കണ്ണൂര്: രാജ്യം കത്തിയെരിയുമ്പോള് വീണവായിച്ച നീറോ ചക്രവര്ത്തിയെ അനുസ്മരിക്കുമാറ് സ്വന്തം നാടായ പിണറായിയില് ഉള്പ്പെടെ സ്വന്തം പാര്ട്ടിക്കാരുടെ നേതൃത്വത്തില് കൊലപാതകവും അക്രമവും അരങ്ങു തകര്ക്കുമ്പോള് ഉദ്ഘാടനവും സ്ഥാപനങ്ങളുടെ തറക്കല്ലിടലും നടത്താനായി മുഖ്യമന്ത്രി ഇന്ന് കണ്ണൂരില്. സ്വന്തം മണ്ഡലത്തില് 48 മണിക്കൂറിനുളളില് 2 കൊലപാതകവും 16 വീടുകള് പൂര്ണ്ണമായും തകര്ക്കപ്പെടുകയും ചെയ്തിട്ടും അക്രമങ്ങളെ അപലപിക്കാനോ സമാധാനത്തിനായി എന്തെങ്കിലും നടപടികളോ സ്വീകരിക്കാന് മുഖ്യമന്ത്രിയെന്ന നിലയില് തയ്യാറാകാത്ത പിണറായി വിജയന്റെ നടപടി പരക്കെ വിമര്ശിക്കപ്പെടുകയാണ്. എല്ഡിഎഫ് അധികാരത്തിലെത്തി നാലു മാസത്തിനുളളില് 500 ലധികം അക്രമങ്ങളാണ് കണ്ണൂര് ജില്ലയില് മാത്രം നടന്നത്. ഇത്രയും അക്രമങ്ങളുണ്ടായിട്ടും അക്രമത്തെ അപലപിക്കാനോ സമാധാനം പുലര്ത്താന് തയ്യാറാകണമെന്ന് ആഹ്വാനം ചെയ്യാനോ ഇതുവരെ മുഖ്യമന്ത്രി തയ്യാറായിട്ടില്ല. പാര്ട്ടി പ്രവര്ത്തകര്ക്ക് അക്രമം നടത്താനുളള ഒത്താശ ചെയ്യുന്ന നിലപാടാണ് മുഖ്യമന്ത്രിയുടെ ഭാഗത്തു നിന്നും ഉണ്ടാകുന്നതെന്ന ആരോപണം ശക്തമാണ്.
കഴിഞ്ഞകാലങ്ങളില് സംസ്ഥാനത്ത് ഭരണം നടത്തിയ മുഖ്യമന്ത്രിമാര് കണ്ണൂരില് തുടര് അക്രമങ്ങളുണ്ടായ ഘട്ടങ്ങളിലെല്ലാം സമാധാന ശ്രമങ്ങള്ക്ക് മുന്കയ്യെടുക്കുകയുണ്ടായി. എന്നാല് ചരിത്രത്തിലില്ലാത്ത വിധം അക്രമങ്ങള് ജില്ലയിലാകമാനം സിപിഎമ്മിന്റെ നേതൃത്വത്തില് നടത്തിയിട്ടും മൗനം ദീക്ഷിക്കുന്ന മുഖ്യമന്ത്രിയുടെ നടപടിക്കെതിരെ വിവിധ രാഷ്ട്രീയ പാര്ട്ടികളില് ശക്തമായ പ്രതിഷേധത്തിന് കാരണമായിട്ടുണ്ട്. ആഭ്യന്തര വകുപ്പു കൂടി കൈകാര്യം ചെയ്യുന്ന മുഖ്യമന്ത്രിയെന്ന നിലയില് പിണറായി വിജയന് നേരിട്ട് സമാധാന ശ്രമങ്ങള്ക്ക് മുന്കയ്യെടുക്കണമെന്ന ആവശ്യം പൊതുസമൂഹത്തില് നിന്നും ബിജെപിയുള്പ്പെടെയുളള രാഷ്ട്രീയ പാര്ട്ടികളില് നിന്നും ഉയര്ന്നിട്ടുണ്ട്.
