പാനൂര്: ഫസല്വധത്തില് വീണ്ടും അപഹാസ്യരായി സിപിഎം. മാടപ്പീടികയിലെ ഷിനോജ് എന്ന ആര്എസ്എസ് പ്രവര്ത്തകന്റെ ഫോണ്രേഖകള് പ്രചരിപ്പിച്ചു കൊണ്ടാണ് ആര്എസ്എസുകാരാണ് കൊലയ്ക്കു പിന്നില്ലെന്ന് പ്രചരിപ്പിക്കുന്നത്. സിപിഎം പ്രാദേശിക നേതാവ് മൊബൈല് വിളിച്ചപ്പോള് ബോധപൂര്വ്വം ഷിനോജ് പറയുന്നതാണെന്ന രീതിയിലാണ് ഓഡിയോ റിക്കാര്ഡിംഗ് ഇപ്പോള് പ്രചരിപ്പിക്കുന്നത്. ഇതിന്റെ വിശ്വാസ്യത പോലും പരിശോധിക്കാതെയാണ് പാര്ട്ടിചാനലും, പത്രവും വാര്ത്തകള് പടച്ചുവിടുന്നത്. ഓരോ ദിവസവും ഫസലിനെ കൊന്നവര് ആര്എസ്എസ് ആണെന്ന് വ്യാജ പ്രചാരണങ്ങളിലൂടെ ആണയിടുകയാണ് സിപിഎം നേതൃത്വം. ഷിനോജിനെ വിളിച്ചു സ്വാധീനിക്കാന് പി..ജയരാജന് നിയോഗിച്ച പാര്ട്ടി പ്രവര്ത്തകന്റെ മനോനില ഫോണ് സന്ദേശത്തില് വ്യക്തമാണ്.
സിപിഎം ജില്ലാ സെക്രട്ടറിയും ഷിനോജിനെ വിളിക്കാന് ശ്രമം നടത്തിയതായും സൂചനയുണ്ട്. ഇങ്ങിനെ ഫസല് വധം ആര്എസ്എസിന്റെ തലയില് എങ്ങിനെയെങ്കിലും കെട്ടിവെയ്ക്കാന് കിണഞ്ഞു ശ്രമിക്കുന്നതിന്റെ ഒടുവിലത്തെ ഉദാഹരണമാണ് പുതിയ ഓഡിയോ റിക്കാര്ഡിംഗ്. ഇനിയും തെറ്റിദ്ധാരണ പരത്തുന്ന നിരവധി അടവുകളുമായി ഓതിരംകടകം തന്ത്രങ്ങളുമായി സിപിഎം ജില്ലാ സെക്രട്ടറി യും, കൂട്ടരും രംഗത്തു വരും. കഴിഞ്ഞ ദിവസം അകാരണമായി അറസ്റ്റു ചെയ്ത ചെമ്പ്രയിലെ സുബീഷിനെ മൂന്നാംമുറ പ്രയോഗിച്ച് ഫസല് വധം ചെയ്തത് സമ്മതിപ്പിക്കുകയായിരുന്നു ഡിവൈഎസ്പിമാരായ പ്രിന്സ് എബ്രഹാമും, പി.സദാനന്ദനും. കോടതിയില് ഹാജരാക്കിയ സുബീഷിനു നടക്കാന് പോലും സാധിക്കാതെ പോലീസുകാര് താങ്ങിയാണ് വാഹനത്തില് കയറ്റിയത്.
രണ്ടു ഡിവൈഎസ്പിമാര്ക്കെതിരെയും മജിസ്ട്രേട്ടിനു മുന്നില് പരാതിയും നല്കിയിട്ടുണ്ട്. ഇങ്ങിനെ തല്ലിപറയിച്ച കേസിനു വീണ്ടും ശ്രദ്ധ നേടാനും, വിചാരണ അട്ടിമറിക്കാനുമാണ് സിപിഎം നീക്കം. പി.ജയരാജനെ ചോദ്യംചെയ്താല് ഫസല് വധം അട്ടിമറിക്കാന് കൂട്ടുനിന്നതിന്റെ മുഴുവന് ആസൂത്രണവും പുറത്തുവരുമെന്ന് സംഘപരിവാര് സംഘടനകള് ചൂണ്ടിക്കാട്ടിയിട്ടുണ്ട്. സിബിഐയ്ക്കു മുന്നില് ആര്എസ്എസ്നേതൃത്വവും, സുബീഷിന്റെ ബന്ധുക്കളും ഇതുസംബന്ധിച്ച് പരാതി നല്കിയിട്ടുണ്ട്.
