കണ്ണാടിപ്പറമ്പ്: കണ്ണാടിപ്പറമ്പില് നടന്നുവരുന്ന മഹാരുദ്ര യജ്ഞത്തില് കാര്മ്മികത്വം വഹിച്ച ഒമ്പതു വയസ്സുകാരന് ശ്രദ്ധേയനാകുന്നു. മലബാറിലെ പ്രശസ്തമായ താന്ത്രിക പരമ്പരയിലുള്ള ഇല്ലമാണ് കൊളച്ചേരിയിലെ കരുമാരത്തില്ലം. ഇപ്പോഴത്തെ തന്ത്രിമുഖ്യന് കരുമാരത്തില്ലത്ത് പരമേശ്വരന് നമ്പൂതിരിപ്പാടാണ്. ഈ പരമ്പരയിലെ ഇളയ തലമുറക്കാരനാണ് ഒമ്പതു വയസ്സുകാരന് ശ്രീരാം.കെ നമ്പൂതിരിപ്പാട്. പരമേശ്വരന് നമ്പൂതിരിപ്പാടിന്റെ അനുജന് രാമന് നമ്പൂതിരിപ്പാടിന്റെ മകന് കരുമാരത്തില്ലത്ത് കൃഷ്ണകുമാര് നമ്പൂതിരിപ്പാടിന്റെ മകനാണ് ഈശാനമംഗലം സാന്ദീപനിവിദ്യാലയത്തിലെ നാലാം ക്ലാസ്സ് വിദ്യാര്ത്ഥിയായ ശ്രീരാം. എട്ടാം വയസില് ഉപനയനം കഴിഞ്ഞ് ഒരുവര്ഷം കൊണ്ടു തന്നെ പൂജാദികര്മങ്ങളും സൂക്തങ്ങളും ശ്രീരുദ്രമന്ത്രങ്ങളുമൊക്കെ അഭ്യസിച്ചു കഴിഞ്ഞു. വേദപഠനം നടത്തിക്കൊണ്ടിരിക്കുന്നു. അസാമാന്യ പാടവമാണ് പൂജാദി തന്ത്രകര്മ്മങ്ങളില് ശ്രീരാം പ്രകടിപ്പിക്കുന്നതെന്ന് ഗുരുസ്ഥാനത്ത് നില്ക്കുന്ന അച്ഛന് കൃഷ്ണകുമാര് നമ്പൂതിരിപ്പാട് പറയുന്നു. കാലത്ത് 3 മണിക്ക് എഴുന്നേറ്റ് പ്രാതസന്ധ്യാവന്ദനം കഴിഞ്ഞ് ഇല്ലത്തെ പരദേവതാ ക്ഷേത്രത്തിലെ തേവാരവും പൂജാകര്മങ്ങളും ചെയ്താണ് വിദ്യാലയപഠനങ്ങളും മിടുക്കനായ ശ്രീരാം നടത്തുന്നത്. ഇതിനൊക്കെ പുറമെ കാരാട്ടേയില് ഗ്രീന് ബെല്റ്റ്കാരന് കൂടിയാണ് ഈ പ്രതിഭ.
കണ്ണാടിപ്പറമ്പ് ധര്മശാസ്താ ശിവക്ഷേത്രത്തില് നടന്നു വരുന്ന മഹാരുദ്രത്തില് അച്ഛനൊപ്പം ശ്രീരാം ശ്രീരുദ്രമന്ത്രജപത്തില് പങ്കെടുത്തു വരുന്നു. കഴിഞ്ഞ ദിവസം ഭഗവതിസേവാകര്മങ്ങള്ക്കും ഈ ഉണ്ണിനമ്പൂതിരിയാണ് കാര്മികത്വം വഹിച്ചത്.
മഞ്ചേരി പൂങ്കുടില് മനയിലെ ശ്രീദേവി അന്തര്ജ്ജനമാണ് അമ്മ. സാന്ദീപനി വിദ്യാലയത്തിലെ ഒന്നാം ക്ലാസ് വിദ്യാര്ത്ഥിനി ശ്രീവേദിക ഏക സഹോദരിയാണ്.
