മലപ്പുറം: കള്ളപ്പണം ഉപയോഗിച്ചാണ് ജില്ലയിലെ സഹകരണ ബാങ്കുകള് മിക്കതും പ്രവര്ത്തിക്കുന്നതെന്ന് യുവമോര്ച്ച സംസ്ഥാന സെക്രട്ടറി അജി തോമസ് ആരോപിച്ചു. സഹകരണ ബാങ്കുകള് കള്ളപ്പണ നിക്ഷേപത്തിന്റെ കലവറകളാണ്. മുസ്ലിം ലീഗ്, കോണ്ഗ്രസ്സ് നേതാക്കന്മാരുടെ നിയന്ത്രണത്തിലാണ് സഹകരണ ബാങ്കുകളില് ഭൂരിഭാഗവും. ദരിദ്ര നാരായണന്മാരായി ഖദര് കുപ്പായമിട്ട ഇവരുടെ ഇപ്പോഴുത്തെ സാമ്പത്തികനില അത്ഭുതപ്പെടുത്തുന്നതാണ്. കള്ളപ്പണത്താല് ബാങ്ക് നിറയുമ്പോള് അതിനനുസരിച്ച് ഭരണസമിതിയുടെ നിലയും മെച്ചപ്പെടും.
പ്രമുഖ കോണ്ഗ്രസ് നേതാവും മകനുമാണ് ധാരാളം ശാഖകളുള്ള നിലമ്പൂരിലെ സഹകരണ ബാങ്ക് കയ്യടക്കിവെച്ചിരിക്കുന്നത്. പാര്ട്ടി ഓഫീസിലെ ചായ വിതരണക്കാരനായി രാഷ്ട്രീയ പ്രവര്ത്തനം തുടങ്ങിയ ഈ നേതാവിന്റെയും കുടുംബത്തിന്റെയും ആസ്തി ഏവരെയും അമ്പരിപ്പിക്കുന്നതാണ്. ഇത്തരത്തില് ദുരൂഹമായ സാഹചര്യത്തില് കോടിപതികളായവരാണ് ഒട്ടുമിക്ക സഹകരണ ബാങ്കുകളും നിയന്ത്രിക്കുന്നത്. നിക്ഷേപകരില് ബഹുഭൂരിപക്ഷവും ബിനാമികളും കള്ളപ്പണിക്കാരുമാണ്. രാജ്യത്തെ സുതാര്യമായ സാമ്പത്തിക സംവിധാനത്തെ വെല്ലുവിളിക്കുന്ന ഇത്തരം സ്ഥാപനങ്ങള്ക്കെതിരെ അന്വേഷണം നടത്തി നടപടിയെടുക്കണമെന്നും അദ്ദേഹം ആവശ്യപ്പെട്ടു.
