പൂനെ സിറ്റി താരങ്ങള് പരിശീലനത്തില്
ഗുവാഹത്തി: കഴിഞ്ഞ ദിവസം ദല്ഹി ഡൈനാമോസിനെ തകര്ത്തതിന്റെ ആത്മവിശ്വാസത്തില് പൂനെ സിറ്റി ഇന്ന് വീണ്ടും കളിക്കളത്തില്. എതിരാളികള് പോയിന്റ് പട്ടികയില് ഏഴാമതുള്ള നോര്ത്ത് ഈസ്റ്റ് യുണൈറ്റഡ്. ഇരുടീമുകള്ക്കും പ്ലേഓഫ് സാധ്യത നിലനില്ക്കണമെങ്കില് ഇന്ന് വിജയിച്ചേ തീരൂ.
പത്തു മത്സരങ്ങളില് നിന്ന് മൂന്നു ജയവും രണ്ട് സമനിലയും അഞ്ച് തോല്വികളുമായി 11 പോയിന്റാണ് നോര്ത്ത് ഈസ്റ്റിനുള്ളത്. നിലവില് നാലാം സ്ഥാനത്തു നില്ക്കുന്ന പൂനെ സിറ്റി എഫ്സിക്ക് 11 മത്സരങ്ങളില് നിന്നും നാല് ജയവും മൂന്നു സമനിലയുമടക്കം 15 പോയിന്റാണുള്ളത്.
ഈ സീസണില് ഉശിരന് തുടക്കത്തിനു ശേഷം തോല്വികള് തുടരെ ഏറ്റുവാങ്ങിയ നോര്ത്ത് ഈസ്റ്റ് യൂണൈറ്റഡിനു കഴിഞ്ഞ ആറ് മത്സരങ്ങളില് ഒന്നില് പോലും ജയിക്കാന് കഴിഞ്ഞിട്ടില്ല. ഏക ആശ്വാസം ദല്ഹി ഡൈനാമോസിനയും അത്ലറ്റിക്കോ ഡി കൊല്ക്കത്തയേയുമായും സമനില പിടിച്ചതാണ്. ബാക്കി നാല് മത്സരങ്ങളിലും തോറ്റു.
സീസണിന്റെ തുടക്കത്തില് തകര്പ്പന് തുടക്കത്തോടെ തുടങ്ങിയ അവര്ക്ക് പിന്നീട് ആ നിലവാരം കാത്തുസൂക്ഷിക്കാന് കഴിയാതിരുന്നതാണ് തിരിച്ചടിയായത്. ഉദ്ഘാടന മത്സരത്തില് കേരള ബ്ലാസ്റ്റേഴ്സിനെയും അടുത്ത മത്സരത്തില് ഗോവയേയും തോല്പ്പിച്ചുകൊണ്ടു തുടങ്ങിയ നോര്ത്ത് ഈസ്റ്റ് മൂന്നാം കളിയില് മുംബൈയോട് തോറ്റു. ഇതോടെ അവരുടെ ജാതകവും മാറ്റിയെഴുതപ്പെട്ടു. അതിനു ശേഷം സന്തം ആരാധകരുടെ മുന്നില് മൂന്നു മത്സരങ്ങളും തോറ്റു. ഇനി ശേഷിക്കുന്ന മത്സരങ്ങളില് രണ്ട് ഹോം മാച്ചുകള് ബാക്കിയുണ്ട് എന്നതും ആശ്വാസം പകരുന്നു.
പ്ലേ ഓഫിലേക്ക് നോര്ത്ത് ഈസ്റ്റ് യോഗ്യത നേടുമെന്ന ഉറച്ച വിശ്വാസത്തിലാണ് കോച്ച് നെലോ വിന്ഗാഡ. ഏത് ടീമിനെയും തോല്പ്പിക്കാനുള്ള കഴിവ് ടീമിനുണ്ടെന്ന് കോച്ച് ഉറപ്പിച്ചുപറയുന്നു. ടീമിന്റെ തിരിച്ചുവരവ് ആണ് താന് മുന്നില് കാണുന്നതെന്നും വിന്ഗാഡ പറഞ്ഞു. കളിക്കാരുടെ പ്രകടനങ്ങളും പ്രതീക്ഷയ്ക്കു വകനല്കുന്നുവെന്നും അദ്ദേഹം കൂട്ടിച്ചേര്ത്തു.
എന്നാല് നിലവില് നാലാം സ്ഥാനത്തു നില്ക്കുന്ന പൂനെ സിറ്റിയുമായി കേവലം നാല് പോയിന്റിന്റെ വ്യത്യാസം മാത്രമെ നോര്ത്ത് ഈസ്റ്റിനും ഗോവയക്കുമുള്ളു. അതേസമയം നോര്ത്ത് ഈസ്റ്റിന് ഇന്നത്തേതുള്പ്പെടെ നാല് കളികള് കൂടി ബാക്കിയുണ്ട്. പൂനെക്ക് മൂന്നെണ്ണമേയുള്ളൂ.
ഇന്ന് നോര്ത്ത് ഈസ്റ്റിനെ തോല്പ്പിച്ച് മൂന്ന് പോയിന്റ് നേടുക മാത്രമാണ് തങ്ങളുടെ ലക്ഷ്യമെന്ന് കോച്ച് അന്റോണിയോ ഹെബ്ബാസ് പറഞ്ഞു. ഈ സീസണില് പൂനെയുടെ ഏറ്റവും മികച്ച വിജയമാണ് ദല്ഹിക്കെതിരെ നേടിയത്. ഇന്ന് വിജയിക്കാന് കഴിഞ്ഞാല് 18 പോയിന്റുമായി അവര് രണ്ടാം സ്ഥാനത്തേക്കുയരും. അടുത്ത മത്സരത്തില് 25ന് കൊച്ചിയില് കേരള ബ്ലാസ്റ്റേഴ്സിനെയും ഡിസംബര് രണ്ടിന് ലീഗിലെ അവസാന മത്സരത്തില് അത്ലറ്റിക്കോ ഡി കൊല്ക്കത്തയെയും പൂനെ സിറ്റിനേരിടും.
മൂന്ന് സീസണുകളിലായി നോര്ത്ത് ഈസ്റ്റ് യൂണൈറ്റഡും പൂനെ സിറ്റിയും അഞ്ച് മത്സരങ്ങള് കളിച്ചതില് രണ്ടു ടീമുകളും രണ്ട് മത്സരങ്ങള് വീതം ജയിച്ചു. ഒരെണ്ണം സമനിലയിലും അവസാനിച്ചു. ഈ സീസണില് ആദ്യ പാദത്തില് നോര്ത്ത് ഈസ്റ്റ് 1-0നു ജയിച്ചിരുന്നു. ആ പരാജയത്തിന് പകരം വീട്ടുക എന്ന ലക്ഷ്യവും ഇന്ന് പൂനെക്കുണ്ട്.
