പേട്ട: ജില്ലാ കണ്ണാശുപത്രിയിലെ ആംബുലന്സിന് നിശ്ചലാവസ്ഥ. നിരത്തിലോടാന് ഫിറ്റ്നസ് സര്ട്ടിഫിക്കറ്റ് ലഭിക്കാത്തതാണ് കാരണമായി അധികൃതര് ചൂണ്ടിക്കാട്ടുന്നത്. എന്നാല് ബന്ധപ്പെട്ടവരുടെ അനാസ്ഥയാണ് ആംബുലന്സിന്റെ നിശ്ചലാവസ്ഥയ്ക്ക് പിന്നിലെന്നാണ് പറയുന്നത്.
മൂന്ന് മാസങ്ങള്ക്ക് മുമ്പാണ് റീടെസ്റ്റിനുളള പണികള് പൂര്ത്തിയാക്കിയത്. എന്നാല് ഇതുവരെ വാഹനം ടെസ്റ്റിന് കൊണ്ടുപോകാന് അധികൃതര് തയ്യാറായിട്ടില്ല. ടെസ്റ്റ് നടപടികള് പൂര്ത്തിയാക്കേണ്ട ചുമതല പിഡബ്ല്യുഡിക്കാണെന്ന വാദമാണ് ആശുപത്രി അധികൃതര്ക്കുളളത്. ഇത് സംബന്ധിച്ച രേഖകള് പിഡബ്ല്യുഡിക്ക് കൈമാറിയതായും പറയുന്നു. എന്നാല് പിഡബ്ല്യുഡി ഇക്കാര്യത്തില് നിശബ്ദതയിലാണ്.
അതേസമയം ഫിറ്റ്നസ് സര്ട്ടിഫിക്കറ്റിന് വേണ്ടി വാഹനം ആര്ടിഓഫീസില് കൊണ്ടുപോകാതെ ഫിറ്റ്നസ് സര്ട്ടിഫിക്കറ്റ് ലഭിച്ചിെല്ലന്ന കാരണം ഉന്നയിച്ച് ഇരുവിഭാഗങ്ങളിലെ ഉന്നതാധികാരികള് ആംബുലന്സിനെ ഇല്ലാതാക്കാനുളള ശ്രമത്തിലാണെന്നാണ് ആരോപണം. ഒരു ആംബുലന്സ് മാത്രമാണ് ഇവിടെയുളളത്. വിവിധ ആശുപത്രികളില് ദാനം ചെയ്യുന്ന കണ്ണ് എടുക്കുന്നതും മെഡിക്കല് കോളേജ് ആശുപത്രിയിലെ കണ്ണ് വിഭാഗം ഒപിയിലേയ്ക്ക് ഡോക്ടേഴ്സിനെ കൊണ്ട് പോകുന്നതുള്പ്പെടെയുളള പ്രവര്ത്തനങ്ങള്ക്കാണ് ആംബുലന്സ് പ്രധാനമായും ഉപയോഗിച്ചിരുന്നത്. എന്നാല് ആംബുലന്സ് ഷെഡില് ഒതുക്കിയതോടെ ഇത്തരം കാര്യങ്ങള് താളം തെറ്റിയിരിക്കുകയാണ്. കണ്ണ് എടുക്കാന് ജീവനക്കാരുടെ വാഹനങ്ങളാണ് ഉപയോഗിക്കുന്നത്. മാത്രവുമല്ല മെഡിക്കല് കോളേജില് നിന്ന് ആംബുലന്സ് വന്നെങ്കില് മാത്രമേ ഇവിടുത്തെ ഡോക്ടേഴ്സിന് മെഡിക്കല് കോളേജിലെ ഒപിയിയിലേയ്ക്ക് പോകാന് കഴിയുകയുളളൂവെന്ന സ്ഥിതിവിശേഷമാണുളളത്. ഇതേ സാഹചര്യത്തില് ലേലം ചെയ്യാന് ഒതുക്കിയിട്ട ഒരു ടെംബോ ട്രാക്സ് തുരുമ്പ് കേറാന് തുടങ്ങിയിട്ട് വര്ഷങ്ങള് നീളുകയാണ്. ഇതുവരെ ലേലത്തിനാവശ്യമായ യാതൊരു നടപടികളും നടന്നിട്ടില്ല.
