ഉള്ളിലാണ് ആരവം: രണ്ട് ഒളിമ്പിക്സില് കളിച്ച, ഏഷ്യന് ചാമ്പ്യന്ഷിപ്പ് ഉള്പ്പെടെ നിരവധി വിജയങ്ങള് ഇന്ത്യയ്ക്ക് സമ്മാനിച്ച ഹോക്കി ക്യാപ്റ്റന് പി.ആര്. ശ്രീജേഷ് തിരുവനന്തപുരത്ത് സെക്രട്ടേറിയറ്റിനു സമീപം ആരുമറിയാതെ നടന്നു നീങ്ങുന്നു-വി.വി. അനൂപ്
തിരുവനന്തപുരം: കായികതാരങ്ങള്ക്ക് ഒരു ജോലിയെന്നത് അവരുടെ അവകാശമെന്ന് ഇന്ത്യന് ഹോക്കി ടീം ക്യാപ്റ്റനും മലയാളിയുമായ പി.ആര്. ശ്രീജേഷ്. തിരുവനന്തപുരം പ്രസ് ക്ലബ്ബില് മുഖാമുഖം പരിപാടിയില് സംസാരിക്കുകയായിരുന്നു അദ്ദേഹം.
ഓരോ കായികതാരവും ദീര്ഘനാളത്തെ കഷ്ടപ്പാടുകള്ക്കു ശേഷമാണ് മെഡല് നേടുന്നത്. പരീക്ഷയ്ക്ക് റാങ്ക് നേടാന് ഒരുമാസം മുമ്പ് പഠിച്ചാലും മതിയാകും. എന്നാല്, ഒരു മെഡല് നേടാന് വര്ഷങ്ങളുടെ പ്രയത്നം വേണം. ഇന്ത്യന് ടീമില് മെഡല് നേടിയ പലര്ക്കും ഇന്ന് കേരളത്തില് ജോലിയില്ലാത്ത അവസ്ഥ. കേരളത്തിലെ കഴിവുറ്റ താരങ്ങള് പലരും അന്യസംസ്ഥാനങ്ങളില് ചേക്കേറുന്നു. 10 വര്ഷം ഞാന് തമിഴ്നാടിനെയാണ് പ്രതിനിധീകരിച്ചത്. പലര്ക്കും താല്പര്യമില്ലാത്തതുകൊണ്ടല്ല, കേരളത്തില് അവസരം കിട്ടാത്തതുകൊണ്ടാണ് വരാത്തത്.
കേരളത്തില് കഴിവുറ്റ താരങ്ങളുണ്ട്. അവര്ക്കും അവസരം കിട്ടുന്നില്ല. കളിക്കാരെ പിന്തുണയ്ക്കാനും ഉയര്ത്തിക്കൊണ്ടുവരാനുമാണ് അസോസിയേഷന്. അസോസിയേഷനുകളിലെ പ്രശ്നങ്ങള് പരിഹരിക്കണം. പൈക്ക ഹോക്കിയില് പുറത്തായ അവസ്ഥയാണ്. ഇക്കാര്യങ്ങള് സ്പോര്ട്സ് കൗണ്സില് സെക്രട്ടറിയോട് സംസാരിച്ചു. കളിക്കാര്ക്ക് കൂടുതല് ടൂര്ണമെന്റുകള് കളിക്കാന് അവസരം വേണം. നിലവാരമുള്ള ഗ്രൗണ്ട് വേണം. കൊല്ലം സ്റ്റേഡിയത്തില് അക്കാദമി തുടങ്ങുമെന്ന് അറിയാന് കഴിഞ്ഞു.
പൂര്വ്വ സ്കൂളായ ജിവി രാജ അതിന്റെ പ്രതാപകാലത്തേക്ക് വരുമെന്നാണ് പ്രതീക്ഷ. സ്കൂള് സംസ്ഥാന സര്ക്കാരിന്റെ കീഴിലായതിനാല് കേന്ദ്രസര്ക്കാരിനോ ഹോക്കി അസോസിയേഷനോ സഹായിക്കാനാവില്ല.
2020ലെ ടോക്കിയോ ഒളിമ്പിക്സില് ഹോക്കിയില് മെഡല് യാഥാര്ത്ഥ്യമാക്കുകയാണ് ലക്ഷ്യം. ഇപ്പോള് 40 അംഗ കോര് ടീമുണ്ട്. ഇതിലേക്ക് ഇനിയും പുതിയ കളിക്കാര് വന്നേക്കാം. താന് അന്നുണ്ടാവുമോ എന്നതും പറയാനാവില്ല. റിയോ ഒളിമ്പിക്സിലെ പിഴവുകളില്നിന്ന് പാഠം പഠിക്കാന് കഴിഞ്ഞു. അതുകൊണ്ടുതന്നെ ടോക്കിയോ ഒളിമ്പിക്സ് മെഡല് സ്വപ്നമല്ല, യഥാര്ത്ഥ്യമാവും. സ്വര്ണം വേണമെന്നുതന്നെയാണ് ആഗ്രഹം. പക്ഷേ അത് പറഞ്ഞാല് അഹങ്കാരമാണെന്നു പറയും.
ഇന്നത്തെ ക്യാപ്റ്റന് പദവിയില്നിന്ന് ഇന്ത്യന്ടീമില്നിന്ന് ഇറങ്ങിവരുന്ന കാലമുണ്ട്. അന്ന് കേരളത്തില് ഒരു അക്കാദമി മനസിലുണ്ട്. നോട്ട് പിന്വലിക്കലിനെക്കുറിച്ച് ചോദ്യത്തിന് അത് നല്ലകാര്യമാണെന്നായിരുന്നു ശ്രീജേഷിന്റെ മറുപടി.
