നമ്മുടെ നിത്യജീവിതത്തില് നമ്മള് കൊണ്ടുനടക്കുന്ന ബാഹ്യമായ ഒരു കെട്ടുകാഴ്ചയല്ല, വാസ്തവത്തില് ഹിന്ദുമതം. അത് യഥാര്ത്ഥത്തില് പൂര്ണതയുടെ ശാസ്ത്രമാണ്. വ്യക്തിപരമായും സാമൂഹികമായും ദേശീയമായും അന്താരാഷ്ട്രീയമായുമുള്ള എല്ലാ പ്രശ്നങ്ങള്ക്കുമുള്ള ഉത്തരവും അതിലുണ്ട്.
എന്നാല് ഇന്ന് നമ്മള് അന്ധമായി പിന്തുടരുന്ന ഹിന്ദുമതം യഥാര്ത്ഥത്തിലുള്ള മഹത്തായ ഹിന്ദുമതമല്ല. ഇത് നമ്മളുടെമേല് എപ്പോഴോ അടിച്ചേല്പ്പിക്കപ്പെട്ട കാപട്യം നിറഞ്ഞ ഒരു സമ്പ്രദായം മാത്രമാണ്. സ്വാര്ത്ഥരും ധിക്കാരികളും അധികാരഭ്രാന്തന്മാരുമായ ഒരുകൂട്ടം പുരോഹിതന്മാരാണ് ഇതിന് ഉത്തരവാദികള്. അവര് മെനഞ്ഞെടുത്ത ചിട്ടവട്ടങ്ങള്ക്കും നമ്മുടെതന്നെ വിചാരവികാരങ്ങള്ക്കും നമ്മെ അടിമകളാക്കുക എന്നതായിരുന്നു അവരുടെ ഉദ്ദേശ്യം.
ഹിന്ദുമതത്തെ അട്ടിമറിക്കാന് അവര് നടത്തിയ ശ്രമം എത്രത്തോളം വിജയിച്ചു എന്നതിനുള്ള തെളിവാണ് ഇന്നത്തെ ഹിന്ദു അനുഭവിക്കുന്ന മതപരമായ അജ്ഞത. ഹിന്ദുമതത്തിന്റെ നട്ടെല്ലായ വേദത്തിലെ അടിസ്ഥാനപ്രമാണങ്ങളെ ഈ പുരോഹിതന്മാരുടെ വാക്കുകേട്ട് നമ്മള് അവഗണിച്ചു. യഥാര്ത്ഥ ഹിന്ദുമതം ഉപനിഷത്തുകള് ഉദ്ഘോഷിക്കുന്ന സനാതനധര്മമാണ്.
ഉപനിഷത്തുകള് അസന്ദിഗ്ധമായി ഉദ്ഘോഷിക്കുന്നു, മനുഷ്യന് അവന്റെ പൂര്ണതയില് ഈശ്വരന് തന്നെയാകുന്നു. മനുഷ്യനിലുള്ള ദിവ്യത്വത്തെയും സൗന്ദര്യത്തെയും മറച്ചുപിടിക്കുന്ന എല്ലാ അപൂര്ണതകളെയും ചിട്ടയോടും ശാസ്ത്രീയമായുമുള്ള ദൈനംദിന ജീവിതചര്യകളിലൂടെ ബോധപൂര്വം ശുദ്ധീകരിച്ച് ജീവിക്കുവാന് ഉപനിഷത്തുകള് അവനെ ഉപദേശിക്കുന്നു. ഒരു വ്യക്തിയെ സ്വപ്രയത്നത്താല് ശുദ്ധീകരിക്കുകയും വികസിപ്പിക്കുകയും ചെയ്ത് അവന്റെ യഥാര്ത്ഥ സ്വരൂപത്തെ സാക്ഷാത്കരിക്കാന് അവന് ബോധപൂര്വം കൈക്കൊള്ളേണ്ട മാര്ഗങ്ങളാണ് ഹിന്ദുമതത്തിന്റെ അന്തഃസത്ത. ഒട്ടനവധി പുരാണങ്ങളും ശാസ്ത്രങ്ങളും പ്രകരണഗ്രന്ഥങ്ങളും തികച്ചും വ്യത്യസ്തമായ ഒരായിരം അര്ത്ഥവ്യഖ്യാനങ്ങളുംകൂടി തീര്ത്ത കനത്ത മറയ്ക്കു പിറകില് ഹിന്ദുമതം എന്ന വിശാലമായ രംഗവേദി ഭദ്രമായി കാത്തുസൂക്ഷിക്കപ്പെട്ടിരിക്കുന്നു.
സനാതനമായ സത്യത്തിന്റെ ക്ഷേത്രമാണത്. എന്നാല് വേണ്ടതിലധികം വളര്ന്നുപൊങ്ങിയ പുറംകാടുകള് ആ ക്ഷേത്രത്തിന്റെ യഥാര്ത്ഥ സൗന്ദര്യത്തെയും ഗാംഭീര്യത്തെയും മറച്ചുപിടിക്കുകയാണ്. അതിന്റെ ഫലമായി കോളജ് വിദ്യാഭ്യാസം നേടിയ ഇന്നത്തെ വിവരംകെട്ട ജനങ്ങള് ക്ഷേത്രത്തെ കാണുന്നില്ല. അവരുടെ കണ്ണില്പ്പെടുന്നത് പുറത്തുള്ള കൊടിതോരണങ്ങള് മാത്രമാണ്. അതിനുള്ള പ്രധാന കാരണം, ഋഷീശ്വരന്മാരുടെ ഭാഷയായ സംസ്കൃതത്തെക്കുറിച്ചും അവരുടെ ഭാഷാപ്രയോഗത്തിന്റെ രീതിയെക്കുറിച്ചുമുള്ള അജ്ഞതയാണ്.
ഹിന്ദുമതം എന്നാല് യഥാര്ത്ഥത്തില് എന്താണ്? നിത്യജീവിതത്തില് നമ്മള് നേരിടുന്ന നിരവധി പ്രശ്നങ്ങളെ അഭിമുഖീകരിക്കാനുതകുന്ന സന്ദേശമാണ് അതിന് നല്കാനുള്ളത്. ഇതെല്ലാം മനസ്സില് കരുതിക്കൊണ്ട് നമ്മുടെ മതത്തിന്റെ മൗലികമായ പ്രമാണഗ്രന്ഥങ്ങളിലൂടെ ഒരന്വേഷണം. അതാണ് ഉപനിഷത് യജ്ഞത്തിന്റെ ഉദ്ദേശ്യം.
മതത്തിന്റെ ആദര്ശങ്ങള്ക്കനുസരിച്ച് ജീവിക്കുവാന് മതാനുയായികള് തയ്യാറാവുന്നില്ലെങ്കില് ആ മതം നിഷ്ഫലവും നിര്ജീവവുമാവും. രാഷ്ട്രീയപരമോ സാംസ്കാരികപരമോ സാമൂഹികപരമോ ആയ ഏതെങ്കിലും ഒരു തത്ത്വശാസ്ത്രം അതിന്റെ ആദര്ശങ്ങള്ക്കൊത്ത് ജീവിക്കാതെ അതിന്റെ വാഗ്ദത്ത വിജയഭൂമിയിലേക്ക് നമ്മെ നയിക്കുമോ?
