സ്വന്തം ലേഖകന്
നാദാപുരം: വിലങ്ങാട് കുറ്റല്ലൂരില് സേവാഭാരതി നിര്മ്മിക്കുന്ന ആരോഗ്യകേന്ദ്രം ഉദ്ഘാടനത്തിന് ഒരുങ്ങി ആതുരസേവന രംഗത്ത് തീര്ത്തും അവഗണന നേരിടുന്ന വനവാസി സമൂഹത്തിന് ഒരു കൈത്താങ്ങായി സേവാഭാരതി നിര്മ്മിക്കുന്ന ആരോഗ്യകേന്ദ്രത്തിന്റെ നിര്മ്മാണ പ്രവൃത്തി അടുത്ത മാസംപൂര്ത്തിയാകും. 2015ല് ചിദാനന്ദപുരി സ്വാമികളായിരുന്നു കെട്ടിടത്തിന്റെ ശിലാസ്ഥാപനം നടത്തിയത് തൃശൂര് ,തിരുവനന്തപുരം, കോഴിക്കോട് ജില്ലയിലെ പ്രവാസികൂട്ടായ്മ സ്വരൂപിച്ച 22 ലക്ഷം രൂപ ചെലവഴിച്ചാണ് കെട്ടിട നിര്മാണം പൂര്ത്തിയാക്കുന്നത്. നാദാപുരം മേഖലയിലെ ആര്എസ്എസ് പ്രവര്ത്തകര് സന്നദ്ധ പ്രവര്ത്തനം നടത്തിയാണ് നിര്മ്മാണ ജോലികള് പൂര്ത്തിയാക്കിയത്. നവംബര് ആദ്യവാരം ഉദ്ഘാടനം ചെയ്യാനാണ് തീരുമാനം. നിരവധി കോളനികള് സ്ഥിതിചെയ്യുന്ന വിലങ്ങാട് മുതല് പറക്കാട് വരെയുള്ള വനവാസി സമൂഹം 25 കിലോമീറ്റര് അകലെയുള്ള വാണിമേല്സര്ക്കാര് ആശുപത്രിയെയാണ് ആശ്രയിക്കുന്നത്. സേവാഭാരതി ആരോഗ്യകേന്ദ്രം തുറക്കുന്നതോടെ ഇതിന് പരിഹാരം കാണാന് സാധിക്കും .അലോപ്പതി ,ആയുര്വേദം ,ഹോമിയോ ഡോക്ടര്മാരുടെ സേവനം തുടക്കത്തില് മാസത്തില് രണ്ട് പ്രാവശ്യം ഇവിടെ ലഭ്യമാക്കും .രോഗികള്ക്കുള്ള മരുന്നുകളും മറ്റ് സേവനങ്ങളും ഈ കേന്ദ്രത്തില് സൗജന്യമായി ലഭ്യമാക്കുമെന്ന് സംഘാടകര് പറഞ്ഞു.
