ചേര്ത്തല: മെഡിക്കല് സ്റ്റോറിലെ പൂട്ടുപൊളിച്ച് ഒന്നേകാല് ലക്ഷത്തോളം രൂപ കവര്ന്ന കേസിലെ കൂട്ടുപ്രതിയും അറസ്റ്റിലായി. കഴിഞ്ഞ ദിവസം പിടിയിലായ തുറവൂര് വളമംഗലം വടക്ക് മല്ലികശേരില് എസ്. ധനേഷ്കുമാറി(32)ല് നിന്നു ലഭിച്ച വിവരത്തിന്റെ അടിസ്ഥാനത്തിലാണ് ചേര്ത്തല സിഎംസി 35 കൊച്ചുവെളി എം. കൃഷ്ണകുമാറി(26)നെ ഇന്നലെ ചേര്ത്തല പോലീസ് അറസ്റ്റ് ചെയ്തത്.
ജയില്പുള്ളികള്ക്ക് കഞ്ചാവ് എത്തിച്ചുകൊടുക്കുന്നത് ഉള്പ്പെടെ നിരവധി ക്രിമിനല് കേസുകളിലെ പ്രതികളാണിവര്. മോഷണകേസില് ജയിലിലായിരുന്ന ധനേഷ് കുമാര് ഒന്നരമാസം മുമ്പാണ് പുറത്തിറങ്ങിയത്. ചേര്ത്തല ലളിത മെഡിക്കല്സില് നിന്നു മോഷ്ടിച്ച തുകയില് 10,000 രൂപ കുറച്ചും സിസിടിവി ക്യാമറകളും പോലീസ് കണ്ടെടുത്തു. നിലവില് പത്തോളം മോഷണകേസുകളിലെ പ്രതികളാണിവര്. നഗരത്തിലെ ക്യാപ് സ്റ്റോക്സ് സെക്യൂരിറ്റീസ് ഇന്ത്യ, യുവര് കോളജ്, സിഗ്നേച്ചര് മെന്സ് ക്ലോത്തിങ്, ഒളിംപിക്സ് സ്പോര്ട്സ്, പ്രസന്റ് ബ്യൂട്ടിപാര്ലര് എന്നിവിടങ്ങളില് നിന്നുമായി മൂന്നുലക്ഷം രൂപയും സാധനസാമഗ്രികളുമാണ് ഇവര് മോഷ്ടിച്ചതെന്ന് പോലീസ് പറഞ്ഞു.
മോഷ്ടിക്കുന്ന സാധനങ്ങള് വില്ക്കുവാന് സഹായിക്കുന്നത് കൃഷ്ണകുമാറാണെന്നും പോലീസ് പറഞ്ഞു. പുലര്ച്ചെ എറണാകുളം റെയില്വേ സ്റ്റേഷനില് നിന്നു ഇന്റര്സിറ്റി ഉള്പ്പെടെയുള്ള ട്രെയിനുകളില് കയറിയും ഇവര് മോഷണം നടത്തിയിരുന്നു.
ദീര്ഘദൂര ട്രെയിനുകളില് യാത്രക്കാര് മയക്കത്തിലാകുമ്പോള് ഇവരുടെ ബാഗുകളും പണവും മൊബൈലും മറ്റും മോഷ്ടിക്കാറാണ് പതിവ്. ഉറക്കഗുളികയും കഞ്ചാവും പൂട്ടുപൊളിക്കുവാനുള്ള ചെറിയ ഉപകരണങ്ങളും അടങ്ങുന്ന ബാഗുമായാണ് ധനേഷ് സഞ്ചരിക്കാറെന്നും പോലീസ് പറഞ്ഞു.
ചേര്ത്തലയില് മോഷണം നടത്തിയ സ്ഥാപനങ്ങളില് പ്രതികളെ എത്തിച്ച് പോലീസ് തെളിവെടുപ്പ് നടത്തി. കോടതിയില് ഹാജരാക്കിയ പ്രതികളെ റിമാന്ഡ് ചെയ്തു. ഡിവൈഎസ്പി വൈ.ആര്. റെസ്റ്റോം, സിഐ വി.പി. മോഹന്ലാല്, എസ്ഐ എ.വി. സൈജു, സീനിയര് സിപിഒമാരായ അബിന് കുമാര്, മനു മോഹന്, ശ്രീകാന്ത് എസ്. വിജയ്, വി. സുരാജ്, എസ്. ടെന്സണ് തോമസ്, വിമല്റോയ് എന്നിവരുടെ നേതൃത്വത്തിലുള്ള സംഘമാണ് പ്രതികളെ കുടുക്കിയത്.
