ഡിവൈഎസ്പി വൈ.ആര്. റസ്റ്റം അമേഷിന് വീല്ചെയര്
കൈമാറുന്നു
ചേര്ത്തല: അമേഷിന്റെ യാത്രക്ക് കാരുണ്യത്തിന്റെ കൈത്താങ്ങൊരുക്കി നവമാദ്ധ്യമക്കൂട്ടായ്മ. ജന്മനാ കാലുകള് തളര്ന്ന അമേഷിന്റെ ഇലക്ട്രിക് വീല്ചെയറെന്ന സ്വപ്നമാണ് ചേര്ത്തലയുടെ സ്വന്തം കൂട്ടുകാര് എന്ന ഫെയ്സ്ബുക്ക് കൂട്ടായ്മയിലൂടെ സാദ്ധ്യമായത്.
നഗരസഭ 22-ാം വാര്ഡില് പുത്തേഴത്ത് വീട്ടില് അമേഷ് ആഞ്ഞിലിപ്പാലം ലെവല് ക്രോസിന് സമീപം ലോട്ടറി വിറ്റാണ് ഉപജീവനം കഴിക്കുന്നത്. മുച്ചക്രവാഹനത്തില് ലോട്ടറിവില്ക്കുന്ന ഇരുപത്തിനാലുകാരനും സഹായത്തിനായി കൂട്ടിരിക്കുന്ന അമ്മയും ചേര്ത്തലക്കാര്ക്ക് സുപരിചിതരാണ്. പൊട്ടിപ്പൊളിഞ്ഞ റോഡിലൂടെയുള്ള അമേഷിന്റെ യാത്ര മാദ്ധ്യമങ്ങളില് ഇടംപിടിച്ചിരുന്നു.
ഇയാളുടെ ദുരിതജീവിതം നേരില് ബോധ്യപ്പെട്ടതോടെയാണ് കൂട്ടായ്മപ്രവര്ത്തകര് ഇവരെ സഹായിക്കുന്നതിനായി മുന്നിട്ടങ്ങിറങ്ങിയത്. സപ്തംബര് 12 നാണ് ശാരീരിക വൈകല്യമുള്ള യുവാവിന്റെ വിഷമതകള് ഫെയ്സ്ബുക്ക് കൂട്ടായ്മയിലെ അംഗങ്ങള് പങ്കുവെച്ചത്. ദിവസങ്ങള്ക്കുള്ളില് വീല്ചെയറിന്റെ വിലയായ 1,03,000 രൂപ സമാഹരിക്കാനായി.
ചേര്ത്തല ആസ്ഥാനമായുള്ള കൂട്ടായ്മയിലെ അംഗങ്ങള് ധനസമാഹരണത്തില് കണ്ണികളായി. കരുവായില് ഗവ. എല്പി സ്കൂളില് നടന്ന ചടങ്ങില് ഡിവൈഎസ്പി വൈ.ആര്. റെസ്റ്റം വീല്ചെയര് കൈമാറി. അശ്വതി രാജന് അദ്ധ്യക്ഷത വഹിച്ചു. കൗണ്സിലര് മാധുരി സാബു, ചേര്ത്തല തെക്ക് പഞ്ചായത്ത് അംഗം സുധീഷ്, സോബിന്, ലീലാലക്ഷ്മി എന്നിവര് പ്രസംഗിച്ചു. സനല്കുമാര്, റഷീദ് കണ്ണാര്കാട്, ബിനീഷ്ബാബു, സന്ദീപ്, സോംജിത്ത് എന്നിവര് നേതൃത്വം നല്കി.
