കണ്ണൂര്: വയോജനങ്ങളുടെ സംരക്ഷണം ഏറ്റെടുക്കാന് കൂടതല് കൂട്ടായ്മകള് വേണമെന്ന് കേരളാ സ്റ്റേറ്റ് പെന്ഷനേഴ്സ് സംഘ് സംസ്ഥാന വൈസ് പ്രസിഡണ്ട് രവീന്ദ്രനാഥ് ചേലേരി. സര്വ്വമംഗള സേവാകേന്ദ്രത്തില് വയോജന ദിനാചരണ പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. വയോജനങ്ങളുടെ ഒറ്റപ്പെടലാണ് ഇന്ന് സമൂഹം നേരിടുന്ന വെല്ലുവിളികളിലൊന്ന്. വയോജനങ്ങളെ മക്കള് സംരക്ഷിക്കുന്നില്ലെങ്കില് നിയമപരമായി എങ്ങിനെ സംരക്ഷണം ഉറപ്പ് വരുത്താമെന്ന് ചിന്തിക്കണം. രക്ഷിതാക്കളുടെ സ്വത്ത് ലഭിച്ച ശേഷം സംരക്ഷണത്തില് നിന്ന് മക്കള് പിന്മാറുകയാണെങ്കില് പ്രസ്തുത രേഖ റദ്ദ് ചെയ്ത് സ്വത്ത് രക്ഷിതാക്കള്ക്ക് തന്നെ തിരിച്ചുനല്കുന്നതിനുള്ള നിയമം നിലവിലുണ്ട്. തിരികെ ലഭിക്കുന്ന സ്വത്തുപയോഗിച്ച് വയോജനങ്ങള്ക്ക് ജീവിതം സുഗമമാക്കാം. നിരവധി സേവന സംഘടനകള് ഇന്ന് വയോജന സംരക്ഷണ മേഖലയില് സജീവമാണെന്നും മാറിയ സാഹചര്യത്തില് ഇത്തരം പ്രവര്ത്തനങ്ങള് അനിവാര്യമാണെന്നും രവീന്ദ്രനാഥ് പറഞ്ഞു.
ചടങ്ങില് ഓലച്ചേരി രവി, എ.ദാമോദരന്, പി.കൃഷ്ണന് എന്നിവരെ ആദരിച്ചു. പെന്ഷനേഴ്സ് സംഘ് സംസ്ഥാന സെക്രട്ടറി സുധീര്യജ്ഞദാസ്, എന്ജിഒ സംഘ് ജില്ലാ സെക്രട്ടറി സജീവന് ചാത്തോത്ത്, ഭാരതീയ വിചാരകേന്ദ്രം കണ്ണൂര് സ്ഥാനീയ സമിതി സെക്രട്ടറി പി.വി.സുരേന്ദ്രനാഥ്, ഡോ.ബി.സി.സുരേന്ദ്രന് തുടങ്ങിയവര് സംസാരിച്ചു. ജില്ലാ പ്രസിഡണ്ട് സി.സി.രവീന്ദ്രന് മാസ്റ്റര് അധ്യക്ഷത വഹിച്ചു. ജില്ലാ സെക്രട്ടറി എ.കെ.രാമകൃഷ്ണന് സ്വാഗതവും ജില്ലാ വൈസ് പ്രസിഡണ്ട് എ.കെ.ഹരീന്ദ്രന് നന്ദിയും പറഞ്ഞു.
