കാസര്കോട്: മുസ്ലീം, ക്രിസ്ത്യന് തുടങ്ങിയ ന്യൂനപക്ഷ മതവിഭാഗങ്ങളില്പ്പെടുന്ന ഹൈസ്ക്കൂള്, ഹയര് സെക്കണ്ടറി ക്ലാസ്സുകളില് പഠിക്കുന്ന വിദ്യാര്ത്ഥികള്ക്കായി സംസ്ഥാന ന്യൂനപക്ഷ ക്ഷേമ വകുപ്പ് രണ്ട് ദിവസത്തെ സൗജന്യ കരിയര് ഗൈഡന്സ് -വ്യക്തിത്വ വികസന പരിശീലന ക്യാമ്പ് സംഘടിപ്പിക്കുന്നു. അഭിരുചിക്കനുസരിച്ച് ഉപരിപഠന മേഖലകള് തെരഞ്ഞെടുക്കുക, വ്യക്തിത്വ രൂപീകരണം തുടങ്ങിയവയാണ് ക്യാമ്പിന്റെ ലക്ഷ്യങ്ങള്. ഒന്നാം ദിനം രാവിലെ ഒമ്പത് മണിക്ക് ക്യാമ്പ് ആരംഭിച്ച് രണ്ടാംദിനം വൈകീട്ട് നാല് മണിക്ക് അവസാനിക്കാവുന്ന രൂപത്തിലാണ് ക്രമപ്പെടുത്തിയിരിക്കുന്നത്. ക്യാമ്പില് പങ്കെടുക്കുന്നവര് ഒന്നാം ദിനം രാത്രി ക്യാമ്പില് താമസിക്കണം. വാര്ഷിക പരീക്ഷയില് ചുരുങ്ങിയത് 60 ശതമാനം മാര്ക്ക് നേടിയവര്ക്കാണ് ക്യാമ്പിലേക്കുളള പ്രവേശനം. ഹയര്സെക്കണ്ടറി വിദ്യാര്ത്ഥികള്ക്ക് എസ്എസ്എല്സി പരീക്ഷയുടെ മാര്ക്കും മറ്റുളളവര്ക്ക് മുന് വര്ഷത്തെ വാര്ഷിക പരീക്ഷയുടെ മാര്ക്കുമാണ് മാനദണ്ഡം. 30 ശതമാനം സീറ്റുകള് പെണ്കുട്ടികള്ക്കും 20 ശതമാനം സീറ്റുകള് മുസ്ലീങ്ങള് ഒഴികെയുളള മറ്റ് മതന്യൂനപക്ഷ വിഭാഗങ്ങള്ക്കും സംവരണം ചെയ്തിട്ടുണ്ട്. ബിപിഎല് വിഭാഗങ്ങളില്പ്പെടുന്ന വിദ്യാര്ത്ഥികള്ക്ക് പ്രത്യേക പരിഗണന നല്കും. ഒരു ക്യാമ്പില് പരമാവധി 100 വിദ്യാര്ത്ഥികള്ക്കാണ് അവസരം. ഓരോ ജില്ലയിലും പരമാവധി 10 ക്യാമ്പുകള് വരെ സംഘടിപ്പിക്കും. കരിയര് ഗൈഡന്സ്, വ്യക്തിത്വ വികസനം, നേതൃത്വ പാടവം തുടങ്ങിയ വിഷയങ്ങളില് വിദഗ്ദ്ധരായ പരിശീലകര് ക്യാമ്പില് നേതൃത്വം നല്കും. സ്കൂള് മേലധികാരിയുടെ മേലൊപ്പോടു കൂടി ഡെപ്യൂട്ടി കളക്ടര് (ജനറല്), ജില്ലാ ന്യൂനപക്ഷക്ഷേമ സെക്ഷന്, ജില്ലാ കളക്ടറേറ്റ് എന്ന വിലാസത്തില് അതത് ജില്ലാ കളക്ടറേറ്റുകളിലേക്കാണ് അപേക്ഷ സമര്പ്പിക്കേണ്ടത്. അപേക്ഷാഫോറം www. minority welfare. kerala.gov.in എന്ന വെബ് സൈറ്റില് ലഭിക്കും. അപേക്ഷകള് 30 നകം നല്കണം.
