബെയ്ല്, ടോണി ക്രൂസ് തുടങ്ങിയ സൂപ്പര് താരങ്ങള്ക്ക് വിശ്രമം നല്കിയായിരുന്നു സിദാന് ടീമിനെ കളത്തിലിറക്കിയത്.
മറ്റൊരു മത്സരത്തില് അത്ലറ്റികോ മാഡ്രിഡ് മറുപടിയില്ലാത്ത ആറ് ഗോളുകള്ക്ക് ഗ്വിജൂലോയെ തകര്ത്തു. എന്നാല് കരുത്തരായ ബാഴ്സലോണ സമനിലയില് തളക്കപ്പെട്ടു. ഹെര്ക്കുലീസാണ് കറ്റാലന് പടയെ 1-1ന് പിടിച്ചുകെട്ടിയത്. മറ്റു കളികളില് കോര്ഡോബ 2-0ന് മലാഗയെയും ഗ്രനാഡ 1-0ന് ഒസാസുനയെയും വിയ്യാറയല് 3-0ന് ടൊളിഡൊയെയും പരാജയപ്പെടുത്തി.
