ബീജിംഗ്: മെറാന്റി ചുഴലിക്കൊടുങ്കാറ്റ് നാശം വിതച്ച മേഖലയില് സണ് ഗ്ലാസും കുടയും പിടിച്ച് അഭിമുഖം നടത്തിയ ചൈനീസ് പത്രപ്രവര്ത്തകയെ ജോലിയില് നിന്നും സസ്പെന്ഡ് ചെയ്തു. ദാരൂണ സംഭവങ്ങള് റിപ്പോര്ട്ട് ചെയ്യാന് പോകുമ്പോള് അനുയോജ്യമല്ലാത്ത വസ്ത്രം ധരിച്ചെന്ന് ആരോപിച്ചാണ് ജോലിയില് നിന്നും സസ്പെന്ഡ് ചെയ്തത്.
ചൈനീസ് നഗരമായ ഷിയാമെനില് മെറാന്റി ചുഴലിക്കാറ്റ് വരുത്തിയ നാശനഷ്ടങ്ങള് റിപ്പോര്ട്ട് ചെയ്യാനെത്തിയതായിരുന്നു ഇവര് രക്ഷാപ്രവര്ത്തനം നടത്തിയ വോളണ്ടിയറുമായി നടത്തിയ അഭിമുഖത്തിലാണ് ചിരിച്ച് ഉല്ലസിച്ചുകൊണ്ട് കുടയും സണ്ഗ്ലാസും ധരിച്ച് പ്രത്യക്ഷപ്പെട്ടത്. അഭിമുഖം ചിത്രീകരിക്കുന്നത് കണ്ടുനിന്നിരുന്ന ഒരാള് റിപ്പോര്ട്ടറുടെ ചിത്രമെടുത്ത് സോഷ്യല് മീഡിയയില് പോസ്റ്റ് ചെയ്യുകയായിരുന്നു.
ചിത്രം സാമൂഹ്യമാധ്യമങ്ങളില് വൈറലായതിനെ തുടര്ന്നാണ് മാധ്യമപ്രവര്ത്തകയ്ക്കെതിരെ നടപടി എടുത്തത്. മാധ്യമപ്രവര്ത്തകയുടെ പേര് പുറത്തു വിട്ടിട്ടില്ല. അണ്പ്രൊഫഷണലായ നടപടിയെന്ന് ചൂണ്ടിക്കാട്ടിയാണ് സസ്പെന്ഷന്. മാധ്യമപ്രവര്ത്തകയുടെ നടപടി തെറ്റായ സന്ദേശം നല്കുന്നതാണെന്ന് മാധ്യമസ്ഥാപനവും പ്രതികരിച്ചു.
തങ്ങളുടെ വിശ്വാസത്തിനും സ്ഥാപനത്തിന്റെ നിയമത്തിനും എതിരാണ് ഇവരുടെ പ്രവൃത്തി. മാധ്യമപ്രവര്ത്തകരെ കുറിച്ച് തെറ്റായ കാഴ്ചപ്പാട് ഉണ്ടാക്കാന് ഇവരുടെ രീതി വഴിവെച്ചുവെന്നും അതു കൊണ്ടാണ് നടപടി എടുക്കുന്നതെന്നും മധ്യമസ്ഥാപന അധികൃതര് വ്യക്തമാക്കി.
ചൈനീസ് നവമാധ്യമങ്ങളില് മാധ്യമപ്രവര്ത്തകയുടെ നടപടിയെ അനുകൂലിച്ചും പ്രതികൂലിച്ചും നിരവധി ചര്ച്ചകള് നടക്കുന്നുണ്ട്. പൊതുജനങ്ങളുടെ പ്രതിഷേധം തണുപ്പിക്കാനാണ് നടപടിയെന്നാണ് ഭൂരിപക്ഷം പേരുടെയും അഭിപ്രായം.
ഒരു ശാസനയില് ഒതുക്കേണ്ട വിഷയം സമൂഹമാധ്യമങ്ങളില് പടരുന്ന അഭിപ്രായങ്ങളുടെ പേരില് ഇങ്ങനെ കലാശിച്ചത് ആശങ്കയോടെയാണ് ചൈനയിലെ പത്രപ്രവര്ത്തകസമൂഹം സ്വീകരിച്ചത്.
പത്രപ്രവര്ത്തകരുടെ ഔചിത്യക്കുറവ് ചൂണ്ടിക്കാട്ടുക മാത്രമായിരുന്നു തന്റെ ലക്ഷ്യമെന്ന് ചിത്രം മെടുത്ത യാന്പിംഗ് ഴാങും അഭിപ്രായപ്പെട്ടു. പത്രപ്രവര്ത്തകക്ക് ജോലി നഷ്ടമാകാന് കാരണക്കാരായവരില് ഒരാളെന്ന നിലയില് ഴാങിനെ കുറ്റപ്പെടുത്തി നിരവധി പ്രതികരണങ്ങളും സോഷ്യല് മീഡിയയില് പ്രചരിക്കുന്നുണ്ട്.
