കുട്ടനാട്: ഒരുമാസക്കാലമായി കുട്ടനാട്ടിലെ പാചകവാതക വിതരണം താറുമാറായി. കാവാലം, വെളിയനാട്, നീലംപേരൂര് ഗ്രാമപഞ്ചായത്തുകളിലാണ് ഏറ്റവുമധികം ഗ്യാസ് ക്ഷാമം നേരിടുന്നത്. കഴിഞ്ഞ ഓണനാളുകളിലും പാചകവാതകമില്ലാതെ വീട്ടമ്മമാര് ഏറെ നെട്ടോട്ടമോടി.
പല വീട്ടുകാരും കരിഞ്ചന്തയില് നിന്നു അമിത വിലകൊടുത്താണ് ഓണക്കാലത്തു പാചകവാതകം വാങ്ങിയത്. എന്നാല് ആവശ്യക്കാര് ഏറിയതോടെ ഇരട്ടിവിലകൊടുത്താലും നിറസിലിണ്ടറുകള് കിട്ടാനില്ലെന്നതാണ് അവസ്ഥ.ഭാരത് ഗ്യാസ് കമ്പനിയുടെ പാചകവാതകത്തിനാണ് കുട്ടനാട്ടില് കൂടുതല് ഉപഭോക്താക്കളുള്ളത്.
ചങ്ങനാശേരിയില് നിന്നുള്ള രണ്ടു ഏജന്സികളും, കുട്ടനാട്ടില് നിന്നുള്ള ഒരു ഏജന്സിയുമാണ് വിതരണം നടത്തുന്നത്. ഇവയില് ചങ്ങനാശേരിയില് നിന്നുള്ള ഒരു ഏജന്സിയുടെ ഉപഭോക്താക്കളാണ് ഏറ്റവുമധികം വലഞ്ഞത്. ഈ ഏജന്സിയുടെ വിതരണവാഹനം കഴിഞ്ഞ ഒരുമാസക്കാലമായി കുട്ടനാട്ടില് വിതരണം നടത്തിയിട്ടില്ലെന്നാണ് പരാതി.
എല്ലാ വെള്ളിയാഴ്ചകളിലും വിതരണം നടത്തുന്ന ഏജന്സിയുടെ പ്രവര്ത്തനം കാര്യക്ഷമമല്ലെന്നാണ് പരാതി. നിരവധി ആക്ഷേപങ്ങളാണ് ഈ ഏജന്സിക്കെതിരെ ഉയര്ന്നിട്ടുള്ളത്. എന്നാല് ചങ്ങനാശേരിയില് നിന്നുള്ള ഭാരത് ഗ്യാസിന്റെതന്നെ മറ്റൊരു ഏജന്സിയുടെ വിതരണവാഹനം മുടക്കം കൂടാതെ എത്തുന്നുമുണ്ടായിരുന്നു. ചങ്ങനാശേരിയില് നി്ന്നുള്ള ഏജന്സികള് ആഴ്ചയില് ഒരുദിവസം മാത്രമാണ് വിതരണത്തിനെത്തുന്നത്.
ഏതെങ്കിലും ഒരു ദിവസം വിതരണം മുടങ്ങിയാല് പകരം മറ്റൊരു ദിവസം വിതരണത്തിനെത്താറില്ലന്നു നാട്ടുകാര്ക്കു പരാതിയുണ്ട്. വിതരണവാഹനത്തില് നിന്നു വാങ്ങുന്ന പാചകവാതകത്തിനു വിലസ്ഥിരതയില്ലന്നും കൊടുക്കുന്ന പണത്തിനുള്ള ബില്ല് തരാറില്ലന്നും പരാതിയുണ്ട്.
