യജ്ഞന് എന്നത് ഭഗവാന്റെ നാമമാണ്. ശ്രീകൃഷ്ണനെ പൂജിക്കുക എന്നതുതന്നെ ഏറ്റവും ഉത്കൃഷ്ടമായ യജ്ഞം. യജ്ഞശിഷ്ടം എന്നത് ഭഗവാന് നിവേദിച്ച പ്രസാദമായ പായസം മുതലായവയാണ്. ആ അമൃത് ഭുജിക്കുന്നവരെയാണ് ‘യജ്ഞശിഷ്ടാമൃതഭുജ:’ എന്ന് ഭഗവാന് തന്നെ പറയുന്നത്. അവര് സനാതനമായ എന്നും നശിക്കാത്ത-ബ്രഹ്മത്തെ പ്രാപിക്കുന്നു-ശ്രീകൃഷ്ണഭഗവാന്റെ ലോകം പ്രാപിക്കുന്നു.
”ആ ബ്രഹ്മഭുവനാല് ലോകാഃ
പുനരാവര്ത്തിനോര്ജ്ജുന!
മാമുവേത്യതു കൗന്തേയ
പുനര് ജന്മ ന വിദ്യതേ
(ഗീ-15-16)
(ബ്രാഹ്മാവിന്റെ ലോകംമുതല് എല്ലാ ദിവ്യലോകങ്ങളും നശിക്കുകയും വീണ്ടും ആവര്ത്തിച്ച് ഉണ്ടാവുന്നവയാണ്. എന്റെ ലോകത്തില് എത്തിയവര്ക്ക് പുനര്ജന്മമില്ല.)
യജ്ഞാനുഷ്ഠാനം ചെയ്യാത്തവന്റെ അവസ്ഥ
അയജ്ഞന്- ഒരുതരത്തിലുള്ള യജ്ഞവും അനുഷ്ഠിക്കാത്തവന് ഈ മനുഷ്യലോകത്തിലെ ചെറിയ തോതിലുള്ള സുഖം പോലും ലഭിക്കുകയില്ല. പിന്നെ ദിവ്യലോകങ്ങളിലെ സുഖം കിട്ടുകയില്ല എന്നു പറയേണ്ടതുണ്ടോ? അതുകൊണ്ട് ഏറ്റവും ലളിതമായ രീതിയില് അത്യന്തം ശ്രദ്ധയോടെ, ഭക്തിയോടെ പൂജിക്കുകയും നിവേദ്യം സമര്പ്പിച്ച് ആ യജ്ഞശിഷ്ടാമൃതം ഭുജിച്ച്, എല്ലാ ഭൗതിക കല്മഷങ്ങളും നശിപ്പിച്ച് ഭഗവദീയാനന്ദം അനുഭവിക്കാം.
”പത്രം പുഷ്പം ഫലം തോയം
യോമേ ഭക്ത്യാ പ്രയച്ഛതി
തദഹം ഭക്ത്യു പഹൃതം
അശ്നാമി പ്രയതാത്മനഃ”
(ഗീത)
ഭഗവാന് പറയുന്നു-ജലംകൊണ്ട് എന്റെ വിഗ്രഹത്തില് അഭിഷേകം ചെയ്ത ആ തീര്ത്ഥം സേവിക്കൂ! തുളസിയിലകൊണ്ടും മറ്റു പുഷ്പങ്ങള്കൊണ്ടും എന്നെ അര്ച്ചിച്ച് പ്രസാദം ശിരസ്സില് ധരിക്കൂ! പഴം മുതലായ പദാര്ത്ഥങ്ങള് നിവേദിച്ച് ആ പ്രസാദം ഭുജിക്കൂ. ഞാന് പൂജ-യജ്ഞം സ്വീകരിക്കും)
