തളിപ്പറമ്പ്: ടൗണില് അലഞ്ഞുതിരിഞ്ഞു നടക്കുന്ന മധ്യവയസ്കനെ അടിച്ചുകൊന്ന സംഭവത്തില് വ്യാപാരി ഉള്പ്പെടെ രണ്ടുപേര് അറസ്റ്റിലായി. കൂവേരി വള്ളിക്കടവ് സ്വദേശി കാനാ മഠത്തില് പ്രഭാകരനെ(55)കൊലപ്പെടുത്തിയ കേസില് തളിപ്പറമ്പ് മാര്ക്കറ്റ് റോഡില് മലബാര് വെജിറ്റബിള്സ് ഉടമ ഫാറൂഖ് നഗറിലെ കൊടിയില് മുസ്തഫ(35), കടയിലെ ജീവനക്കാരന് മുയ്യം വരഡൂലിലെ കണ്ടോത്ത് പുതിയ പുരയില് ആഷിഫ്(24)എന്നിവരാണ് അറസ്റ്റിലായത്. സംഭവവുമായി ബന്ധമുള്ള ആഷിഫിന്റെ സുഹൃത്ത് ചവനപ്പുഴയിലെ മിര്ഷാദ്(20)ഒളിവിലാണ്. കഴിഞ്ഞ 28 ന് പുലര്ച്ചെയാണ് പ്രഭാകരനെ സയ്യിദ് നഗറില് സംശയാസ്പദമായ നിലയില് മരിച്ച നിലയില് കണ്ടെത്തിയത്. തളിപ്പറമ്പില് അലഞ്ഞുതിരിഞ്ഞു നടക്കുന്ന പ്രഭാകരന് ചെറിയ മോഷണങ്ങള് നടത്താറുണ്ടായിരുന്നുവത്രെ. മനോരോഗി കൂടിയായ ഇയാള് മുസ്തഫയുടെ കടയില് നിന്നും പഴങ്ങള് മോഷ്ടിക്കുന്നത് പതിവായിരുന്നു. മോഷ്ടാവിനെ പിടികൂടാന് തീരുമാനിച്ച മുസ്തഫ 28 ന് പുലര്ച്ചെ പ്രഭാകരനെ പിടികൂടുകയായിരുന്നു. തുടര്ന്ന് ഇയാളെ കാറില് കയറ്റി കൊണ്ടുപോയി ക്രൂരമായി മര്ദ്ദിച്ച ശേഷം ഉപേക്ഷിക്കുകയാണ് ചെയ്തത്. മര്ദ്ദനത്തിന് ശേഷം ഉപേക്ഷിക്കപ്പെട്ട പ്രഭാകരന് രക്തം വാര്ന്ന് മരിക്കുകയായിരുന്നു. പ്രഭാകരനെ കയറ്റിക്കൊണ്ടുപോയ കെ.എല് 59 കെ 110 നമ്പര് സ്വിഫ്റ്റ് കാറും കസ്റ്റഡിയിലെടുത്തിട്ടുണ്ട്. തളിപ്പറമ്പ് സിഐ പ്രേമചന്ദ്രന്റെ നേതൃത്വത്തില് നടത്തിയ അന്വേഷണത്തിലാണ് പ്രതികള് പിടിയിലായത്.
മധ്യവയസ്കനെ അടിച്ചുകൊന്ന സംഭവം: വ്യാപാരി ഉള്പ്പെടെ രണ്ടുപേര് അറസ്റ്റില്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.