പിണറായി: മുഖ്യമന്ത്രിയുടെ നാട്ടില് അന്തസ്സോടെയും ആത്മാഭിമാനത്തോടെയും ജീവിക്കാന് സാഹചര്യമൊരുക്കേണ്ട ബാധ്യത ഭരണകൂടത്തിനുണ്ടെന്ന് ബിജെപി സംസ്ഥാന പ്രസിഡണ്ട് കുമ്മനം രാജശേഖരന്. പിണറായി പുത്തം കണ്ടത്തില് മാറോളി പ്രേംജിത്തിന്റെ വീട്ടില് കേന്ദ്ര നേതാക്കള്ക്കൊപ്പം സന്ദര്ശനം നടത്തിയ ശേഷം നടന്ന സംഗമത്തില് സംസാരിക്കുകയായിരുന്നു അദ്ദേഹം.
ബിജെപി എംപിമാരായ ഭൂപേന്ദ്ര യാദവ്, നളിന് കുമാര് കട്ടീല്, അനന്തകുമാര് ഹെഗ് ഡേ, അഖിലേന്ത്യാ സെക്രട്ടറി എച്ച്.രാജ, ജില്ലാ പ്രസിഡണ്ട് പി.സത്യപ്രകാശ്, സംസ്ഥാന സെക്രട്ടറി വി.കെ.സജീവന്, മോഹനന് മാനന്തേരി, അഡ്വ: വി.രത്നാകരന് എന്നിവര് സംഘത്തിലുണ്ടായിരുന്നു. സിപിഎം നേതൃത്വം അണികളെ കയറൂരി വിട്ടിരിക്കുകയാണ്. അവര് നടത്തുന്നഅക്രമ പ്രവര്ത്തനങ്ങളെ നേരിടാനുള്ള ഇച്ഛാശക്തി നമുക്കുണ്ട്. അതുകൊണ്ടാണ് ആദര്ശം കൈവിടാതെ ജീവിക്കാനും പ്രവര്ത്തിക്കാനും നമുക്ക് സാധിക്കുന്നത്. ഇവിടെ നിയമവാഴ്ച നില നില്ക്കുന്നതും അതുകൊണ്ടാണ്. കുമ്മനം പറഞ്ഞു.
ജില്ലയുടെ വിവിധ ഭാഗങ്ങളില് അക്രമത്തിനിരയായ ബിജെപി പ്രവര്ത്തകരില് നിന്ന് വിവരങ്ങള് ശേഖരിച്ചിട്ടുണ്ട്. ഇവിടത്തെ കാര്യങ്ങള് ഉത്കണ്ഠയോടെയാണ് ബിജെപി നോക്കിക്കാണുന്നത്. രാഷ്ട്രീയ അക്രമങ്ങള്ക്ക് നേതൃത്വം നല്കി ആയുധവുമായി തെരുവില് കൊലവിളി നടത്തുന്നവര്ക്ക് ജനം മറുപടി നല്കും. അക്രമത്തിനിരയായവര്ക്ക് ആശ്വാസം പകരുക എന്നത് കൂടിയാണ് കേന്ദ്ര നേതാക്കളുടെ സന്ദര്ശനത്തിന്റെ ലക്ഷ്യമെന്നും അദ്ദേഹം പറഞ്ഞു.
കൂത്തുപറമ്പ് പാതിരിയാട് കഴിഞ്ഞയാഴ്ച വെട്ടേറ്റ നവജിത്തിനെ സ്ട്രെക്ചറില് താങ്ങിയെടുത്ത് കൊണ്ടാണ് പ്രവര്ത്തകര് വേദിയിലെത്തിച്ചത്. അക്രമത്തിനിരയായ മഹിളാ മോര്ച്ച ജില്ലാ നേതാവ് ലസിത പാലക്കല്, ആറാം ക്ലാസ്കാരി ശിവദ എന്നിവരുള്പ്പെടെ നിരവധി പേര് എംപിമാരെ കാണാനെത്തി.
