തളിപ്പറമ്പ്: നവരാത്രിക്കാലം തളിപ്പറമ്പിനെ സംഗീതസാന്ദ്രമാക്കാന് ബ്രാഹ്മണ സമൂഹമഠം ഒരുങ്ങി. രാജരാജേശ്വരത്തിനടുത്തെ തമ്പുരാന് നഗര് റസിഡന്റ്സ് അസോസിയേഷനുമായി കൈകോര്ത്താണ് തളിപ്പറമ്പ് ബ്രാഹ്മണ സമൂഹമഠം സംഗീതാര്ച്ചന നടത്തുന്നത്. രാജരാജേശ്വര ക്ഷേത്രത്തിന് തെക്ക് നീലകണ്ഠ അയ്യര് മെമ്മോറിയല് ഹാളില് പത്തുനാള് നീളുന്ന സംഗീതസായാഹ്നം. എല്ലാ ദിവസവും വൈകീട്ട് ആറിനാണ് കച്ചേരി തുടങ്ങുക. ആദ്യ ദിവസമായ ഒക്ടോബര് ഒന്നിന് ചെന്നൈയിലെ സംഗീതജ്ഞന് സി.എസ്.സജീവും സംഘവും കച്ചേരി അവതരിപ്പിക്കും. കര്ണാടക കീര്ത്തനങ്ങളാല് മൂന്നു മണിക്കൂര് നീളുന്ന ആലാപനത്തില് നാട് സംഗീതസാന്ദ്രമാകും. രണ്ടാം ദിവസമായ രണ്ടിന് പ്രശസ്ത സംഗീതജ്ഞന് കാഞ്ഞങ്ങാട് രാമചന്ദ്രന് കച്ചേരി അവതരിപ്പിക്കും. മൂന്നിന് എം.എസ്.സുബ്ബലക്ഷ്മി എന്ഡോവ്മെന്റ് ജേതാവ് വിവേക് മൂഴിക്കുളം, നാലിന് സംഗീതാചാര്യന് രാമന്നമ്പൂതിരി, അഞ്ചിന് കലാനിധി സംഗീതരത്ന അവാര്ഡ് ജേതാവ് ബേബിസൂര്യഗായത്രി, ആറിന് സംഗീതാചാര്യനും ഓള് ഇന്ത്യാ റേഡിയോ എ ഗ്രേഡ് ആര്ട്ടിസ്റ്റുമായ വെച്ചൂര് ശങ്കരന്, ഏഴിന് മംഗ്ലൂരുവിലെ സുചിത്രഹൊള്ള എന്നിവര് കച്ചേരി അവതരിപ്പിക്കും. എട്ടിന് ഭജന നടക്കും. കോഴിക്കോട്ടെ സുധയും സംഘവും ഭജനക്ക് നേതൃത്വം നല്കും. ഒമ്പതിന് ടി.ആര്.സുബ്രഹ്മണ്യ അയ്യരുടെ ശിഷ്യന് പാലക്കാട് എം.ബി.മണി കച്ചേരി അവതരിപ്പിക്കും. സമാപന ദിനമായ മഹാനവമി നാളില് കോഴിക്കോട്ടെ കൃഷ്ണഗീതിഭജന്സ് സംഘിന്റെ ഭജനയും അരങ്ങേറും.
തളിപ്പറമ്പിന്റെ വികസനത്തിന് ശിലയിട്ട കമ്പനി സ്വാമിയുടെ ഓര്മകള്ക്ക് പ്രണാമമായാണ് സംഗീത സായാഹ്നം നടത്തുന്നതെന്ന് അദ്ദേഹത്തിന്റെ പിന്തലമുറയില്പ്പെട്ട വിജയ്അയ്യര് നീലകണ്ഠന് പത്രസമ്മേളനത്തില് പറഞ്ഞു. വ്യാവസായികമായും സാമൂഹിക സാംസ്കാരികപരമായും ആദ്ധ്യാത്മികമായും തളിപ്പറമ്പില് നിറഞ്ഞുനില്ക്കുമ്പോഴും കമ്പനിസ്വാമി സംഗീതത്തെ കൈവെടിഞ്ഞിരുന്നില്ലെന്ന് പത്രസമ്മേളനത്തില് പങ്കെടുത്ത തളിപ്പറമ്പ് ബ്രാഹ്മണസമൂഹ മഠം ഭാരവാഹികളായ എന്.നീലകണ്ഠന്, എ.ശിവസുബ്രഹ്മണ്യന്, സി.എച്ച്.കൃഷ്ണന്, റസിഡന്റ്സ് അസോസിയേഷന് ഭാരവാഹി രാജന്മാസ്റ്റര് എന്നിവര് പറഞ്ഞു. വരും വര്ഷങ്ങളില് തളിപ്പറമ്പിന്റെ സംഗീതോത്സവമാക്കാനുള്ള ലക്ഷ്യമാണ് സമൂഹമഠത്തിനുള്ളതെന്നും സംഘാടകര് കൂട്ടിച്ചേര്ത്തു .സംഗീതത്തെ നെഞ്ചേറ്റിയ കമ്പനി സ്വാമി ആലാപന മാധുരി നിറയ്ക്കാനാണ് അരവത്ത് ക്ഷേത്രത്തിനടുത്ത് ഭജനമഠം തുടങ്ങിയത്. ഏഴു പതിറ്റാണ്ടിന് മുമ്പേ നിലകൊണ്ട ഈ ഭജനമഠം മാസങ്ങള്ക്ക് മുമ്പാണ് പുനരുദ്ധീകരിച്ചത്. പത്രസമ്മേളനത്തില് എഴുത്തുകാരന് വത്സന് അഞ്ചാംപീടികയും പങ്കെടുത്തു.
