പഴയങ്ങാടി: മലബാര് ജില്ലകളിലെ വിദ്യാലയങ്ങളുടെ സംരക്ഷണത്തിനും കൂട്ടായ്മയ്ക്കും വേണ്ടി രൂപവല്കൃതമായ അണ് എയിഡഡ് സ്കൂള് അസോസിയേഷന്റെ ഉദ്ഘാടനവും കണ്ണൂര്, കാസര്കോട് ജില്ലാതല പ്രശ്നോത്തരി മത്സരവും ഗാന്ധിജയന്തി ദിനമായ ഇന്ന് നടക്കുമെന്ന് ഭാരവാഹികള് പത്രസമ്മേളനത്തില് പറഞ്ഞു.
മാടായിപ്പാറ എസ്.എന് കിംഗ്വുഡ് സ്കൂളില് രാവിലെ പത്തു മണിക്ക് നടക്കുന്ന ചടങ്ങില് കണ്ണൂര് സര്വ്വകലാശാല രജിസ്ട്രാര് ഡോ.ബാലചന്ദ്രന് കീഴോത്ത് അസോസിയേഷന്റെയും പ്രശ്നോത്തരി മത്സരത്തിന്റെയും ഉദ്ഘാടനം നിര്വ്വഹിക്കും. മാടായി ഗ്രാമ പഞ്ചായത്ത് പ്രസിഡണ്ട് എസ്.കെ.ആബിത അധ്യക്ഷത വഹിക്കും. അസോസിയേഷന് ചെയര്മാന് ഉദിനൂര് സുകുമാരന് മുഖ്യപ്രഭാഷണം നടത്തും. ഗ്രാമ പഞ്ചായത്ത് അംഗം കെ. ശ്രീനിവാസന് മാസ്റ്റര്, കണ്വീനര് കെ.ജി.ഗോപാലകൃഷ്ണന് എന്നിവര് സംസാരിക്കും. അസോസിയേഷന് ജനറല് കണ്വീനര് വി. കെ. നാരായണന് മാസ്റ്റര് സമ്മാനദാനം നിര്വ്വഹിക്കും. അസോസിയേഷന് വൈസ് ചെയര്മാന് പി.പി.കരുണാകരന് മാസ്റ്റര് സ്വാഗതവും റിട്ട.എ.ഇ.ഒ കെ. വി. നാരായണന് നന്ദിയും പറയും. തുടര്ന്ന് കണ്ണൂര്, കാസര്കോട് ജില്ലകളിലെ അണ് എയിഡഡ് സ്കൂളുകളിലെ വിദ്യാര്ത്ഥികളെ പങ്കെടുപ്പിച്ച് പ്രശ്നോത്തരി മത്സരം നടക്കും. എല്.പി, യു.പി.വിഭാഗങ്ങളിലെ കുട്ടികള്ക്ക് പ്രത്യേകം മത്സരം ഉണ്ടാകും. ഒരു വിഭാഗത്തിലേക്ക് ഒരു വിദ്യാലയത്തില് നിന്നും രണ്ടു കുട്ടികളെ വീതം പങ്കെടുപ്പിക്കാന് അവസരമുണ്ട്. മത്സരത്തിന്റെ രജിസ്ട്രേഷന് രാവിലെ 9.30 ന് തുടങ്ങുന്നതാണ്. വിജയികളില് ഒന്നും രണ്ടും മൂന്നും സ്ഥാനം നേടുന്ന മികച്ച കുട്ടികള്ക്ക് ഉപഹാരവും സര്ട്ടിഫിക്കറ്റും സമ്മാനമായി നല്കും.
പൊതുവിദ്യാലയങ്ങളോടൊപ്പം കൂട്ടികള്ക്ക് മെച്ചപ്പെട്ട വിദ്യാഭ്യാസം നല്കിവരുന്ന സ്വകാര്യ മേഖലകളിലെ സ്കൂളുകളെയും സംരക്ഷിക്കുന്നതിനും വളര്ത്തുന്നതിനും നടപടിയുണ്ടാകണമെന്ന് ഭാരവാഹികള് സര്ക്കാരിനോട് ആവശ്യപ്പെട്ടു. ഈ മേഖലയിലെ വിദ്യാഭ്യാസ സ്ഥാപനങ്ങള് നേരിടുന്ന പ്രതിസന്ധികളും പ്രയാസങ്ങളും സര്ക്കാരിനെയും പൊതുസമൂഹത്തെയും ധരിപ്പിക്കുന്നതിനും നീതിക്കായി ശബ്ദം ഉയര്ത്തുന്നതിനും വേണ്ടിയാണ് സംഘടന പ്രവര്ത്തിക്കുക. മാനേജ്മെന്റ്, അധ്യാപക പ്രതിനിധികള് അസോസിയേഷനില് അംഗങ്ങളായിരിക്കും. പഠന നിലവാരം മെച്ചപ്പെടുത്തുന്നതിനും വിദ്യാര്ത്ഥികളുടെ കലാ, കായിക, ശാസ്ത്ര രംഗങ്ങളിലെ കഴിവുകള് പരിപോഷിപ്പിക്കുന്നതിനും വിദ്യാലയ അന്തരീക്ഷം മെച്ചപ്പെടുത്തുന്നതിനും പരീക്ഷ സമ്പ്രദായം ഏകീകരിക്കാനുള്ള നടപടികളും സ്വന്തം നിലക്ക് ഏറ്റെടുക്കും. സ്കൂള് യുവജനോത്സവത്തിന്റെ മാതൃകയില് കലോത്സവങ്ങളും കായിക മേളകളും സംഘടിപ്പിക്കും. മികവ് 16 എന്ന പേരിലുള്ള കൂട്ടായ്മയ്ക്കാണ് ഗാന്ധിജയന്തി ദിനത്തില് തുടക്കം കുറിക്കുന്നതെന്നും ഭാരവാഹികള് വ്യക്തമാക്കി. അസോസിയേഷന് ചെയര്മാന് ഉദിനൂര് സുകുമാരന്, വൈസ് ചെയര്മാന് പി.പി.കരുണാകരന്, ട്രഷറര് എം.കെ.രാജീവന്, സി. ഭാസ്ക്കരന് എന്നിവര് പത്രസമ്മേളനത്തില് പങ്കെടുത്തു.
