കാട്ടാക്കട: കള്ളിക്കാട് ചിന്താലയ ആശ്രമത്തിന്റെ കീഴില് വിയകോണത്ത് പ്രവര്ത്തിക്കുന്ന ശ്മാശാനത്തില് സാമൂഹ്യ വിരുദ്ധരുടെ അഴിഞ്ഞാട്ടം. ശ്മശാനത്തില് അതിക്രമിച്ചു കയറി കുഴിമാടങ്ങള്ക്ക് സമീപമിരുന്ന് മദ്യപിക്കുകയും ഇവിടം വൃത്തിഹീനമാക്കുകയും ചെയ്തതായി ആശ്രമം അധികൃതര് പരാതിപ്പെടുന്നു.
ഇക്കഴിഞ്ഞ 20ന് വൈകീട്ടോടെയാണ് സംഭവം. ശ്മശാന ഭൂമിയിലെ ഗേറ്റിന്റെ പൂട്ട് തകര്ത്ത് അകത്തുകടന്ന സംഘം ഇവിടെയിരുന്ന് മദ്യപിച്ച ശേഷം ഭക്ഷണാവശിഷ്ടങ്ങള് വാരി വിതറുകയും മദ്യപിച്ചു ലക്കുകെട്ട ഇവര് പരിസരത്ത് ഛര്ദ്ദിച്ച് വൃത്തികേടാക്കുകയും ചെയ്തതായി ആശ്രമം ഭാരവാഹികള് പോലീസിനു നല്കിയ പരാതിയില് പറയുന്നു. സാമൂഹികവിരുദ്ധരുടെ മദ്യപാനം ശ്രദ്ധയില്പെട്ട നാട്ടുകാര് വിവരം അറിയിച്ചതനുസരിച്ചു ആശ്രമവാസികള് സ്ഥലത്തെത്തിയപ്പോഴേക്കും ഇവര് ഓടി മറഞ്ഞു. മരണാനന്തര ചടങ്ങുകള്ക്കായി സൂക്ഷിച്ചിരുന്ന സാധനങ്ങള് മദ്യപസംഘം എടുത്തു കൊണ്ട് പോയതായും ആശ്രമം സെക്രട്ടറി നെയ്യാര്ഡാം പോലീസില് നല്കിയ പരാതിയില് പറയുന്നു. മദ്യപാനികള് ശ്മശാന പരിസരത്ത് ഉപേക്ഷിച്ചുപോയ ബൈക്ക് പോലീസ് കസ്റ്റഡിയില് എടുത്തിരുന്നു. എന്നാല് സംഭവം നടന്ന് ദിവസങ്ങള് കഴിഞ്ഞിട്ടും പ്രതികളെ പിടികൂടാന് പോലീസിനു കഴിഞ്ഞില്ലെന്ന് ആക്ഷേപമുണ്ട്.
